Jenesis 6 - Buka Blahi Ka Cheke Holo

Puhidi naiknore ne diꞌa fara

¹ Kate karha te thovu fara naikno na ka nauthoglu igne, mare ne karha thudi gaꞌase.

² Gaꞌase igre biꞌo haghe ne thono famane fara ka tathadi nogna tothoghei engel God re. Mare ne vavahi gaꞌase te magnahaghedi thedi re ne tolaghi.

³ Aonu Lord ne cheke eghu, “Iara ginauna na theome snakredi mala karha fabrahu naikno igre. Iara ginauna na snakredi mare mala karhau nabagna kaisei gobi varadaki finogha kolho ame lehe nga eghu.”

⁴ Ka narane tuare ba ka narane te mei nathuꞌu nei nauriha teu igre, mae te kilodi Nefilim te au ka nauthoglu igne. Mae igre mae brahu fara nei lase magra fara eghu. Ka narane tuare la, goro gaꞌase teke thuru baludi nogna engel God ra. Thudire neke biꞌo haghe neke nheta fara tutuani. Eghuteuna mare tangomana te edi kmana nafnata gloku te biꞌo nei nanghadire fnakno fara neku tifa na.

⁵ Lord ne filodi puhidi naikno gna nauthoglu gne ne thono diꞌa fara. Eghuteuna mare ghathodi fabrahu kolho glepo te diꞌa re.

^6-7 Lord ne diꞌanagnafa fara, ne cheke eghu, “Iara ginauna faluvu fahuidi naikno teke vuavuha iara ka nauthoglu igne. Iara jame neke theome vuavuhadi naikno igre ka nauthoglu igne! Eghuteuna iara ginauna na jaola faluvu fahuidi nanghaji ba bosu ba saba teu ka namhata igre. Iara diꞌanagnafagu fara naugna iara ngala teke vuavuhadi re glepo igre.”

⁸ Nu Lord ne keli tagna fara ka mae Noa.

^9-10 Igne u thoutonu gna mae Noa na. Mae Noa gne ngala thofno kheragna tutuani God na. Naugna kaisei mana ngala mae te doglo nei thofno leghuni teu God na. Nanghadi thugna mae Noa re igre, mae Sem, mae Ham nei mae Jafet.

^11-12 Ka narane tuare, God ne filodi naiknore ne kafe diꞌa fara naugna mare ne khuru magra nei faꞌau aknu fari thedi heva heva. Kaisei mae Noa ngala te doglo fara ka tathagna God na.

Mae Noa ne hohoro kaisei vaka

¹³ Aonu God ne cheke eghu ka mae Noa, “Iara ginauna na kafe roꞌe fahuidi naikno te khuru magra nei faꞌau aknu teu fari thedi igre nei iara ginauna na jaola roꞌeni nauthoglu igne.

¹⁴ Iagho ginauna na atha keha thaba te keli mala hohoro kaisei vaka. Iagho na lilisei keha chogho ke lamnagna vaka igne, eghuteuna iagho na laulamu ka muki ke lamna nei ke kosi teuna mala theome lulu.

¹⁵ Brahugna na kaisei gobi tolufulu thilo mita eghuteuna biꞌogna na varadaki phei mita eghuteuna haghegna na nabotho thilo mita.

¹⁶ Iagho na hohoro suga vaka igne, nu iagho na lilisei kaisei wida biꞌo ke kligna. Krepagna wida igne te funu ka suga na te posa ka gringni na phia tutu fati sentemita mala phae. Iagho hohoro thilo chogho, kaisei pari, kaisei fari hotei nei kaisei kligna eghu. Eghuteuna iagho na hohoro grengatha ka gerigna vaka na.

¹⁷ Iara ginauna na kuru meini kaisei nabritha te biꞌo mala thafru namono te gnafa ka u nauthoglu igne mala roꞌe fahuidi gobigna lepo te karha ka u nauthoglu igne.

¹⁸ Nu iara ginauna na eni kaisei nhaꞌa cheke balumu iagho. Eghuteuna iagho ginauna na saghe ka vaka igne baludi khetomu, thumu nalhaꞌu nei khetodi mae thumu are eghu.

^19-20 Iagho ginauna na atha mei ka vaka gne kaisei gaꞌase gna nei kaisei nalhaꞌu gna eghu balumu ka thua nafnata nanghaji ba bosu ba saba ba cheche teu are naugna iara theome magnahaghedi te lehe fahuidi reꞌe na.

²¹ Iagho ginauna na jaola atha mei naba gano ka vaka na malami ghotilo nei nanghaji nei bosu nei saba nei cheche teu te gnafa are eghu.”

²² Aonu mae Noa ne edi glepo igre thofno leghuni ngala unha teke chekeni God na.