Jenesis 47 - Buka Blahi Ka Cheke Holo

Mae Jekop ne au soru Gosen

¹ Mae Josep tei ne cheke eghu ka mae king, “Mae kmagu nei mae thabusigu teu iara re la posa meihi funudi Kenan. Mare hata mei nodi sipu nei nodi buluka nei nodi gobigna lepo teure baludi la mei auhi ka nohi Gosen gognaro gne.”

² Mae Josep ne vavahi glima mae ka hatimare mae thabusigna re ne batudi ne tei kegra ke ulugna mae king.

³ Aonu mae king ne cheke eghu ka mare, “Unha nafnata gloku gne te tangomana ghami ghotilo te eni na?” Hatimare ne cheke eghu ka mana, “Mae biꞌo, ghehati gne mae mala greiregi sipu, jateula teke eni mae kmami ghehati tifa ra eghu.

⁴ Ghehati magnahaghei te mei au katha vido kmoꞌei kolho ka kantri igne, naugna vido te rofo igne la thono diꞌa fara ka ghehati Kenan, eghuteuna jare na theo kaisei buburu te mala ghamudi nomi sipu ghehati gre eghu. Eghume te keli teu iagho na, snakre ghami mala au soru ghehati ke lamnagna nohi Geson.”

⁵ Aonu mae king ne cheke eghu ka mae Josep, “Mae kmamu nei mae thabusimu teu iagho igre mare la mei auhi agne balumu iagho.

⁶ Eghume iagho na filoni kaisei vido te thofno keli fara uludi keha vido ka vido te gnafa ke lamnagna namono Ijep. Iagho chekedi mare mala au soru mare agne Gosen, tuana keli kolho. Eghuteuna jame glahu te lasedi iagho keha mae te lase reireghi buluka na, iara magnahaghei nigho iagho te chekedi mare mala reireghidi nogu buluka iara ra.”

⁷ Aonu mae Josep ne hata ne tei mae kmagna na mala tei thafoni mae king. Eghuteuna mae Jekop ne pogho soru ke ulugna mae king ne toreni God mala fablahini mana.

⁸ Aonu mae king ne cheke eghu ka mae Jekop, “Iagho niha finoghamu hila gognaro na?”

⁹ Mae Jekop ne cheke eghu, “Iara au ka nauthoglu igne kaisei gobi tolufulu finogha. Thono kmoꞌe fara, eghuteuna iara jaola thafodi kmana puhi biꞌo te ninhigrana fara. Mae ku'egu iara re neke au raugha fara ka nauthoglu igne, eghuteuna finogha dire teuna uludi fara finogha gu iara re eghu.”

¹⁰ Mae Jekop ne kubaeni mae king ne jifla.

¹¹ Mae Josep ne leghuni unha teke chekeni mae king na ne toghodi kmagna nei thabusigna teure ne au soru Ijep. Mana ne snakre lao ka mare kaisei vido te keli ka nohi Gosen. Vido igne keli fara uludi keha vido te au jare Ijep.

¹² Eghuteuna mae Josep ne fiofilo fakelidi kmagna, nei thabusigna, nei goro gaꞌase, nei goro sua eghu la ngau te au baludi re fei gano te mala ima na.

Glehe rofo na biꞌo fara Ijep

¹³ Glehe rofo na ne biꞌo fara ne theo gano heva te heva na. Vido te theo gano te rofo fara igne ne raꞌe ne diꞌa fara Ijep nei jaola ka kantri Kenan.

¹⁴ Aonu mae Josep ne salo fodu sileni teke foli gano naiknodi Ijep nei Kenan teu igre ne lilisei ka sugagna mae king na.

¹⁵ Kate foli gano te lao te gnafa sileni na, naikno di Ijep nei Kenan teu igre ne mei cheke eghu ka mae Josep, “Iagho fei ghemi gano ghehati! Te theo iagho na, ghehati ginauna na khoko soru ke ulumu iagho mala lehe. Iagho thosei theo te togho ghami ghehati na, naugna nomi sileni ghehati re la gnafahi.”

¹⁶ Aonu mae Josep ne cheke eghu ka naiknore, “Uve, jame te theo sileni tutuani hila ghotilo na, ghotilo hata mei ka iara buluka nei sipu nei dongki nei hose eghu ghotilo are mala ke tughu iara ka ghemi gano.”

¹⁷ Aonu mae Josep neke tuthughu ka gano, hose, nei sipu, nei buluka, nei dongki teu teke hata teke mei naiknore. Mare ne eghu fabrahu ne ghilei gnafa u finogha tuana.

¹⁸ Ka keha finogha na, naiknore jaola neke tei cheke eghu ka mae Josep, “Mae biꞌo, ghehati. Na chekedi ka iagho unha te thofno tutuani na. Ghehati theo hila kaisei sileni te salaꞌu na, eghuteuna nomi sipu ra la atha hi iagho. Ghehati theo hila kaisei glepo te salaꞌu na, khogla thinimi nei nomi glose teu igre kolho ngala te au na.

¹⁹ Ghehati theome magnahaghei te lehe ka glehe rofo na. Nei ghehati jaola theome magnahaghedi nomi glose gre te fiti chochoghei kolho na eghu. Te keli na iagho snakre ghami ghehati mala nogna mae gloku nei gaꞌase gloku eghu mae king kolho. Eghuteuna iagho jaola mala hata nomi glose ghehati gre eghu. Eghume iagho fei ghemi vido gano nei nomi sisi mala joꞌu eghu ghehati mala theome lehe ghehati. Theo. Ghehati ginauna na theome lehe, eghuteuna nomi glose gre ginauna na jaola theome chochoghei eghu.”

²⁰ Aonu kate lao te faꞌiho fara glehe rofo na, naikno re ne snakre lao nodi nagare re ka mae Josep ne foli mana mala nogna mae king.

²¹ Kate eni mae Josep igne, naikno heva heva Ijep na ne jifla ne tei au ka namono biꞌo re.

²² Nodi vido glose mae pris re ngala te theome foli mae Josep re. Mare theome tangomana te snakre lao nodi vido glose re ka mae Josep te mala foli mana na, naugna mae king na folidi nodi gloku mare re. Eghume mare au nodi sileni te mala foli gano na eghu.

²³ Mae Josep ne cheke eghu ka naikno re, “Fanomho ghotilo ia, gognaro na iara la foli ghami hi ghotilo nei nomi glose ghotilo are eghu la nognahi mae king. Eghume ghotilo gognaro na mala jaola nogna naikno gloku mae king. Nu ghotilo tangomana te loku nagare ka glose igre, eghuteuna sisi wit te mala joꞌu ghotilo re kmanau ngala.

²⁴ Kate thoke mei narane te mala ukli ghotilo na, ghotilo mala edi glima duku, kaisei na malagna mae king nei fati re malami themi eghu. Ghotilo mala lilisei keha mala ke joꞌu fapulo. Lilisei keha maladi khetomi nei thumi teu are eghu.”

²⁵ Aonu naiknore ne cheke eghu ka mana, “Mae biꞌo, iagho ne tusu meini u karha na mala theome lehe ghehati, gognaro na ghehati thofno glealeꞌa fara, eghuteuna ghehati tegio fara ka iagho. Eghume ghehati mala nogna naikno gloku mae king.”

²⁶ Aonu mae Josep ne eni kaisei vetula Ijep, vetula igne chekedi naiknore mala edi glima duku kate ganodi nagare re, kaisei malagna mae king nei fatire maladi thedi. U vetula igne au ngala ghilei posa ka narane gognaro gne. Nodi vido glose mae pris gre ngala te theome tangomana te hata mae king na.

Mae Josep neke nhaꞌa cheke mala giugiluni mae Jekop Kenan

²⁷ Hatimare mae Israel gre neke soru au Ijep ka nohi Gosen, ne au nodi glose jare, dedi nodi nei vuragha fara naikno na sua na neu jare.

²⁸ Mae Jekop ne au jare Ijep nabotho fitu finogha. Eghuteuna funu karhagna na mana kaisei gobi phia tutu fitu finogha.

²⁹ Kate namo thoke mei narane te mala lehegna na, mana ne toreni mae thugna Josep mala tei filoni. Kate posa mei mae Josep na, mae Jekop ne cheke eghu, “Jame te namha ghau iara na, iagho lilisei khamemu na ke parigna gahegu iara gne. Iagho nhaꞌa cheke ka iara mala thosei giugilu ghau iara agne Ijep.

³⁰ Kate lehe iara na, iagho mala ke pulo giugilui ghau iara ka namono aheva teke giugilui mae kuꞌegu ra.” Mae Josep ne cheke eghu ka mae kmagna na, “Iara ginauna na eni unha te chekeni iagho na.”

³¹ Aonu mae Jekop neke cheke eghu fapulo, “Iagho nhaꞌa cheke ka iara kate thofno tutuani fara te mala eni iagho igne na.” Kate eni te gnafa mae Josep u nhaꞌa cheke igne, mae Jekop ne thuru soru ka nogna sape na.