Jenesis 46 - Buka Blahi Ka Cheke Holo

Mae Jekop nogna vike ne tei Ijep

¹ Aonu mae Jekop tarabana nogna gobigna lepore mala tei ka kantri Ijep. Kate theome tei kokoni na teu mare kantri Israel na, mare mei ne posa ka namono Bereseba. Mae Jekop ne fafara ka nogna God mae kmagna Isak na jare.

² Ka bongi tuana God ne thakle ka mana ne cheke eghu, “Jekop, Jekop!” Mae Jekop ne cheke eghu ka mana, “Iara au teu ao Lord.”

³ Aonu God ne cheke eghu ka mana, “Iara God, nogna God mae kmamu. Thosei mhaghu te tei Ijep na, naugna iara ginauna na fablahidi vikemu iagho gre mala vuragha jare Ijep.

⁴ Iara ginauna na hata nigho iagho tei Ijep, eghuteuna iara ginauna nake hata fapulo nigho iagho ka vido tela jifla kokoni iagho gognaro gne. Kate lehe iagho na, mae Josep gne ngala te mala giugilu nigho iagho na.”

^5-6 Aonu, mae Jekop ne jifla Bereseba ne tei Ijep. Mae thugnare ne lujani mana baludi khetodi nei thudi teure ka kat teke famei mae king gna Ijep na. Mare hata tei baludi keha buluka nei keha glepo langau eghu funu Kenan.

⁷ Eghume, mana ne tei au jare baludi thugna nalhaꞌu, gragna nalhaꞌu, thugna gaꞌase nei gragna gaꞌase teure Ijep.

⁸ Igre nanghadi thugna mae Jekop teke tei balugna mana Ijep re. Mae Ruben, mae ihei teke kulu karha ka mana na.

⁹ Nanghadi thugna mae Ruben teke tei balugnare neke mae Hanok nei mae Palu nei mae Hesron nei mae Kami.

¹⁰ Keha na mae Simion baludi thugnare, nanghadire mae Jemuel nei mae Jamin nei mae Ohat nei mae Jakin nei mae Soha nei mae Saul. Mae Saul gne neke karha ka gaꞌase gna Kenan.

¹¹ Keha na mae Livae baludi thugnare, nanghadire mae Geson nei mae Kohat nei mae Merari.

¹² Keha na mae Juda baludi thugnare, nanghadire mae Er nei mae Onan nei mae Sela nei mae Peres nei mae Sera. Nu mae Er ghe mae Onan gre phia mare neke lehe kani au teku mare Kenan na. Eghuteuna thugna nalhaꞌu mae Peres re neke mae Hesron ghe mae Hamul.

¹³ Keha na mae Isaka baludi thugnare, nanghadire mae Tola nei mae Puva nei mae Jop nei mae Simron.

¹⁴ Keha na mae Sebulun baludi thugnare, nanghadire mae Seret nei mae Elon nei mae Jalel.

¹⁵ Igre mae sua nalhaꞌu teke karha ka mae Jekop ghe Lea re, mae Ruben nei mae Simion nei mae Livae nei mae Juda nei Isaka nei mae Sebulun. Mae nalhaꞌu igre neke karha Mesopotemia. Repa jaola neke au kaisei thugna gaꞌase, nanghagna na Daina. Thugna nei gragna teu Lea re neke tolufulu thiloi khaputudire.

¹⁶ Keha na mae Gad baludi thugnare, nanghadire Sifion nei mae Hagi nei mae Suni nei mae Esbon nei mae Eri nei mae Arodi nei mae Areli.

¹⁷ Keha na mae Asa baludi thugnare, nanghadire mae Imna nei mae Isva nei mae Isvi nei mae Beria. Eghuteuna gregadi mare na neke Sera. Eghuteuna thugna nalhaꞌu mae Beria re neke mae Heba ghe mae Malkiel.

¹⁸ Igre sua teke karha ka mae Jekop ghe Silpa baludi gradire. Silpa gne neke nogna gaꞌase gloku mae Laban neke tusu lao ka Lea thugna gaꞌase na. Thugna nei gragna teu Silpa re neke nabotho namnoi khaputudire.

¹⁹ Mae Jekop ghe Resel neke karha phei thudi nalhaꞌu mae Josep ghe mae Benjamin.

²⁰ Kate au teu Ijep na mae Josep neke tolaghi ka Asenat, thugna gaꞌase mae Potifera. Mae Potifera gne, mana mae pris ka namono biꞌo Heliopolis. Mae Josep ghe Asenat ne karha phei thudi nanghadire mae Manase ghe mae Efrem.

²¹ Teke thugna nalhaꞌu mae Benjamin re nanghadire mae Bela nei mae Beka nei mae Asbel nei mae Gera nei mae Naman nei mae Ehi nei mae Ros nei mae Mupim nei mae Hupim nei mae At.

²² Igre sua teke karha ka mae Jekop ghe Resel re nei gradi teu repa re nabotho fati khaputudire.

²³ Thugna mae Dan na neke kaisei mae Husim kolho.

²⁴ Thugna nalhaꞌu mae Naftali re neke mae Jasel nei mae Guni nei mae Jesa nei mae Silem.

²⁵ Igre thugna nei gragna eghu mae Jekop ghe Bilha re. Bilha gne neke nogna gaꞌase gloku mae Laban neke tusu lao ka Resel. Thudi nei gradi teu Jekop ghe Bilha re neke fitui khaputudire.

²⁶ Eghume khaputudi teke thofno vikegna mae Jekop teke tei balugna Ijep re neke namno salei naikno. Teke khetodi thugna nalhaꞌu mae Jekop re neke theome kahadi.

²⁷ Teke karha Ijep ka khetogna mae Josep na neke phei mae nalhaꞌu. Eghume khaputudi teke thugna nei gragna teu mae Jekop teke tei au Ijep re neke fitu salei.

Mae Jekop goro thugna ne posa lao Ijep

²⁸ Kate posa lao mare ka nohi Gosen na, mae Jekop ne kulu kuruni mae Juda mala kulu tei filoni mae Josep Gosen mala mei thafoni mae kmadi na.

²⁹ Mae Josep ne chekedi nogna mae gloku re mala tarabana nogna chariot na mala tei thafoni mae kmagna na Gosen. Kate filoni mae kmagna na mae Josep tei ne lokini mae kmagna na ne tanhi ne tanhi.

³⁰ Aonu mae kmagna na ne cheke eghu ka mae Josep, “Thuguo, te lehe iara gognaro na. Keliu kolho, naugna iara la filo dihi tathamu nei foflomu teu iagho re, eghume iara gognaro na thofno laseni te karha teu iagho na.”

³¹ Mae Josep ne cheke eghu ka mae thabusigna nei tharaknagna teu mae kmagna re, “Iara ginauna na tei cheke eghu ka mae king, ‘Hatimare mae thabusigna nei tharaknagna teu mae kmagu iara re la jifla Kenan la mei auhi ka iara agne.

³² Mae igre mae greiregi sipu nei buluka. Eghuteuna mare hata mei nodi sipu nei nodi buluka nei nodi gobigna lepo teure baludi.’

³³ Kate kilo ghami mae king te ghusna ghami mana eigna nomi gloku na.

³⁴ Ghotilo cheke eghu ka mana, ‘Mae biꞌo, ghehati mae greiregi sipu nei buluka eghu. Ghehati neke edi nafnata gloku igre funu suami ghilei posa gognaro gne. Eghuteuna vikegna mae kmami ghehati na neke edila nafnata gloku igre tifa na.’ Jame te cheke eghu ghotilo ka mae king na, mana ginauna na snakre ghami ghotilo mala au soru ka nohi Gosen, naugna naiknodi Ijep gre theome magnahaghedi mae greiregi sipu gre te au rhedire.”