Jenesis 38 - Buka Blahi Ka Cheke Holo

Tama ne chaghini mae Juda

¹ Ka vido igne mae Juda ne jifla kokodi mae thabusignare ne tei au balugna mae Hira ka namono Adulam.

² Mae Juda ne filoni kaisei gaꞌase, gaꞌase igne thugna mae Sua kaisei maegna Kenan. Eghuteuna mana ne magnahagheni gaꞌase igne ne tolaghi ka naꞌa.

³ Gaꞌase igne bukla ne au kaisei thugna nalhaꞌu. Mae Juda ne kiloni mae thugna nalhaꞌu igne Er.

⁴ Ke leghugna igne naꞌa neke bukla neke au fapea thugna nalhaꞌu na ne kiloni Onan.

⁵ Aonu naꞌa neke bukla neke au fatilo thugna nalhaꞌu na ne kiloni Sela. Kate au teu mae Juda ka namono Kesip na neke karha nga mae Sela.

⁶ Ka vido tela biꞌohi mae thugna nalhaꞌu re, mae Juda ne vavahi kaisei gaꞌase mala khetogna mae Er, mae thugna ulu lahu na. Nanghagna gaꞌase teke vavahi mana igne Tama.

⁷ Nu puhigna mae Er igne thofno diꞌa fara ka tathagna Lord na, aonu Lord ne fate faleheni mana.

⁸ Kaisei narane mae Juda ne cheke eghu ka mae Onan, “Iagho tei thuru balugna khetogna mae tighamu tela lehehi nu theo thugna teu ana. Te chekeni ka noda vetula tahati na, iagho tangomana teke hata khetogna mae tighamu ana mala ke au sua ka nanghagna mana. Aonu mae tighamu iagho na mana ginauna nake au vikegna.”

⁹ Nu mae Onan ne theome magnahagheni u vetula igne, naugna mana magnahaghei te au thugna thegna. Nu kate thuru balugna gaꞌase igne na, mana ne totofa kolho kholognare ka glose na, mala theome tangomana te au sua malagna mae tighagna na.

¹⁰ Puhi te eni mae Onan igne ne thofno jafra fara ka tathagna Lord na, nu Lord ne jaola ne faleheni mana.

¹¹ Ke leghugna igne mae Juda ne cheke eghu ka Tama, “Khetomu ia la lehehi ia, eghume iagho nake pulo ke au ka sugagna mae kmamu ia, iagho thosei tolaghi ke ghilei biꞌo ghu mae Sela, mae thugu nalhaꞌu iara gne.” Mae Juda ne eni cheke igne, naugna gaoghathogna mana na Tama igneu ngala te falehedi phei mae thugna nalhaꞌure. Mana theome magnahagheni mae Sela te lehe jateula phei mae tighagnare teuna. Aonu Tama neke pulo neke au soru ka sugagna mae kmagna na.

¹² Kmana narane ke leghudi igre, khetogna mae Juda na ne jaola ne lehe. Kate gnafahi nogna narane te mala diꞌa nagnafani khetogna na, mae Juda ne tei ka namono Timna mala filodi nogna mae gloku teke tei kato buburudi nogna sipure. Kheragna mana mae Hira gne jaola ne tei balugna mana. Mae Hira gne kaisei maegna Adulam.

¹³ Eghuteuna kaisei mae ne cheke eghu ka Tama, “Nanghomu iagho na la tei Timna kato buburudi nogna sipu re jare.”

¹⁴ Tama laseni mae Sela gne la biꞌo hi, nu mare theome faghose fadogloni groghe te mala tolaghi naꞌa ka mae Sela na. Aonu naꞌa ne hata koko u pohe teke fahaghe naꞌa na leghuni nodi kastom thedi eigna teke lehehi khetogna na ne hata kaisei vido pohe ne toku tafru tathagna nei foflogna teure ne tei gnokro ka foflogna nabrou te mala tei thoke ka namono Enaim na. Igne kaisei vido ka nabrou te mala tei thoke Timna.

¹⁵ Mae Juda ne leghuni u nabrou igne ne mei filoni gaꞌase igne. Kate filoni naꞌa na mana ne kaisei gaꞌase vine neu nogna ni, naugna naꞌa ne toku tafru tathagna nei foflogna teure ka vido pohe ikoi.

¹⁶ Aonu mae Juda ne lao ka naꞌa ne cheke eghu, “Iara magnahaghei te thuru balumu iagho.” Mana theome laseni ne thofno nanghogna thegna na ngala teuna. Gaꞌase na ne cheke eghu ka mana, “Uve, te mala thuru balugu iara teu iagho na, unha glepo gne nate kulu tusu mei iagho ka iara na?”

¹⁷ Mae Juda ne cheke eghu ka naꞌa, “Iara au kmana nogu nanigot, eghume iara ginauna na tusu ari kaisei sua nanigot majaghani ka iagho.” Eghuteuna gaꞌase na ne cheke eghu ka mana, “Keli fara nu ulu lahu na iagho na kulu tusu mei kaisei glepo ka iara, fagaglanagna u nou nhaꞌa cheke iagho tuana, eghuteuna iara ginauna nake tusu fapulo ka iagho kate tusu meini iagho ka iara sua nanigot majaghani na.”

¹⁸ Mae Juda ne ghusna eghu ka naꞌa, “Unha glepo gne te magnahagheni iagho jame te mala tusu ari iara ka iagho te mala jateula fagaglagna teu u nogu nhaꞌa cheke iara igne na?” Gaꞌase na ne cheke eghu ka mana, “Tusu mei ka iara medol te babaꞌo teu iagho te au nanghamu iagho ana nei khodo te louloku teu iagho ana eghu.” Aonu mae Juda ne tusu lao ka Tama glepo igre ne thuru balugna naꞌa, eghuteuna Tama ne bukla.

¹⁹ Ke leghugna tela gnafahi te thuru balugna mae Juda na, Tama kegra haghe neke pulo ka sugagna na ne hata koko vido pohe teke toku tafrudi tathagna nei foflogna teure neke fahaghe pohe malagna diꞌanagnafa eigna khetogna tekela lehehi na.

²⁰ Mae Juda ne tusu lao kaisei sua nanigot majaghani ka mae Hira ne kuru teini mana mala ke hata fapulo glepo teke tusu lao ka gaꞌase ra. Nu mae Hira ne theome filoni gaꞌase igne.

²¹ Mae Hira ne ghusnadi keha mae ka namono Enaim gne ne cheke eghu ka mare, “Aheva la tei gaꞌase vine teke gnokro tekeu ka nabrou gna namono Enaim gnea?” Hatimare ne cheke eghu ka mae Hira, “Theo kaisei gaꞌase vine agne na.”

²² Aonu mae Hira neke pulo ka mae Juda ne cheke eghu, “Iara theome filoni naꞌa. Eghuteuna te chekeni mae te au ka namono tuana na, jare na theo kaisei gaꞌase vine ka vido tuana.”

²³ Mae Juda ne cheke eghu ka mae Hira, “Ghema, lisa lao ka naꞌa mala hatau naꞌa glepo tuare, eigna iagho ne theome filoni naꞌa. Na eghunu maꞌe ghita naikno gre eghu. Iara neke leghuni nogu nhaꞌa cheke na neke kuru tei nigho iagho neke hata neke tei sua nanigot majaghani igne ka naꞌa, nu iagho ne theome filoni naꞌa jare.”

²⁴ Jame naba thilo nhigra ke leghugna igne, mare ne mei cheke eghu ka mae Juda, “Nanghomu iagho Tama ia la jafrahi ka puhi te diꞌa na ne jateula ngau thau vine neu ne thuru balugna kaisei mae, eghuteuna naꞌa gognaro na la buklahi eghu.” Mae Juda ne cheke faheta eghu fara, “Hata mei gaꞌase tuana mala koko lao ka khaꞌaghi mala lehe na.”

²⁵ Mare hatani Tama ne tei ka mae Juda baludi glepo teke tusu lao mana igre mala ke fapuphulo ka mana. Tama ne fatei cheke ka mae Juda, “Iara gne la buklahi ka mae ihei te khotodi glepo igre. Filo fakelidi glepo igre, kaisei medol te au nanghagna nei kaisei khodo eghu. Nogna ihei eghudi sagho glepo igrea?”

²⁶ Mae Juda ne filo glanidi glepo igre ne cheke eghu, “Gaꞌase igne theome jafra, iara nga te jafra na. Mae thugu iara Sela gne na tolaghi ka naꞌa. Naꞌa neke eni igne, naugna iara ne theome leghuni nogu nhaꞌa cheke na ne snakreni mae thugu Sela gne neke mala tolaghi ka naꞌa.” Eghuteuna funu ka narane igne mae Juda neke theome thuru balugna Tama.

²⁷ Kate thoke mei u narane te mala karha gna thugna Tama na, naiknore laseni Tama gne te phakri te au phei sua nalhaꞌu ka thi'agna na.

²⁸ Ka narane te karha sua na, khamegna keha sua na ne kulu mei. Eghuteuna thau te toghoni Tama kate karhagna sua na ne loku ka khamegna sua na ne haru ka koten ukru, ne cheke eghu, “Mae sua nalhaꞌu igne ne kulu jifla mei.”

²⁹ Nu reꞌe neke huta falamna khamegna mana na. Aonu keha mae sua nalhaꞌu na neke kulu jifla mei. Thau te toghoni Tama na ne cheke eghu, “Naugna unha ne roꞌeni nga iagho vike na ne kulu jifla mei?” Aonu mare ne kiloni mana Peres, mae sitei teke kulu jifla mei igne. Nangha igne gaoghathogna na “Mae ihei te kulu jifla mei.”

³⁰ Ke leghugna igne, mae sua nalhaꞌu te au koten ukru ka khamegna na ne karha mei. Mare ne kiloni mana Sera.