Jenesis 35 - Buka Blahi Ka Cheke Holo

Mae Jekop ne ke pulo Betel

¹ God ne cheke eghu ka mae Jekop, “Ghema Jekop, iagho ke pulo Betel mala eni kaisei olta jare mala tufru soru ghau iara. Iara ngala God mae ihei teke thakle ka iagho kani teke rikhani iagho mae tighamu Iso tifa ia.”

² Aonu mae Jekop ne cheke eghu ka khetogna nei thugna nei naikno eghu teke au balugna re, “Koko mumuju te tufru sorudi ghotilo are. Ghotilo apu mala gae nei pipichi pohe te majaghani eghu.

³ Tahati ginauna jifla kokoni namono igne mala ke pulo Betel. Iara ginauna na eni kaisei olta ka God. God mae ihei teke fakarhi ghau iara ka vido te ninhigrana nei au balugu ka vido aheva te tei iara na.”

⁴ Aonu mare ne hata ne mei nodi mumujure nei dedenge eghu teke hata ka keha kantri re ne tusu lao ka mae Jekop. Mana jifla ka namono na ne tei ne titifuni glepo igre ka pesigna gaju biꞌo na rhegna namono Sekem.

⁵ Ke leghugna igne mae Jekop nei nogna vike na ne jifla ne tei. Nu God ne famamhagudi mae te au ka namono rhegna Sekem igre mala theome tangomana mare te ngolhi leghudi re.

⁶ Mare mei ne posa Betel, nanghagna namono igne tifa na mare neke kiloi Lus, te au ka kantri Kenan.

⁷ Jare mae Jekop ne eni kaisei olta, ne kiloni vido igne El Betel. Gaoghathogna na “God gna Betel.” Naugna God neke thakle ka mana jare kani teke rikhani mana mae tighagna Iso tifa ia.

⁸ Aonu kaisei naikno biꞌo te kiloi Debora gne neke lehe jare ne giugilu mare ka pesigna gaju biꞌo na fei ke mata namono Betel. Aonu mare ne kiloni gaju biꞌo igne Alon Bacath, ba “Gaju diꞌanagnafa.” Debora gne neke reireghini Rebeka khetogna mae Isak gne kani suai teku naꞌa na.

⁹ Ke leghugna te jifla mae Jekop Mesopotemia teke pulo Kenan, God neke thaklei ka mana ne fablahini mana.

¹⁰ God ne cheke eghu ka mana, “Gognaro na nanghamu iagho na Jekop. Nu naiknore ginauna na theome kilo nigho iagho Jekop. Nu naiknore ginauna na kilo nigho iagho Israel.” Aonu God ne kiloni mana Israel.

¹¹ Eghuteuna God ne cheke eghu ka mana, “Iara God mae ihei te nolaghi fara. Iagho na au kmana thumu nate karha mei ke leghu ka vikemu iagho. Iagho ginauna mala ku'edi naikno ka namono te kmana gre nei hatimare mae king gre na jaola karha ka vikemu iagho.

¹² Tifa na iara neke tusu laohi namono igne ka mae Ebraham ghe mae Isak, eghuteuna gognaro iara na ke tusu ari ka iagho. Eghuteuna iara ginau nake jaola nake tusu lao namono igne ka thumu iagho re.”

¹³ Ke leghugna te cheke te gnafa ka mae Jekop na, God neke haghe kligna.

¹⁴ Jare ka vido tuana mae Jekop ne fakegra haghe kaisei thina brahu ne fafara. Mana fablahi thina igne ne tofa khoꞌu nei oel neu ke kligna gna.

¹⁵ Mae Jekop ne kiloni vido teke facheke God ka mana igne, Betel.

Resel ne lehe kate karha sua na

¹⁶ Mae Jekop balugna nogna vike na jifla Betel ne tei au ka namono Efrata. Kate khaba nga teu mare ka namono na Resel ne namo au sua ne funu kabru.

¹⁷ Kate karha sua te kabru ghegna fara Resel na, thau te mala toghoni naꞌa kate karha sua na ne cheke eghu ka naꞌa, “Resel, thosei mhaghu iagho kela au kaisei thumu nalhaꞌu!”

¹⁸ Nu kate fnuda te namo lehe na, Resel ne kiloni thugna nalhaꞌu na Benoni. Gaoghathogna na “Sua neke karha mei balu khabru biꞌo.” Kate fanangha te gnafa sua igne, Resel ne lehe. Nu ke leghu na mae Jekop neke kiloni mae sitei na mae Benjamin. Gaoghathogna na “Mae sitei igne ginauna au ka nakarha te keli.”

¹⁹ Agne ne lehe Resel. Aonu mare giugiluini naꞌa ka geri nabrou te tei posa Efrata, gognaro mare kiloni namono igne Betlehem.

²⁰ Ke kligna gna beku igne mae Jekop ne fakegra haghe kaisei thina te mala fagaglana gna aheva teke giugilui mare thinigna Resel na. Eghuteuna thina igne au ngala gognaro na.

²¹ Ke leghugna igne mae Jekop jifla jare ne tei Migdal Eda ne hohoro suga tapuale na jare.

²² Kate au teu mare ka namono igne mae Ruben tei ne thuru balugna Bilha fapea khetogna mae kmagna. Kate nomhini igne mae Jekop, keha nanghagna na mae Israel gne, mana ne diꞌatagna fara. Mae Jekop gne nabotho phei mae thugna.

Nanghadi thugna mae Jekop

²³ Namno mae teke karha ka Lea re igre, mae Ruben, mae Simion, mae Livae, mae Juda, mae Isak nei mae Sebulun.

²⁴ Phei mae teke karha ka Resel re neke mae Josep ghe mae Benjamin.

²⁵ Phei mae teke karha ka Bilha, nogna gaꞌase gloku Resel re neke mae Dan ghe mae Naftali.

²⁶ Phei mae teke karha ka Silpa, nogna gaꞌase gloku Lea re neke mae Gad ghe mae Asa. Mae igre neke karha ka mae Jekop kani au neku mana ka namono Mesopotemia.

Glehegna mae Isak

²⁷ Aonu mae Jekop mei ne posa Mamre ka namono te au teu mae Isak, mae kmagna na rhegna namono Kiriat Aba. Keha nanghagna namono igne Hebron, namonogna mae Ebraham kmagna mae Isak.

²⁸ Mae Isak ne kaisei gobi nhana salei finogha gna.

²⁹ Mana ne kuekuꞌe fara ne lehe. Eghuteuna mae Iso ghe mae Jekop, phei mae thugna re, ne giugiluni mana jare.