Jenesis 34 - Buka Blahi Ka Cheke Holo

Mae Sekem ne eni puhi te diꞌa na ka Daina

¹ Daina gne thudi gaꞌase mae Jekop ghe Lea. Kaisei narane Daina ne magnahaghei tei filodi goro gaꞌase gna namono Sekem.

² Aonu kate filoni Daina na mae Sekem ne mei lokini naꞌa, neuba naꞌa ne tirogna, mana hatani naꞌa ne tei ne eni puhi te diꞌa na ka naꞌa. Mae Sekem gne thugna nalhaꞌu mae Hamo vikegna mae Hivi, mae ihei te mae funei ka kantri Kenan.

³ Ke leghugna te eni puhi te diꞌa na, mae Sekem ne cheke famaemahe ka Daina.

⁴ Aonu mae Sekem ne cheke eghu ka mae kmagna na, “Mama, iara magnahaghei nigho iagho te hata gaꞌase igne mala khetogu iara.”

⁵ Mae Jekop ne nomhini mae Sekem te eni puhi te diꞌa na ka thugna gaꞌase na. Nu mana ne fakmuni eigna puhi igne, naugna hatimare mae thugna mana re la teihi te mala filodi sipure. Mae Jekop magnahaghei te ofo teu ke ghilei pulo mei mae thugnare ame cheke ranghini nga mae Sekem.

⁶ Nu mae Hamo kmagna mae Sekem na ne mei ka mae Jekop mala roghe ka mana eigna puhi igne.

⁷ Kate cheke teu phiamare na, hatimare mae thugna nalhaꞌu mae Jekop re neke pulo mei. Hatimare la nomhinihi u puhi te diꞌa te eni mae Sekem ka gregadi na igne ne thono diꞌatadi fara. Glepo te eni mae Sekem ka thugna gaꞌase mae Jekop na igne thono diꞌa fara ka tathadi mae Israel re.

⁸ Nu mae Hamo ne cheke eghu ka mae Jekop nei ka hatimare goro thugna nalhaꞌu mana re, “Mae Sekem, mae thugu nalhaꞌu iara gne, mana magnahagheni fara te tolaghi ka Daina gne. Eghume iara na ghusna ghami ghotilo eghu, e keliu ngala te tolaghi repa na ba theo?

⁹ Iara magnahaghei ghita tahati te kaisei fofodu ngala mala tolaghi lao mei eghu ngala, ghehati mala tolaghi ka gaꞌase ghotilo gre eghuteuna ghotilo mala tolaghi ka gaꞌase ghehati gre eghu.

¹⁰ Eghuteuna ghotilo ginauna na tangomana te au balumi ghehati ka kantri igne na eghu. Ghotilo ginauna na tangomana te au nomi ka vido aheva ghotilo te magnahaghei na. Eghuteuna ghotilo ginauna tangomana te edi keha nafnata puhi te mala dedei nomi nei reireghi fakelidi eghu nomi glepore.”

¹¹ Mae Sekem ne cheke eghu ka mae Jekop nei thabusigna teu Daina re, “Jame te uve teu ghotilo ka nogu thore iara igne na, iara ginauna na tusu ari ka ghotilo unha te toreni ghotilo na.

¹² Ghotilo tangomana te nhaꞌa haghe fofoli gna gaꞌase igne, eghuteuna iara magnahaghei ghami ghotilo te cheke meini ka iara unha glepo te keli te mala tusu ari iara ka ghotilo na eghu. Nihai teu ghotilo fofoli gna na gaꞌase igne na, iara na tusu ari ka ghotilo. Eghume iara magnahaghe ghami ghotilo te snakreni gaꞌase igne ka iara mala tolaghi nogu iara ka naꞌa.”

¹³ Hatimare mae thabusigna Daina gre ne thono diꞌa tadi fara ka mae Sekem eigna mana te eni puhi te diꞌa na ka gregadi na, ne cheke tughu chaichaghi ka mae Sekem ghe kmagna.

¹⁴ Hatimare mae thabusigna igre ne cheke eghu ka phia mare, “Ghehati theome magnahaghei te snakreni gregami na te mala tolaghi ka mae ihei te theome vahe na. Jame te snakreni ghehati gregami na te tolaghi ka mana na, ghehati ginauna na mamaja nomi fara.

¹⁵ Nu ghehati na tore ghami ghotilo mala kulu eni ghotilo kaisei glepo te ulu fara ka nomi kastom ghehati na. Ulu lahu na ghotilo na kulu vahe ghu goro mae nalhaꞌu te gnafa ka namono igne mala jateula ghehati eghu, ame tangomana nga ghehati te fa'uveni unha te toreni ghotilo gne eghu.

¹⁶ Te eni ghotilo igne na, ghehati ginauna na snakre ghami ghotilo mala tolaghi ka thumi gaꞌase ghehati gre eghuteuna ghehati jaola mala tolaghi ke thumi gaꞌase ghotilo are eghu. Eghuteuna ghehati ginauna na au balumi ghotilo mala kaisei vike ngala tahati eghu.

¹⁷ Te tiromi leghuni ghotilo u cheke igne te theome vahe na, ghehati ginauna na hata Daina gne mala jifla ka namono igne.”

¹⁸ Unha te chekeni mare igne ne thofno doglo fara ka mae Hamo ghe mae Sekem.

¹⁹ Aonu mae Sekem ne leghuni cheke mare igne ne ghosei ne tei vahe, naugna mana ne magnahagheni fara thugna gaꞌase mae Jekop na. Mae Sekem gne kaisei mae keli nei ghatho tahudi eghu vikegnare.

²⁰ Aonu mae Hamo ghe mae thugna Sekem, phia mare ne tei ka vido te mala faidu te au rhegna grengathagna namono na ne cheke eghu ka keha mae biꞌogna namono na.

²¹ Phiamare ne cheke eghu, “Mae igre mae keli fara, mare magnahaghei te au baluda tahati ka puhi fofodu te keli. Eghume tahati na snakredi mare mala au soru ke lamnagna noda vido glose igne mala loku mare agne. Naugna vido glose igne krepa fara naba te mala au mare nei tahati teuna. Eghuteuna tahati mala tolaghi ka sua gaꞌase mare igre eghuteuna mare mala jaola tolaghi ka sua gaꞌase tahati igre eghu ngala.

²² Nu tahati na kaisei gaoghatho ngala mala vahe mae nalhaꞌu gre jateula mare eghu. Eghuteuna jame te eghu tahati na mare ginauna na fa'uveni te mala au baluda tahati na eghu mala kaisei vike ngala tahati.

²³ Jame te eni tahati igne na, nodi sipu nei nodi buluka nei nodi keha glepo langau teu mare are ginauna na jaola noda tahati. Eghume tahati na eni ngala unha te chekeni mare igne mala au mare baluda.”

²⁴ Hatimare mae biꞌo gna namono igne teke tei fanomho ka nodi cheke mae Hamo ghe mae Sekem gre ka grengathagna namono na ne kaisei gaoghatho ngala. Aonu mae te gnafa ka namono na ne kafe vahe.

²⁵ Thilo narane ke leghugna teke vahe mae nalhaꞌu gre te kabru teu mare na. Phei thugna mae Jekop, nanghadire mae Simion ghe mae Livae, phei mae te thofno greghagna Daina igre hata naflahi ne megei nga ne tei ka namono na. Kate iho teu naiknore ne aknu falehe ne gnafa mae nalhaꞌu gna namono tuana.

²⁶ Leghu lahu na mae Simion ghe mae Livae tei ne aknu falehedi mae Hamo ghe mae Sekem. Aonu phia mare ne hata fajifla Daina ka sugagna mae Sekem na ne tei nodi.

²⁷ Kate aknu falehe te gnafa mae Simion ghe mae Livae mae nalhaꞌu gna namono na, keha thugna nalhaꞌu mae Jekop re ne tei ka namono na ne hata fateo glepo te keli gna namono na ne tei nodi. Igne ngala ke tughu fapulo gna mare u puhi te diꞌa teke eni mae Sekem ka gregadi na.

²⁸ Aonu mare ne jaola ne hata fateo sipu nei buluka nei dongki teu re. Mare jaola ne hata gobigna lepo te au ke lamnagna namono na ba ke kosigna namono na eghu.

²⁹ Mare ne hata glepo te ulu fara teke khotodi naiknore, balu goro gaꞌase nei goro sua nei glepo te gnafa teke au ke lamnadi sugare.

³⁰ Kate nomhini mae Jekop eigna puhi igne, mana ne cheke eghu ka mae Simion ghe mae Livae, “Ghotilo eꞌei puhi biꞌo ke kligna gu iara. Naikno te au faligoho ghita ka kantri Kenan nei Peres teu igre ginauna na tirodi ghita tahati. Tahati gne theome kmana. Jame te salo fodu mae igre te mei magri ghita na, mare igre ginauna na kafe falehe ghita tahati hui.”

³¹ Aonu phia mare ne cheke eghu, “Unha te eni ghehati igne glepo keli kolho naugna ghehati theome tangomana te snakre ni gregami na ka mana te mala jateula kaisei thau vine teuna.”