Jenesis 33 - Buka Blahi Ka Cheke Holo

Mae Jekop ne thafoni mae Iso

¹ Mae Jekop ne filoni mae Iso ne mei balugna fati gobi mae. Aonu mana ne tufa suare fari hoteidi Lea, Resel nei phei gaꞌase glokure.

² Mana ne lilisei phei gaꞌase glokure baludi thudire ului. Lea baludi thugnare ke leghu, eghuteuna Resel balugna mae Josep leghu lahu.

³ Mana thegna te tei ulu lahu ka jajagha na, eghuteuna kate tei te namo mana ka mae tighagna na, mana ne fitu fata pogho soru pari ka glose na ke ulugna mae Iso.

⁴ Nu mae Iso chari ne tei ne loku famaku ka khamegna mae Jekop na ne kubae ka mana, eghuteuna phia mare ne orio tanhi fabiꞌo.

⁵ Mae Iso ne filo teidi gaꞌase te balu thudi re ne cheke eghu, “Iheire te mei balumu iagho igre?” Mae Jekop ne cheke eghu, “God neke fablahi ghau iara nou mae gloku iagho gne ne tusu mei sua igre ka iara.”

⁶ Aonu phei gaꞌase gloku igre ne kafe mei baludi thudire ne orio turupuku soru pari ka glose na ne pogho soru ke ulugna mae Iso.

⁷ Lea jaola ne mei baludi thugnare ne pogho soru pari. Leghu lahu na mae Josep ghe Resel jaola ne mei ke ulugna mae Iso ne pogho soru pari.

⁸ Mae Iso ne cheke eghu, “Mala unha eghu sagho gaoghathodire glepo atha te mei iagho mae gloku, tothoghei nanigot, sipu, kamel, buluka nei dongki eghu te mei thafodi iara ka nabrou na igre ra?” Mae Jekop ne cheke eghu ka mana, “Nogu funei, glepo igre mala ke fakeli nagnafa ka iagho kolho.”

⁹ Nu mae Iso ne cheke eghu, “Thabusigna, iara la au nogu glepo kmana hi. Tathajiu sagho malamu themu.”

¹⁰ Aonu mae Jekop ne cheke eghu, “Theo! Thabusigna, te keli tamu iagho ka iara na, iagho hata glepo te tusu ari iara ka iagho are. Kate filodi iara tathamu nei foflomu teu iagho are, iara gne jateula te filodi eghu tathagna nei foflogna eghu God, naugna iagho ne keli tamu fara ka iara.

¹¹ Eghume iara gognaro na thofno tore nigho iagho te mala hata nogu namha iara te tusu ari ka iagho igre. Eigna God na neke fablahi ghau iara neke tusu ranghi ghau iara glepo kmana fara.” Eghuteuna naugna ka te cheke heta fara mae Jekop igne mae Iso ne hata u namha tuana.

¹² Gnafa teu na aome cheke eghu nga mae Iso, “Uve tahati gne na ari. Iara gne na ari balumi ghotilo.”

¹³ Nu mae Jekop ne cheke eghu ka mana, “Nogu funei, iagho lasedi goro sua igre theome nheta. Eghuteuna iara magnahaghei te famane taroridi nogu tothoghei sipu nei suadi te chuꞌu teu gre eghu. Jame te fanananga dire ginauna na tei lehe.

¹⁴ Uve nogu funei, iagho na kulu ulu, iara gne ginauna thoghei ari baludi glepo igre nei thugu igre eghu. Eghuteuna iara ginauna ari thafo nigho Idom.”

¹⁵ Aonu mae Iso ne cheke eghu, “Iara ginauna na lilisei faleghu balumu iagho keha nogu mae gloku mala hata ghami ghotilo ari.” Mae Jekop ne cheke eghu, “Mae funei, iagho thofno keli fara ranghi ghau iara. Nu nogu mae gloku iara gre nabau ngala te hata ghami ghehati te ari na.”

¹⁶ Aonu ka narane tuana mae Iso neke pulo Idom.

¹⁷ Nu mae Jekop neke tei Sakot. Jare mana ne hohoro kaisei suga tapuale malagna thegna, nei keha suga ikodi eghu maladi nogna buluka re, naugna igne mana ne kiloni namono igne Sakot. Nangha igne gaoghathogna na “grorofe” eghu.

¹⁸ Ke leghugna igne mae Jekop jifla Mesopotemia neke pulo ka kantri Kenan ka namono Sekem, ne hohoro nogna suga tapuale rhegna namono na.

¹⁹ Mana neke foli vido glose igne ka vikegna mae Hamo, kmagna mae Sekem. Foli gna vido glose igne neke kaisei gobi silva.

²⁰ Mae Jekop ne fakekegra kaisei olta ka vido igne ne kiloni olta igne “El Elohe Israel,” gaoghathogna na “God gna Israel.”