Jenesis 3 - Buka Blahi Ka Cheke Holo

Nogna huhughu naikno

¹ Lord God neke vuavuha gobigna lepo te gnafa te tautagu ka namhata na igre, eghuteuna jare na theo kaisei glepo ka teke vuavuha mana igre te lalase fara te uluni nogna glalase mogo na, ka puhi te cheke famaemahe na. Kaisei narane mogo na ne mei ghusna eghu ka gaꞌase na, “Ba, God gne neke lhoti ghami ghopa tutuani si te mala thosei ghamu ghopa kaisei sisi gna gaju te au ka nagare ignea?”

² Gaꞌase na ne cheke eghu ka mogo na, “Ghepa tangomana te ghamu sisidi gaju te gnafa ke lamnagna nagare igne.

³ Nu kaisei gaju te kegra farihotei gna nagare igne ngala God te lhotini ka ghepa te mala ghamu sisigna na. Eigna God neke cheke eghu ka ghepa, ‘Ghopa thosei ghamu sisi gna gaju igne, nei jaola thosei habo lao tagna eghu, na eghunu lehe ghopa eghu.’ ”

⁴ Nu mogo na ne cheke eghu ka gaꞌase na, “Theo, cheke God igne theome tutuani, ghopa ginauna na theome lehe.

⁵ Jame te ghamu ghopa sisi gna gaju igne na, tathami ghopa re ginauna na thofra fakeli, eghuteuna ghopa ginauna na laseni unha te keli na nei laseni unha te diꞌa na eghu, eghuteuna ghopa ginauna na lalase fara jateula God eghu. God na laseni igne, naugna igne mana lhotini ka ghopa te ghamu sisi gna gaju igne na.”

⁶ Kate filo laoni naꞌa gaju igne na, naꞌa ne keli tagna fara naugna gaju igne ne thofno keli fara fifilogna na, nei sisi gna re jaola keli fara te mala ghamu na. Aonu naꞌa ne cheke eghu ka nagnafa gna thegna na, “Uve, jame te imani iara sisi gna gaju igne na, iara gne jame kaisei naikno glalase fara.” Aonu naꞌa ne hata keha sisi ne ima. Eghuteuna naꞌa ne tusu lao keha ka mae Adam khetogna na. Mana ne jaola ne ima sisi gna gaju tuana.

⁷ Eghuteuna tathadi repa re ne funu thofra, aonu repa ne laseni te soesole na ne susuki fodu khakla gaju fig re ne pipichi.

⁸ Ka vido te riurifu fei grafi na repa ne nomhini Lord God te nonolo ka nagare na, aonu repa ne poru fari hoteidi gajure ke lamnagna nagare na.

⁹ Nu Lord God ne ehani mae Adam ne cheke eghu, “Adam, iagho au aheva?”

¹⁰ Mae Adam ne cheke eghu, “Iara ne nomhini nigho iagho te nonolo ka nagare igne ne mhaghu nogu nigho fara ne poru, naugna iara gne ne soesole.”

¹¹ Lord ne cheke eghu ka mana, “Naugna unha ne laseni nga iagho te soesole na? Mae ihei teke cheke ranghi nigho te mala soesole na? Neke ghamu jau sagho sisi gna gaju teke lhotini iara ka iagho ia?”

¹² Mae Adam ne cheke eghu, “Uve, gaꞌase mala kheragu iara teku iagho igne ngala teke tusu mei ka iara teke ghamu na.”

¹³ Aonu Lord God ne cheke eghu ka Ivi, “Ba, Ivi mala unha sagho te eni puhi ignea?” Naꞌa ne cheke eghu, “Mogo na neke cheke famaemahe ghau iara neke chaghi ghau iara mala ghamu iara sisi gna gaju na neku.”

¹⁴ Aonu Lord God ne cheke eghu ka mogo na, “Naugna igne, iara ginauna na tibri nigho fara ke tulaodi gobigna lepo te tautagu fateo igre. “Naiknore ginauna na susuku nigho fara ke tulaodi keha glepo te tautagu ka namhata na are. Iagho ginauna na agra ka thi'amu na. Eghuteuna iagho ginauna na ghamu gaughavu glose.

¹⁵ Iara ginauna na eni igne ka iagho mala nogna naoka gaꞌase igne, eghuteuna gaꞌase igne mala nou naoka iagho. Eghuteuna iara ginauna na jaola eni igne ka vikemu iagho re mala nogna naoka vikegna gaꞌase igne. Mare ginauna na tapla poaposa phaꞌumu iagho na, eghuteuna iagho ginauna nake figri faleghu nake kakathu ka ghahedire.”

¹⁶ Aonu God ne cheke eghu ka gaꞌase na, “Iagho ginauna na para nigho fara kate bukla na. Eghuteuna iagho ginauna na kabru gheu fara kate karha gna sua na. Neuba iagho ne au papara, iagho ginauna na magnahagheni fara khetomu na, eghuteuna mana ginauna na funei fruni nigho iagho.”

¹⁷ God ne cheke eghu ka mae Adam, “Naugna iagho ne fanomho ka khetomu na ne ghamu sisi gna gaju ia, gano te joꞌu iagho ka glose igne ginauna na theome raꞌe keli. “Karha nga teu iagho ka nauthoglu igne na, iagho na loku heta fara te mala au naba gano te ghamu na.

^18-19 Iagho ginauna na ghamu gano te karha ka namhata na are, nu gnarho te fachuchuru nei buburu te diꞌa teu gre ginauna na kotu haghe ka nou nagare iagho na. Iagho ginauna na loku heta fara eghuteuna buibuhi na jifla mei ka thinimu na eigna te mala au naba gano te ghamu na. Iagho ginauna na loku heta fabrahu ghilei lehe, eghuteuna mare ginauna na giugilu nigho ke lamnagna glose igne, naugna iara neke vuavuha nigho iagho ka glose.”

²⁰ Mae Adam ne kiloni khetogna na “Ivi” naugna naꞌa idodi naikno te gnafa te karha mei gognaro gre nei iheire nate karha mei nathuꞌu nauriha. Gaoghathogna “Ivi” teu ka cheke Hibru na, “Idodi naikno te gnafa te karha mei ka nauthoglu gne.”

²¹ Ke leghugna igne Lord God ne hohoro pohe ka khakla sipu maladi Adam ghe khetogna.

God ne brue fajifladi Adam ghe Ivi ka nagare Eden

²² Aonu Lord God ne cheke eghu, “Naikno gre la jateula tatilo lau sigre la lasenihi unha te keli na nei unha te diꞌa na eghu. Eghume gognaro na tatilo na theome snakredi repa mala tei namo ka gaju te tusu lao karha na ka naiknore. Na glahu ghamu repa sisi gna gaju igne nu karha fabrahu eghu.”

²³ Aonu Lord God ne brue fajifladi repa ka nagare Eden na mala loku repa ka glose teke vuavuhadi repa God na.

²⁴ Ke leghugna te kuru fajifladi ka nagare Eden, God ne lilisei kaisei tothoghei engel mala kegra ke maghati gna nagare Eden, nei lilisei kaisei naflahi khaꞌaghi te dudulu te figri tafri na. Mana neke eni igne mala theome tangomana repa te lao thoke ka gaju te mala tusu lao karha na ka naiknore.