Jenesis 29 - Buka Blahi Ka Cheke Holo

Mae Jekop ne tei posa Padan Aram

¹ Mae Jekop tei ne posa ka naikno te au ka namono ke maghati re.

² Mana kegra jare ne efra tafri ne filodi thilo bukrei sipu te thuru teu ka gerigna khoꞌu seu ka sare na, naugna sipu igre mei koꞌu koba ka khoꞌu seu igne. Eghuteuna foflogna khora igne fofotho ka kaisei thina biꞌo.

³ Kate khapru teu sipure ka gerigna seu igne, mare tangomana te pili fadelei thina biꞌo igne ka foflogna khora na te mala koꞌu sipure. Eghuteuna kate koꞌu te gnafa pili sipure ka seu igne na, mare neke fapulo thina biꞌo igne ka foflogna khora na.

⁴ Mae Jekop ne ghusna eghu ka mae greiregi sipu igre re, “Kheraguro, ghotilo mei funumi aheva?” Mare ne cheke eghu, “Ghehati gne mei funumi ka namono Haran.”

⁵ Aonu mae Jekop ne ghusna eghu ka mare, “Ghotilo laseni mae Laban gragna mae Naho na?” Mare ne cheke eghu, “Uve, ghehati laseni mana.”

⁶ Aonu mae Jekop ne ghusna eghu ka mare, “Ba, mae Laban na karha keli eghu ngau?” Mare ne cheke eghu ka mana, “Uve, mana na karha keli eghu ngala. Filo sagho, Resel, thugna gaꞌase mana na tela mei baludi nogna sipu mana re ana.”

⁷ Mae Jekop ne cheke eghu ka mare, “Tore, gognaro gne naublathau kolho, theome naba te mala hata fapulo ghotilo sipu gre ka bara na. Fakoꞌudi si ghotilo nu khudau mala ghamu ghedi buburu reꞌe eghu.”

⁸ Nu mare ne cheke eghu, “Ghehati theome tangomana te eni tuana la ghilei kafe mei la gnafa ngau sipu gre ame tangomana nga ghehati te pili fadelei thina biꞌo gne ka foflogna khora na eghu te mala fakokhoꞌu sipu gre.”

⁹ Kate cheke eghu teu mae Jekop baludi mae greiregi sipu gre, Resel gne ne posa mei baludi nogna sipu mae kmagna re, eigna naꞌa kaisei thau greiregi sipu la.

¹⁰ Kate filoni Resel thugna mae Laban, thabusigna idogna na te mei baludi nogna sipu mae kmagna re, mae Jekop thegna tei ka khoꞌu seu na ne pili fadelei thina na ne fakokhoꞌudi sipu re.

¹¹ Aonu mae Jekop ne gnanghoni Resel ne tanhi.

¹² Mana ne cheke eghu ka Resel, “Iara gne thugna Rebeka, greghagna mae kmamu iagho ia.” Kate nomhini Resel igne, naꞌa chari ne tei ne cheke ka mae kmagna.

¹³ Kate nomhini mae Laban u nonomho eigna mae Jekop, thugna greghagna na, mana chari ne tei ne thafoni mana. Mae Laban ne loku famaku ka mae Jekop ne kubae ka mana ne hatani mana ne tei ka sugagna na. Aonu mae Jekop ne toutonu ka mae Laban eidi gobigna lepo teke edi ka thegna re.

¹⁴ Mae Laban ne cheke eghu ka mana, “Tutuani fara, tapa gne kaisei dadara ngala.” Mae Jekop ne au balugna mana jare nabagna kaisei nhigra.

¹⁵ Mae Laban ne cheke eghu ka mae Jekop, “Iagho mae vikegu iara ngala, eghume jame theome raꞌe keli iagho jame te loku kolho ranghi ghau iara na. Eghume jame unha gne te magnahagheni iagho te mala taba nigho iara eigna nou gloku iagho na?”

¹⁶ Mae Laban au phei thugna gaꞌase, Lea ghe Resel.

¹⁷ Lea gne phei tathagnare e famane fara. Nu Resel gne famane gaꞌase fara uluni Lea.

¹⁸ Mae Jekop ne magnahagheni fara Resel, aonu mana ne cheke eghu ka mae Laban, “Iara ginauna na loku fitu finogha ranghi nigho iagho mala gna thumu gaꞌase majaghani iagho Resel gne.”

¹⁹ Mae Laban ne cheke eghu ka mana, “Keli fara. Iara na snakreni thugu na ka iagho, naugna iara theome snakreni thugu na te mala tolaghi ka keha vikei na. Iagho na au balugu iara.”

²⁰ Aonu mae Jekop ne loku ranghini mae Laban fitu finogha mala gna te tolaghi ka Resel na. Ka gaoghathogna mae Jekop na fitu finogha igre jateula te phei narane ra eghu kolho ka mana, naugna mana ne magnahagheni fara Resel.

²¹ Kate gnafadi fitu finogha igre mae Jekop ne cheke eghu ka mae Laban, “Arohila iara gnafadi re fitu finogha ra, fameila sagho khetogu iara na mala thuru la iara balugna.”

²² Aonu mae Laban theome hata Resel na ne tei ka mae Jekop, nu mana ne eni kaisei gaghamu biꞌo maladi naikno te gnafa ka namono na.

²³ Ka bongi tuana mae Laban ne hata Lea thau ke biꞌo na ne tei ka mae Jekop ne thuru fodu balugna mana.

²⁴ Eghuteuna mae Laban ne tusu lao kaisei nogna gaꞌase gloku Lea, nanghagna na Silpa.

²⁵ Kate dofra haghe hamerane te filoni Lea na mae Jekop ne tei ka mae Laban ne cheke eghu ka mana, “Unha puhi site eni iagho ranghi ghau iara ignea? Iara neke loku heta ka nou gloku iagho ra malagna Resel gne neku, eghuteuna iagho ne chaghi ghau iara neu.”

²⁶ Mae Laban ne cheke eghu ka mae Jekop, “Theome nomi kastom ghehati agne te kulu tolaghi gaꞌase ke iko na ame ke tolaghi nga gaꞌase ke biꞌo na teu na.

²⁷ Iagho ofou nabagna kaisei wik mala ghilei gnafa ghu u gaghamu tholaghi gne ame tangomana nga ghehati te jaola te snakre arini ka iagho Resel gne teuna. Eghume iagho ginauna nake loku fapulo keha fitu finogha.”

²⁸ Aonu mae Jekop ne leghuni cheke igne ne thuru balugna Lea u wik tuana. Ke leghugna igne mae Laban ne snakre laoni ka mae Jekop Resel na mala khetogna mana.

²⁹ Mae Laban jaola ne tusu lao kaisei nogna gaꞌase gloku Resel, nanghagna na Bilha.

³⁰ Aonu mae Jekop ne jaola ne thuru balugna Resel. Eghuteuna mae Jekop gne mana magnahagheni fara Resel, nu mana theome raꞌe magnahagheni Lea. Eghuteuna mae Jekop neke loku ranghini mae Laban keha fitu finogha.

Thugna mae Jekop

³¹ Lord ne filoni mae Jekop gne mana ne theome raꞌe magnahagheni Lea gne, aonu mana ne toghoni Lea, ne bukla. Nu Resel gne ne khara ne theo thugna kolho.

³² Gognaro na Lea ne au kaisei thugna nalhaꞌu. Eghuteuna Lea ne cheke eghu, “Lord la filonihi nogu diꞌanagnafa iara na. Eghume gognaro na khetogu iara gne ginauna nake magnahaghei ghau iara.” Aonu naꞌa ne kiloni nanghagna thugna ulu lahu na Ruben. Gaoghathogna nangha Ruben teu igne, “Lord ne filoni nogu diꞌanagnafa iara na.”

³³ Ke leghugna igne Lea neke bukla neke karha fapea thugna nalhaꞌu na. Eghuteuna naꞌa ne cheke eghu, “Lord kela tusu mei ka iara fapea thugu nalhaꞌu na, naugna mana la nomhinihi mae Jekop gne te theome magnahaghei ghau iara na.” Aonu naꞌa ne kiloni nanghagna thugna na Simion. Nangha Simion teu igne gaoghathogna na, “Mana ne nomhini” eghu.

³⁴ Eghuteuna Lea neke buklai neke karha keha thugna nalhaꞌu na. Naꞌa ne cheke eghu, “Gognaro na khetogu iara gne ginauna nake magnahaghei ghau iara nei nake au fakeli eghu balugu iara, naugna mana la auhi thilo thugna nalhaꞌu ka iara.” Naꞌa ne kiloni nanghagna fatilo thugna nalhaꞌu na Livae. Nangha Livae teu igne gaoghathogna na “Au fakeli” eghu.

³⁵ Lea neke buklai neke karha keha thugna nalhaꞌu na. Eghuteuna naꞌa ne cheke eghu, “Gognaro na iara ginauna na cheke fakelini nanghagna Lord na.” Aonu naꞌa ne kiloni nanghagna fafati thugna nalhaꞌu na Juda. Nangha Juda teu igne gaoghathogna na “Cheke fakelini” eghu. Aonu Lea ne gnafa jare ghu te au sua na.