Jenesis 28 - Buka Blahi Ka Cheke Holo

¹ Aonu mae Isak ne ehani mae Jekop ne fablahini mana. Mana ne cheke eghu faheta ka mae Jekop, “Thuguo, iagho mala thosei tolaghi ka kaisei gaꞌase gna agne Kenan. Theo.

² Iagho mala tei Mesopotemia ka namono gna ku'emu Betuel, kmagna idomu iagho gne. Iagho mala tei hata kaisei gaꞌase jare Mesopotemia ka thugna mae Laban, thabusigna idomu themu gne.

³ Iara toreni God mae ihei te nolaghi na mala fablahi nigho nei tusu ranghi nigho eghu kmana sua. Eghuteuna iagho ginauna mala kmadi kmana naikno.

⁴ God ginauna na fablahi nigho iagho nei vikemu iagho gre eghu mala jateula teke eni mana ka mae Ebraham tifa ia eghu. Eghuteuna ghotilo ginauna na tangomana te khotogna namono igne, naugna namono igne neke tusu laohi God ka mae Ebraham.”

⁵ Aonu mae Isak ne kuru teini mae Jekop ka mae Laban, thugna mae Betuel ka namono Mesopotemia. Mae Betuel gne kaisei mae ka vikegna mae Aram. Eghuteuna mae Laban gne neke thabusigna Rebeka, idodi mae Jekop ghe mae Iso.

⁶ Mae Iso gne ne nomhini mae Isak te toreni God te fablahini mae Jekop gne nei kuru teini mana mala tei tolaghi Mesopotemia teu na. Mana jaola ne nomhini mae kmagna na te toreni God te mala fablahini mae Jekop te mala thosei tolaghi mana ka gaꞌase di Kenan gre.

⁷ Mae Iso jaola ne laseni mae Jekop te nomhidi chekedi idogna kmagna gre te tei Mesopotemia na.

⁸ Mana laseni te mae kmadi na theome magnahaghei phei mae thugna gre te tolaghi ka gaꞌasedi agne Kenan gre.

⁹ Aonu mana ne tei ka sugagna mae Ismael thugna mae Ebraham na ne hata fatilo gaꞌase na, nanghagna na gaꞌase igne Mahalat, thugna gaꞌase mae Ismael, greghagna mae Nebaeot.

Nogna mifi mae Jekop

¹⁰ Mae Jekop jifla ka namono Bereseba ne tei Haran.

¹¹ Mana mei ne posa ka kaisei vido jare ne thuru, naugna naprai na la pluluhi. Mana ne filoni kaisei thina jare ne kokhogu ka phaꞌu na ne thuru.

¹² Kate thuru teu mana jare na, mana ne mifi ne filoni kaisei glalako funu pari posa kligna. Eghuteuna mana ne filodi nogna tothoghei engel God re ne haghe nei soru neu ka glalako igne.

¹³ Eghuteuna mae Jekop ne filoni Lord na kegra neu rhegna mana ne cheke eghu, “Iara Lord, nogna God mae kuꞌemu iagho Ebraham nei nogna God kmamu iagho Isak. Glose te thuru teu iagho igne iara ginauna tusu ari ka iagho nei ka vikemu iagho igre eghu.

¹⁴ Vikemu iagho igre ginauna na kmana fara jateula gaughavu glose eghu heva heva ke mosu ba ke maghati ba ke mata ba ke raru eghu ka nauthoglu igne. Eghuteuna naikno te gnafa ka nauthoglu igne ginauna na tore ghau iara mala fablahidi jateula te fablahidi iara vikemu iagho gre eghu.

¹⁵ Fanomho sagho. Iara ginauna na au fabrahu balumu iagho, nei reireghi fakeli nigho iagho eghu ka vido aheva na te tei iagho na. Eghuteuna iara ginauna nake hata fapulo nigho iagho agne ka glose igne. Iara ginauna na theome lisa koko nigho eigna iara ginauna eni unha teke nhaꞌa chekeni iara ka iagho tifa ia.”

¹⁶ Aonu mae Jekop ne dofra haghe ne cheke eghu, “Iara theome laseni te au teu Lord ka vido igne na! Tutuani fara, Lord na au ngala agne balugu iara.”

¹⁷ Mae Jekop ne mhaghu ne cheke eghu, “Iara mhaghu nogu ni fara vido igne. Naugna igne ngala thofno sugagna God na. Uve, igne ngala u grengathagna kligna na.”

¹⁸ Hamerane boibongi ka keha narane na mae Jekop ne hata thina teke kokhogu thegna na ne fakegra haghe ne fablahini nei tofa oel ke kligna gna neu mala ke ghatho fapuloni unha teke chekeni God ka mana na.

¹⁹ Mana ne kiloni vido igne Betel, gaoghathogna nangha igne sugagna God eghu. Tifa na mare neke kiloni namono igne Lus.

²⁰ Eghuteuna mae Jekop ne nhaꞌa cheke eghu ka God, “Jame te au iagho balugu iara, nei reireghi ghau iara teu ka nabrou te brahu te magnahaghei tei iara igne, iagho tusu ranghi ghau iara gano nei pohe,

²¹ nei ke hata fafigri ghau iara ka pharikeli ka sugagna mae kmagu na teuna, iara ginauna na pogho soru nigho iagho fabrahu.

²² Thina te fakegra haghe iara igne mala sugamu iagho. Eghuteuna glepo teke tusu mei iagho ka iara igre, iara ginauna na edi nabotho bukrei, eghuteuna kaisei bukrei na iara nake tusu ari ka iagho.”