Jenesis 23 - Buka Blahi Ka Cheke Holo

Glehegna Sera

¹ Sera gne neke kaisei gobi varadaki fitu finogha gna neke lehe nga.

² Naꞌa neke lehe ka kantri Kenan ka namono Kiriat Araba, fapea nanghagna na Hebron. Mae Ebraham ne thofno au diꞌanagnafa ne tanhi ni Sera.

³ Ke leghugna igne mae Ebraham kegra haghe rhegna thinigna Sera na ne tei cheke eghu ka vikegna mae Hit gre,

⁴ “Ghotilo lase ghauhi iara, naugna iara gne maegu ka keha kantri delei mei au kolho agne fari hoteimi ghotilo. Khetogu gne la lehehi, eghuteuna iara gognaro na magnahaghei te foli kaisei gluma ka ghotilo agne mala giugilui thinigna khetogu gne.”

⁵ Hatimare ne cheke eghu ka mana,

⁶ “Mae biꞌo, iagho kaisei mae biꞌo mala baubatu ka ghehati agne. Iagho tangomana te filoni kaisei gluma te keli ka ghehati agne mala giugilu thinigna khetomu na. Iagho tangomana te vahini kaisei gluma aheva te magnahagheni iagho na, eghuteuna mae khotogna gluma igne na ginauna na snakreni ka iagho mala giugilu iagho khetomu na.”

⁷ Aonu mae Ebraham ne pogho soru pari ke uludi mare,

^8-9 ne cheke eghu, “Te keliu ngala te giugilui iara agne khetogu na teu ghotilo na, iara magnahaghei ghami ghotilo te toreni Efron thugna mae Soha gne te mala snakre meini mana ka iara gluma Makipela gne eghu. Eigna gluma igne au ka nogna vido glose mana. Ghotilo cheke ka mana mala snakre meini mana ka iara gluma tuana, eghuteuna iara ginauna na foli ka mana gluma tuana ke ulumi ghotilo, eghuteuna gluma tuana ginauna na mala nogu iara.”

¹⁰ Mae Efron vikegna mae Hit gne mana gnokro neu fari hoteidi vikegna re ka grengathagna namono na. Mare au neu jare ne nomhini mae Efron gne te cheke eghu ka mae Ebraham,

¹¹ “Mae biꞌo, fanomho ka nogu cheke iara gne, iagho theome tangomana te foli u gluma igne. Iara ginauna na snakreni kolho ka iagho, balugna vido glose te au gluma igne. Ke uludi vikegu iara igre, iara gognaro na snakreni glose igne ka iagho mala giugilui iagho khetomu na.”

¹² Aonu mae Ebraham ne pogho soru pari,

¹³ ne cheke eghu ka mae Efron ke uludi naikno te gnafa te au ka namono igne, “Ghema Efron, iara magnahaghei nigho iagho te fanomho ka nogu cheke iara gne. Iara ginauna na foli nou vido glose iagho gne. Eghuteuna jame te doglo ka gaoghathomu iagho na, iagho hata nogu sileni iara gre mala tangomana iara te giugilui khetogu na ka glose igne na.”

¹⁴ Mae Efron ne cheke eghu ka mae Ebraham,

¹⁵ “Mae biꞌo, fofoli gna glose igne thono biꞌo fara, naba varadaki silva. Eghume ka noda namha biꞌo te au fari hoteida tapa na, glepo igne theo nafugna kolho. Hata kolho sagho glose igne mala giugilui khetomu na.”

¹⁶ Mae Ebraham ne faꞌuveni cheke igne ne atha fajifla varadaki silva ke uludi hatimare mae Hit gre ne tusu lao ka mae Efron fofoli gna u glose igne.

^17-18 Ka puhi igne mae Ebraham ne foli ne khotogna glose igne, nogna gluma thina nei nogna gaju teu mae Efron te au ke maghati Mamre ka namono Makipela. Mae Ebraham neke eni fofoli igne ka grengathagna namono na ke uludi hatimare mae Hit.

¹⁹ Ke leghugna igne, mae Ebraham ne giugilui khetogna na ka sare Makipela ka gluma thina na, ke maghati namono Mamre jare ka kantri Kenan. Keha nanghagna na namono Mamre gne, Hebron.

²⁰ Mae Ebraham neke foli vido glose nei gluma teu igre ka hatimare mae Hit. Eghuteuna gognaro na kela nodi vido glose mala giugiluihi vikegna mae Ebraham gre.