Jenesis 22 - Buka Blahi Ka Cheke Holo

God neke fariuriuni mae Ebraham

¹ Ke leghugna igne God neke fariuriuni mae Ebraham. Kaisei narane God kiloni mae Ebraham ne cheke eghu ka mana, “Ebraham.” Mae Ebraham ne cheke eghu, “Iara au teu ao Lord.”

² Aonu God ne cheke eghu ka mana, “Iagho au kaisei mae thumu nalhaꞌu kolho, mae Isak, mae ihei iagho te namhani fara, hata mae sitei igne tei ka nohi Moriah. Iara ginauna na falalase ka iagho kaisei thogele jare. Ka thogele igne te mala falelehe iagho mae thumu Isak gne te mala gahu re mala fafara ka iara na.”

³ Hamerane boibongi mae Ebraham kegra haghe ne tarabana nogna dongki na, aonu mana ne hata mae Isak nei phei mae gloku eghu balugna. Mana ne uge keha gaju te mala gahugna u fafara na, eghuteuna hatimare ne tei ka vido aheva teke chekeni God ka mae Ebraham na.

⁴ Ka fatilo narane na mae Ebraham ne filo fakhaba laoni namono te mala tei mare na.

⁵ Mana ne cheke eghu ka phei nogna mae glokure, “Ghopa au agne balugna dongki gne. Iara gne ginauna na tei balugna mae sitei gne mala tarai. Eghuteuna ke leghugna igne ghepa ginauna nake pulo mei ka ghopa.”

⁶ Mae Ebraham ne hata gaju te mala fafara gre ne fapala lao ka mae thugna na. Eghuteuna mae Ebraham ne hata naflahi na balu khaꞌaghi. Aonu phia mare ne kaisei thei ne tei.

⁷ Kate tei teu phia mare na mae Isak ne cheke eghu, “Mama!” Mae Ebraham ne cheke eghu, “Unha sia thuguo?” Mae Isak ne ghusna eghu, “Mama, khaꞌaghi nei gaju teu igre nu aheva gne si lam gna na gnea te mala fafara na?”

⁸ Mae Ebraham ne cheke eghu, “Thuguo, God ginauna na tusu ranghi ghita u lam te mala fafara na.” Aonu phia mare ne kaisei thei ne tei.

⁹ Kate posa lao phia mare ka vido aheva teke chekeni God na, jare mae Ebraham ne titili ka thina kaisei olta ne lilisei gaju ke kligna gna. Mana ne haru phei khamegna mae Isak re ka gnarho ne fathuru lao ke klignadi gajure ka olta na.

¹⁰ Aonu mae Ebraham hata naflahi na ne mala faleheni mae Isak.

¹¹ Nu engel nogna Lord na au neu kligna ne eha eghu ka mana, “Ebraham! Ebraham!” Mae Ebraham ne cheke eghu, “Iara au teu ao Lord.”

¹² Engel na ne cheke eghu, “Thosei faleheni mae thumu na, ba eni kaisei glepo ka mana. Iagho kaisei mae thumu kolho, eghuteuna iagho neke theome lhotini mae thumu na ka God. Thono theo fara. Iagho neke tarabana neke snakreni ka God. Eghume gognaro na iara lase nigho iagho kaisei mae te ghatho branani God.”

¹³ Aonu mae Ebraham ne filo tafri ne filoni kaisei sipu nalhaꞌu gna te khale teu hona gnana ka gaju ikoi na. Aonu mae Ebraham tei ne hata sipu igne ne falelehe ne gahu ne fafara tongana ka God. Eghume u sipu igne ne lehe tughuni mae Isak.

¹⁴ Aonu mae Ebraham ne kiloni vido igne, “Lord ginauna na tusu mei ranghi ghita.” Eghuteuna gognaro ba gne tahati tangomana te kafe cheke eghu na, “Ke kligna gna thogele na Lord ginauna na tusu mei ranghi ghita unha te magnahagheni tahati na.”

¹⁵ Nogna engel Lord na ne fapea ehani mae Ebraham ne cheke eghu,

¹⁶ “Lord na ne cheke eghu, ‘Iara ginauna na nhaꞌa cheke ka nanghagu thegu na, naugna iagho ne theome lhotini mae thofno thumu na ka iara, iara ginauna fablahi nigho iagho.

¹⁷ Tutuani fara, iara ginauna na fablahi nigho iagho nei tusu ranghi nigho kmana vikemu eghu. Mare ginauna kmana fara jateula nathunu ka maloa na are eghu ba na jateula nusu ka glilihi na are eghu. Eghuteuna vikemu iagho gre ginauna tapla faparidi nodi naoka re nei hata nodi namono re eghu.

¹⁸ Naikno te gnafa ka nauthoglu igne mare ginauna na tore ghau iara mala fablahidi jateula teke eni iara ka vikemu iagho ra eghu. Naugna iagho ne ghatho tahu ghau nei leghuni neu nogu cheke iara na.’ ”

¹⁹ Aonu mae Ebraham ghe mae thugna Isak, phiamare neke pulo ka phei nogna mae glokure neke kafe pulo Bereseba, eghuteuna mae Ebraham ne au fabrahu jare Bereseba.

²⁰ Ke leghudi igre, keha naikno ne mei cheke eghu ka mae Ebraham, “Milka na la au keha thugna nalhaꞌu.” Milka gne neke khetogna mae Neho, eghuteuna mae Neho gne neke thubusigna mae Ebraham.

^21-22 Igre nanghadire, mae teke kulu karha re mae Us, eghuteuna mae thabusigna mana re, mae Bus, mae Kemuel, mae Kemuel gne mae kmagna mae Aram, mae Kesed, mae Haso, mae Pildas, mae Jitlap nei mae Betuel.

²³ Mae Betuel gne neke kmagna Rebeka. Nhana mae igre neke karha ka Milka ghe mae Neho.

²⁴ Mae Neho gne jaola neke au fati mae thugna nalhaꞌu ka Reuma. Reuma gne neke fapea khetogna mae Neho. Mae igre teke karha ka Reuma re: mae Teba, mae Gaham, mae Tahas nei mae Maka.