Jenesis 21 - Buka Blahi Ka Cheke Holo

Karhagna mae Isak

¹ Lord ne fablahini Sera jateula teke chekeni mana na neu.

² Eghuteuna kate kueku'ehi mae Ebraham na, Sera bukla ne karha kaisei thugna nalhaꞌu. Sera ne karha sua ka thofno narane teke nhaꞌa cheke Lord na.

³ Mae Ebraham ne kiloni nanghagna mae thugna na Isak.

⁴ Nhana narane ke leghugna teke karha mae thugna na, mae Ebraham ne leghuni chekegna God na ne tohi fagaglanani mana.

⁵ Ka narane te karha mae Isak na, mae Ebraham gne la kaisei gobi finogha gnahi.

⁶ Eghuteuna Sera ne cheke eghu, “Ka narane teke fablahi ghau iara God na, iara neke glealeꞌa fara neke maꞌe. Eghuteuna iheire te gnafa teke nomhini igne na mare ginauna na jaola ne glealeꞌa fara na maꞌe balugu iara.

⁷ Theo kaisei naikno teke ghathoni karha sua iara ka Ebraham teku na. Nu iara gne la auhi kaisei thugu kate kueku'ehi Ebraham na!”

Hega ghe Ismael ne jifla ne tei

⁸ Ka thofno narane te lisa chuꞌu mae Isak na, mae Ebraham ne eni kaisei gaghamu biꞌo.

⁹ Nu tifa na Hega, gaꞌase gna Ijep gne, neke karha kaisei thugna nalhaꞌu ka mae Ebraham. Kaisei narane Sera ne filoni mae sitei thugna Hega igne ne maꞌeni mae Isak.

¹⁰ Aonu Sera ne cheke eghu ka mae Ebraham, “Kuru teini delei thau sneka igne balugna thugna na. Eigna kate lehe tapa na, Ismael thugna thau sneka igne theome nabagna teke hata nou glepo iagho gre. Glepo igre mala ke nogna thugu iara Isak.”

¹¹ Mae Ebraham ne diꞌanagnafagna fara ka cheke te edi Sera igre, naugna mae Ismael gne jaola neke thugna mana.

¹² Nu God ne cheke eghu ka mae Ebraham, “Thosei diꞌanagnafamu eidi Hega ghe thugna gre. Leghuni kolho sagho chekegna Sera na. Vike teke nhaꞌa chekeni iara ka iagho igne ginauna mei funu ka mae Isak.

¹³ Eghuteuna vikegna mae Ismael thugna thau sneka igne ginauna na jaola kaisei vike biꞌo fara naugna God ginauna toghoni mana te mala eni igne na. Mana neke thumu la iagho.”

¹⁴ Hamerane boibongi ka keha narane na, mae Ebraham ne hata keha gano nei keha khoꞌu eghu ne lao ka Hega ne kuru jiflani balugna thugna na ne nolo tafri ke lamnagna namono nagou Bereseba.

¹⁵ Hega ghe thugna nolo tafri ka namono nagou na ne ghilei peso khoꞌu na. Hega ne fagnokro soru mae sitei na ke parigna kaisei gaju ikoi na.

¹⁶ Aonu naꞌa ne tei fakhaba katha vido ikoi jame nabagna kaisei gobi mita ne gnokro soru pari, ne cheke eghu ka gaoghathogna na, “Iara theome magnahaghei te filoni glehegna thugu na.” Aonu naꞌa gnokro neu jare ne funu tanhi.

¹⁷ God ne nomhini te tanhi mae sitei na, eghuteuna nogna engel God na au neu kligna ne cheke eghu ka Hega, “Unha site diꞌanagnafani iagho gnea, Hega? Thosei mhaghu. God na la nomhinihi te tanhi teu jare mae sitei na.

¹⁸ Tei sagho togho hagheni nei faloku khameni eghu mae sitei na. Iara ginauna eni vikegna mae sitei igne mala kaisei vike biꞌo fara.”

¹⁹ Aonu God ne falalase ka Hega kaisei khoꞌu seu. Naꞌa tei ne toho fafodu duku guli na ka khoꞌu ne fakoꞌuni thugna na.

²⁰ Kate biꞌo haghe mana na God ne toghoni mae sitei na. Mae Ismael au ka namono nagou ne kaisei mae lase fada jata fara.

²¹ Kate au teu mana ka namono nagou Paran gne, idogna mana na ne tei hata kaisei khetogna mana ka namono Ijep.

Mae Ebraham neke nhaꞌa cheke ka mae Abimelek

²² Ka narane igne mae Abimelek ghe mae Fikol nogna mae ofisa biꞌo lahu mana ka nogna armi na, phia mare ne tei ka mae Ebraham ne cheke eghu, “God na au balumu iagho fabrahu ka gobigna lepo te edi iagho gre.

²³ Eghume iagho mala nhaꞌa cheke ke ulugna God te mala thosei chaghi ghau iara ginauna ba thugu iara gre, ba gragu iara gre. Iagho mala lolokeli ghau iara nei iheire la ngau eghu te au ka kantri te mei au teu iagho igne, jateula teke eni iara ka iagho tifa ia eghu.”

²⁴ Mae Ebraham ne cheke eghu, “Uve, te chekeni iara ke ulugna God na, iara ginauna na lolokeli nigho iagho.”

²⁵ Mae Ebraham ne cheke eghu ka mae Abimelek eigna kaisei khoꞌu seu na la hatahi nogna mae gloku mana re, eghuteuna mare theome snakreni ka nogna mae gloku mae Ebraham gre te lao hata khoꞌu jare gognaro na.

²⁶ Nu mae Abimelek ne cheke eghu, “Iara theome laseni mae ihei teke eni igne. Naugna iagho neke theome chekeni igne ka iara tifeiro na. Gognaro gne ngala te nomhini iara cheke igne ka iagho na.”

²⁷ Aonu mae Ebraham ne hata keha sipu nei buluka eghu ne tusu lao ka mae Abimelek, aonu phiamare ne eni kaisei nhaꞌa cheke.

²⁸ Mae Ebraham jaola ne vavahi fitu lam gaꞌasedi ka nogna tothoghei sipu thegna na ne lilisei ke ulugna mae Abimelek.

²⁹ Mae Abimelek ne ghusna eghu ka mae Ebraham, “Unha eghu iagho gaoghatho gna na te vavahi fadelei fitu lam gaꞌasedi igre?”

³⁰ Mae Ebraham ne cheke eghu, “Hata sagho ka iara fitu lam igre. Ka puhi igne iara magnahaghei nigho iagho te ghatho fakelini nei cheke fadoglo ranghidi eghu ka naiknore ke leghu na nei cheke ranghidi eigna khoꞌu seu igne iara ngala teke dokhagna na me khoꞌu igne nogu iara eghu.”

³¹ Aonu mare ne kiloni namono igne Bereseba. Bereseba teu igne, gaoghathogna na, “Khoꞌu seu aheva teke nhaꞌa cheke mare na eghu.” Naugna mae Ebraham neke nhaꞌa cheke ka mae Abimelek jare.

³² Ke leghugna teke eni nhaꞌa cheke igne jare Bereseba na, mae Abimelek ghe Fikol neke pulo Filistia.

³³ Mae Ebraham ne joꞌu kaisei gaju tamarik jare Bereseba. Jare mae Ebraham ne tarai ka Lord, mae ihei te karha fabrahu te tifa te tifa.

³⁴ Mae Ebraham ne au fabrahu jare ka namono Filistia.