Jenesis 17 - Buka Blahi Ka Cheke Holo

Mae Ebram ne hata kaisei nangha majaghani

¹ Kate nheva salei nheva finogha gnahi mae Ebram na, Lord ne thakle ka mana ne cheke eghu, “Iara God te nolaghi fara. Iagho mala leghu ghau iara fabrahu, nei eni unha te doglo ka tathagu iara na eghu.

² Iara ginauna na eni unha teke kulu nhaꞌa chekenihi iara ka iagho tifeiro ia. Thumu iagho re ginauna kmana fara.”

³ Mae Ebram ne pogho soru pari, eghuteuna God ne cheke eghu ka mana,

⁴ “Iara na chekeni ka iagho unha nate eni iara ranghi nigho iagho na. Iagho ginauna mala kmadi naikno kmana.

⁵ Gognaro na naiknore kilo nigho iagho mae Ebram, nu funu gognaro te haghe na naiknore ginauna na kilo nigho iagho mae Ebraham, naugna iara neke vahi nigho mala kmadi naikno kmana.” U gaoghathogna “mae Ebraham” teu igne, “Kmadi naikno kmana” eghu ka cheke Hibru na.

⁶ God jaola ne cheke eghu, “Iara ginauna tusu ranghi nigho iagho kmana vike, eghuteuna keha mae ka vike igre ginauna mala mae king.

⁷ Iara ginauna na farerheta nogu nhaꞌa cheke na ka iagho nei ka thumu iagho nate mei ke leghumu iagho re eghu fabrahu tifa e tifa. Iara ginauna mala nou God iagho nei jaola mala nodi God thumu iagho re eghu.

⁸ Namono Kenan te au teu iagho gognaro igne nodi namono keha vikei. Nu iara ginauna na tusu ari ka iagho nei ka thumu iagho nate karha mei ke leghumu iagho re eghu namono igne, eghuteuna namono igne ginauna na nomi ghotilo fabrahu tifa e tifa. Eghuteuna iara ginauna mala nodi God thumu iagho re ngala.”

God neke cheke ka mae Ebraham mala tohi fagaglana

⁹ God neke cheke eghu ka mae Ebraham, “Iara la cheke arihi ka iagho unha nate eni iara na. Iagho themu ngala nei thumu iagho nate karha mei ka finogha ke leghumu iagho re eghu mala tathaji fakelini u nogu nhaꞌa cheke iara teke eni iara balumu iagho ia.

^10-13 Igne unha nate eni iagho te mala laseni iara te thofno leghuni iagho nogu cheke iara na. Iagho nei thumure eghu mala tohi fagaglana, eghuteuna ghotilo mala kafe tohi fagaglana goro mae nalhaꞌu te au balumi re. Funu gognaro te haghe na ghotilo mala kafe tohi fagaglana goro mae sua nalhaꞌu tela kaisei wikidi hire. Ghotilo mala jaola kafe tohi fagaglana mae nomi sneka re nei mae thudi re eghu. Eghuteuna u fagaglana igne ginauna na au fabrahu ka gulimi ghotilo re mala theome ghatho ihoni ghotilo nogu nhaꞌa cheke iara na.

¹⁴ Mae ihei te theome tohi fagaglana na, mae tuana theome nogu iara, naugna mana ne huhughuni nogu nhaꞌa cheke iara na.”

¹⁵ God jaola ne cheke eghu ka mae Ebraham, “Iara ginauna nake tuthughu nanghagna khetomu iagho Sarai gne. Nanghagna naꞌa gognaro na Sera, gaoghathogna Sera teu igne ‘Thugna gaꞌase mae king’ eghuni.

¹⁶ Iara ginauna na fablahini Sera nei tusu ranghini naꞌa kaisei mae thugna eghuteuna iagho ginauna mala kmagna mana. Sera ginauna mala idodi naikno te kmana re, eghuteuna kehare ginauna mala mae king.”

¹⁷ Mae Ebraham ne pogho soru pari ne maꞌe. Mana ne jaglo nogna ne cheke eghu ka thegna, “Tore, jateula iara mae tela kaisei gobi finoghagu hi gne eghu site mala ke au sua na ia? Eghuteuna Sera gne teuna la nheva salei finogha gnahi gognaro na la theome tangomanahi te au sua na.”

¹⁸ Aonu mae Ebraham ne cheke eghu ka God, “God, iara magnahaghei nigho iagho te fiofiloni mae Ismael mala ari horoghoto ka nou nhaꞌa cheke iagho na!”

¹⁹ Nu God ne cheke eghu ka mae Ebraham, “Theo, iara theome vahini mae Ismael. Nu khetomu iagho Sera gne ginauna au kaisei thugna nalhaꞌu, eghuteuna iagho mala kiloni nanghagna na Isak, gaoghathogna mae Isak teu igne ‘maꞌe’ eghu. Iara ginauna na eni nogu nhaꞌa cheke na balugna mana nei thugna mana re eghu, eghuteuna nhaꞌa cheke igne ginauna au fabrahu tifa e tifa.

²⁰ Iagho neke tore ghau iara mala fablahini mae Ismael. Uve, iara neke nomhinihi nou cheke iagho na. Iara ginauna na fablahini mana nei na tusu ranghini mana kmana sua eghu mala biꞌo vikegna mana na. Mana ginauna na kmadi nabotho phei mae king.

²¹ Nu iara ginauna na eni nogu nhaꞌa cheke na ka mae Isak thugna Sera nate karha mei ka finogha te fufunu gognaro gne.”

²² Kate cheke te gnafa balugna mae Ebraham na, God ne jifla ne tei kokoni mana.

²³ Funu ka narane igne mae Ebraham leghuni chekegna God na ne salo fodudi goro thugna mae Ismael, nei nogna mae sneka te gnafa teke foli mae Ebraham ka keha naiknore, eghu balugna mae Ismael nei mae te gnafa teke karha mei ka sugagna thegna mae Ebraham teure ne kafe tohi fagaglana.

^24-25 Mae Ebraham gne neke nheva salei finogha gnahi, eghuteuna mae Ismael neke nabotho thilo finogha gnahi neke tohi fagaglana nga.

^26-27 Phia mare nei mae nalhaꞌu te gnafa re eghu ne kafe tohi fagaglana ka thofno narane teke chekeni God ka mae Ebraham eigna u nhaꞌa cheke igne.