Jemes 5 - Buka Blahi Ka Cheke Holo

Naikno te dedei ra thosei ghatho ihoni igne

¹ Fanomho fakeli ghotilo naikno te dedei ra. Gognaro na ghotilo tanhi nei diꞌanagnafa eghu naugna God ginauna na fate ghami ghotilo eidi glepo diꞌa te eidi ghotilo are.

^2-3 Narane God te mala fate ghami ghotilo na la namohi. Igre hila narane leghu lahure, eghuteuna ghotilo heta ghemi fara ka salo fodu sileni malami themi na. Nu nomi dedei ghotilo tuare ginauna na boto. Eghuteuna nomi famane pohe ghotilo tuare ginauna na ghamu khokorosi, nei nomi sileni ghotilo are ginauna na kukuku theo nafudi. Igne tutuani fara, naugna ghotilo ne theome toghodi keha naiknore. Te kukuku nomi sileni ghotilo igre ngala fagaglana gne te khiri ghotilo na. Eghuteuna God ginauna na fate ghami ghotilo naugna ghotilo ne khiri fara.

⁴ Fanomho mei ka iara ghotilo ia! Igne keha fagaglana eigna puhi te salo fodu sileni ghotilo malami themi kolho na. Ghotilo chaghidi nei theome tabadi eghu kolho nomi mae glokure. Eghuteuna God mae ihei te nolaghi na ngala te nomhidi nodi natanhi nei diꞌanagnafa teu nomi mae gloku ghotilo re.

⁵ Mare tanhi nei diꞌanagnafa naugna ghotilo ne theome tabadi mare. Nu ghotilo theome tanhi nei diꞌanagnafa eghu naugna ghotilo dedei fara nei ludeni unha te magnahagheni themi na. Nu ghotilo jateula kaisei buluka biꞌo te mala tarabana te mala falelehe te ghamu ia eghu. Buluka na gleale'a fara leuleghu narane, eghuteuna theome laseni narane mala lehegna na. Ghotilo jateula tuana eghu theome laseni narane God nate fate ghami ghotilo na.

⁶ Eghuteuna ghotilo fate fadiꞌadi naikno te theome eni kaisei najafra gre. Nu neuba ngau mare theome tangomana te magra fapulo na. Eghuteuna ghotilo jaola falehedi mare.

Au kmu ofou

⁷ Kheraguro, thosei babaꞌo, ghotilo au kmu ofou ke ghilei pulo mei noda Lord. Ghathoni si ghotilo mae te loku ka nagare ia. Kate joꞌu te gnafa nagare na, mana na ofoni meigna nakhete na mala kotu ganore.

⁸ Eghume, jateula tuana eghu ghotilo au kmu ofou. Thosei nanga nomi naugna noda Lord na kela namo pulo meihi.

⁹ Kheraguro, thosei khuru cheke fari themi naugna na eghunu fate ghami God eghu. Naugna u narane te mala ke pulo mei mana te fatedi naikno te gnafare la thono namo hi.

¹⁰ Ke ghathodi si ghotilo hatimare mae profet teke chekeni chekegna God na tifa ra. Neubane naiknore ne edi kmana nafnata puhi te diꞌa ka mare, mare kegra heta ka nodi fatutuani na.

¹¹ Eghuteuna te ghathoni tahati te chekeni na mare thono keli tadi fara naugna mare kegra heta fabrahu ne ghilei thoke ka narane leghu lahu na. Eghuteuna ghotilo neke nomhi nila eigna mae Job ia. Kmana nafnata puhi biꞌo thokeni mana, nu mana biꞌo nogna fatutuani na ka God. Eghuteuna ke leghudi puhi igre Lord neke toghoni mana neke tusu ranghini mana gobigna lepo te keli teke magnahaghedi mana re. Naugna Lord na kafe namha ghita nei kokhoni ghita nei magnahaghei toghodi eghu nogna naikno te gnafare.

¹² Kheraguro, kaisei glepo biꞌo te mala laseni ghotilo na igne. Ne nhaꞌa cheke nganu, ghotilo thosei baubahu lao ka kaisei glepo kligna ba pari ba unha langau. Chekeni ngala, “Uve, tutuani fara” ba chekeni ngala, “Theo, theome tutuani.” Te theome eni ghotilo igne na, God ginauna na fate ghami ghotilo.

Tarai balu fatutuani

¹³ Jame kaisei ka ghotilo au puhi biꞌo, mana tarai ka God. Eghuteuna jame kaisei ka ghotilo au gleale'a, mana koje kilo fnaknoni God.

¹⁴ Jame kaisei ka ghotilo fogra biꞌo fara, mana kilo fodudi mae biꞌo ka khiloau are mala taofini ka oel te blahi nei taraini eghu ka nanghagna Lord.

¹⁵ Te tarai ghotilo balu fatutuani na God ginauna na fakelini naikno te fogra tuana nei mana hata fadelei nakhibo jame teke edi mana re.

¹⁶ Eghume te cheke thakledi ghotilo nakhibomire fari themi nei fari totoghoi ka nomi tharai na mala ke keli fapulo. Nogna tharai mae ihei te doglo fara ke ulugna God na thono nolaghi fara.

¹⁷ Tahati laseni eigna mae profet Elija ia. Mana kaisei mae jateula tahati eghu kolho. Nu mana neke tarai heta ka God mala theome soru nakhete ka nauthoglu gne. Aonu theome nakhete naba thilo finogha namno nhigra.

¹⁸ Eghuteuna ke leghugna igne, mae profet Elija neke fapea tarai ka God mala kuru meini nakhete na. Aonu nakhete na neke soru mala ke kotu gobigna lepo te au ke lamnadi glose gre.

¹⁹ Kheraguro, mae ihei tela tei kokonihi thofno chekegna God na, ghotilo ke toghoni mana mala ke pulo mei.

²⁰ Iara magnahaghei ghami te mala thofno lase fakelini igne: God ginauna na hata fadelei nakhibogna mana re nei fakarhini mana eghu ka glehe. Naugna ghotilo neke toghoni mana neke koko fahui nakhibogna mana re mala figri mana ka thofno nakarha te keli na. Me gnafa. Iara, mae Jemes.