Jemes 4 - Buka Blahi Ka Cheke Holo

Mae ihei te theome leghuni God

¹ Kheraguro, naugna unha site magra koba ghotilo fari themi gnea? Ghotilo magra koba fari themi naugna nafnata gaoghatho te magnahaghei glepo malami themi kolho igne site biꞌo ka nagnafami ghotilo grea.

² Ghotilo magnahaghei nomi glepo kmana fara, nu ghotilo theome tangomana te hata gognaro na. Eghuteuna gaoghatho igne te magnahaghei falehedi ghotilo keha naiknore. Eghuteuna te theome hata ghotilo unha teke thono magnahagheni na, ghotilo na funu magrani mae kherami fofodu na. Nu te chekeni iara ka ghotilo na, ghotilo theome tangomana te hata glepo te magnahagheni ghotilo na, naugna ghotilo ne theome tore ka God.

³ Nu kate tore ghotilo ka God na, mana na theome tusu ari ka ghotilo. Naugna gaoghathogna te tore ghotilo na thono jafra fara. Ghotilo khogla toreni kolho glepo te mala eni ghotilo puhi te diꞌa te magnahagheni themi na.

⁴ Ghotilo te tei kokoni God na, ghotilo ginauna na jateula kaisei gaꞌase te tei kokoni khetogna na te mala au fodu balugna kaisei mae delei ngau ia eghu. Ghotilo theome lasenihi igne? Mae ihei te magnahagheni kolho glepo te diꞌa ka nauthoglu igne na, mae tuana nogna mae naoka God. Naugna mae ihei te magnahaghei leghuni kolho nogna gaoghatho naiknogna nauthoglu igne na, mana theome tangomana te leghuni gaoghathogna God na.

^5-6 Unha te chekeni ka grioriso te blahi na ia thofno tutuani fara eigna God neke snakre meini mae Tharunga te Blahi na ka tahati mala au ke lamnada tahati na thofno magnahaghe ghita tahati te mala leghuni kolho mana. Nu neuba ngau, keha ka ghotilo leghuni gaoghathogna naikno kolho. Nu God tusu ranghi ghami ghotilo nogna thotogho na, mala tangomana ghotilo te hogri nagnafa na. Naugna igne, grioriso te blahi na thofno tutuani fara te chekeni igne, “God theome magnahagheni ihei te fahaehaghe na. Nu toghoni ihei te nhaꞌa faparini thegna na.”

⁷ Eghume, iara magnahaghei ghami ghotilo te leghuni koba unha te chekeni God na, thosei leghuni unha te chekeni mae Satan na. Aonu, mae Satan ginauna na rikha koko ghami ghotilo.

⁸ Kate mei ghotilo ka God te au balugna mana na, mana ginauna na togho ghami ghotilo. Ghotilo naikno te diꞌa ra, thosei eni kaisei glepo te diꞌa nu eni unha te keli. Thosei kafe leghudi gaoghathogna naikno ghe gaoghathogna God re, nu hata fadelei glepo te thona te au ka nagnafami are nei ghathoni glepo te keli na eghu.

⁹ Ghotilo theome nabami te maꞌe nei gleale'a teuna, nu ghotilo nabami na au diꞌanagnafa nei tanhi eghu, naugna ghotilo au nakhibo biꞌo fara.

¹⁰ Nhaꞌa fapari ghami themi ke ulugna God eghuteuna God ginauna nake nhaꞌa haghe ghami ghotilo.

¹¹ Kheraguro, thosei cheke fadiꞌani ihei, naugna mae ihei te cheke fadiꞌani mae kheragna fofodu na, mana jaola cheke fadiꞌani nogna vetula God na. Eghuteuna mae ihei te fateni mae kheragna fofodu na nei nhaꞌa faparini mana teuna, mana nhaꞌa fapari nila nogna vetula God na. Te eghu ghotilo na, ghotilo theome leghuni nogna vetula God na, nu ghotilo nhaꞌa fahaghe ghami themi ke kligna gna u vetula na.

¹² Nu thegna God ngala mae ihei te khotogna u vetula na eghuteuna tangomana te mala fate fakelini naikno na. Mana thegna tangomana te fakarhini mana ka puhi te diꞌa na nei tangomana te faleheni mana na. Eghume ghotilo thosei fateni mae ihei te keli na nei mae ihei te diꞌa na naugna tuana nogna gloku thegna God ngala.

Thosei fahaehaghe

¹³ Fanomho fakeli ghotilo ia. Thosei cheke eghu koba, “Gognaro ba nathuꞌu tahati na tei ka kaisei namono biꞌo mala au jare kaisei finogha. Eghuteuna tahati ginauna na loku heta mala hata sileni biꞌo.”

¹⁴ Tore, nu ghotilo theome laseni unha nate eni nathuꞌu na! Eghuteuna ghotilo theome laseni unha nafnata nakarhagna nate hata ghotilo na. Ghotilo na jateula khoveo te filoni tahati katha vido ikoi hamerane nu kela dofi nila teu ia eghu kolho.

¹⁵ Eghume ghotilo jame khogla cheke eghu kolho, “Jame magnahagheni God na, tahati ginauna na karha fabrahu mala eni glepo igne.”

¹⁶ Nu ghotilo fahaehaghe fara eidi unha edi ghotilo glepo igre. Te eni tahati nafnata cheke tuana eigna noda gloku nathuꞌu na thono jafra fara.

¹⁷ Eghume mae ihei laseni teu ngala unha te keli na nu theome eni teuna, mae tuana loku jafra ke ulugna God.