Jemes 1 - Buka Blahi Ka Cheke Holo

¹ Iara mae Jemes, nogna mae gloku God nei nogna Lord Jisas Kraes. Kubae ghami nogna naikno God te au heva heva ka nauthoglu gne.

Fatutuani nei glalase te keli

² Kheraguro, kate au teu ghotilo ka nauthoglu gne, ghotilo na thafodi kmana nafnata puhi biꞌo. Nu kate mei nafnata puhi biꞌo igre ka ghotilo na, ghotilo gleale'a.

³ Naugna ghotilo laseni igne, puhi igre mala mei fariuriudi nomi fatutuani ghotilo re. Eghuteuna ke leghudi fariuriu igre nomi fatutuani ghotilo re ginauna na heta fara.

⁴ Thosei blogho ka nomi fatutuani na, mala au doglo fabrahu ke ulugna God. Te eghu na God ginauna na tusu ranghi ghami ghotilo unha te magnahagheni ghotilo na mala au rheta balugna Kraes.

⁵ Nu ihei te theo nogna gaoghatho te keli na, toreni God. Naugna God ginauna na gleale'a te tufa fabiꞌo ranghini mana gaoghatho te keli na. Eghuteuna God ginauna na theome fafuafuna ka mae ihei te tore ka mana na.

⁶ Nu kate tore ka God na, ghotilo fatutuani ni God nei thosei ghatho peapea. Naugna mae ihei te ghatho peapea na, mana khogla jateula galo te haghe nei ke soru teu ka nuri na ia eghu kolho.

^7-8 Eghuteuna naikno tuana theome ghatho hetani kolho kaisei glepo nei theome laseni unha te eni na. Eghume nafnata naikno tuana theome tangomana te hatini kaisei glepo te keli ka Lord.

⁹ Naikno khiloau te kuma ka nauthoglu gne, mana keli tagna kolho. Naugna neuba ngau God ginauna na nhaꞌa hagheni mana nei tusu ranghini mana dedei gna kligna.

¹⁰ Nu mae ihei te dedei fara ka nauthoglu igne, mana na gleale'a langau, naugna God ginauna na nhaꞌa faparini mana. Eigna mae ihei te dedei na theome au raugha, nu ginauna na jateula chechenge gaju te au katha vido kmoꞌei kolho nu khoko me lehe teura eghu kolho.

¹¹ Kate haghe naprai na, ginauna na brana e brana. Eghuteuna gaju tuare ginauna na brango ka nabrana gna naprai na, aonu chechenge gaju teke famane khuakhuda tuare ginauna na ghoꞌe khoko soru lehe. Na jateula tuana eghu mae ihei te dedei na. Kate loku teuna mana ginauna lehe kokodi nogna dedeire.

Fariuriu

¹² Mae ihei te kegra heta nei theome snakreni thegna teu ka fariuriu te mala eni puhi te diꞌa na, mana keli tagna fara. Mana ginauna na hata nogna taba na, karha fei tifa teke kulu nhaꞌa cheke God ranghidi iheire te namhani mana re.

¹³ Eghuteuna kate thoke mei fariuriu igre ka ghotilo na, thosei ghathoni God neke edi fariuriu igre teuna. Naugna God theome tangomana te fariuriuni kaisei naikno te mala eni puhi te diꞌa na, nei theo kaisei glepo te diꞌa tangomana te fariuriu God te mala eni God puhi te diꞌa na.

¹⁴ God theome fariuriuni mana, nu mana thegna kolho te ghathodi nei magnahaghedi teu puhi te diꞌare. Kate ghathodi mana puhi te diꞌare, mana theome tangomana teke tughu nagnafa na.

¹⁵ Eghuteuna gaoghatho te diꞌa na, kotu haghe ka nakhibo. Kate biꞌo haghegna nakhibo na jateula sisi eghu. Eghuteuna sisigna nakhibo na, u glehe ngala.

¹⁶ Uve kheraguro, eghume thosei batu fadelei ghami.

¹⁷ Glepo te famane keli te gnafa igre neke mei funudi kligna ka God, eghuteuna mana theome tangomana teke tughu puhigna na. Mana theome jateula glepo teke hohoro thegna te siasigla mei ka maloa na are eghu, naugna glepo tuare jateula naungogna gaju te tuthughu vido fabrahu ra eghu. Tutuani, God na theome tangomana tughu puhigna thegna na.

¹⁸ Leghuni nogna gaoghatho thegna na God ne tusu ranghi ghita u karha majaghani na kau chekegna te tutuani, mala tangomana tahati te ulu lahu ka gobigna lepo teke hohoro thegna re.

Namhani nei leghuni eghu chekegna God na

¹⁹ Kheraguro, ghaoghatho fakeli ghotilo ia. Te keli na ghotilo kulu fanomho fakeli ghu ame funu cheke nga nei diꞌatami nga eghu ka keha naiknore.

²⁰ Naugna ihei te diꞌatagna na, mana theome tangomana te eni unha te doglo ke ulugna God na.

²¹ Eghume, koko nafnata nakhibo nei puhi te diꞌa eghu te edi ghotilo are. Thosei fahaehaghe, nu nhaꞌa fapari ghami themi nei leghuni eghu nogna farirhiu God teke farirhiu ghotilo ia. Naugna farirhiu igne ngala tangomana te fakarhi ghami ghotilo na.

²² Ghotilo mala leghuni koba u chekegna God na. Eghuteuna te cheke eghu ghotilo na, “Ghehati la nomhinihi chekegna God na” teu ghotilo, nu tiromi leghuni unha te chekeni mana na teuna, ghotilo chaghi ghami kolho themi.

²³ Naugna mae ihei te khogla nomhini kolho chekegna God na nu theome leghuni teuna, mana jateula mae ihei te khogla filoni kolho naungogna thegna na ka thiro na ia eghu kolho.

²⁴ Eghuteuna ke leghugna te filoni naungogna thegna na, mana na tei delei, eghuteuna na ghosei ghatho ihoni unha teke filoni mana na.

²⁵ Nu naikno te thofno gleale'a na ngala mae ihei te famane fifilo fakeli nei leghuni koba teu chekegna God na. Eghuteuna chekegna God te thofno keli tuana ngala tangomana te hata fadelei nakhibo na te mala snagla naiknore. Uve, mana fanomho fakeli nu mana theome ghatho ihodi unha te nomhidi mana re. Mae igne ngala te thofno gleale'a na.

²⁶ Mae ihei la naikno khiloau hi thegna teu ka gaoghathogna na nu theome saghe leghu fakelini nogna cheke na teuna, mana chaghini kolho thegna nei nogna fatutuani mana na theo nafudi kolho.

²⁷ Nu puhi te doglo ka God Kmada na igne. Taji fakelidi goro sua te glehe kokoi ba goro naikno biꞌo tela lehehi khetodi ra. Naugna phei tothoghei igre ngaguni noda thotogho tahati na. Eghuteuna taji fakelini thegna ka gobigna lepo te diꞌa ka nauthoglu gne. Igne u nafnata naikno khiloau te magnahagheni God na.