Jajis 5 - Buka Blahi Ka Cheke Holo

Nodi khoje Debora ghe mae Barak

¹ Ka narane tuana Debora ghe Barak, repa ne eni kaisei khoje. Khoje igne cheke eghu,

² “Kilo fnaknoni Lord! “Noda mae mala baubatu tahati ra kegra haghe mala magra, eghuteuna tahati te gnafa na glealeꞌa mala leghudi mare ka magra.

³ “Mae funei ra, ghotilo fanomho! Mae biꞌo ra, ghotilo fanomho fakeli! Iara ginauna koje kaisei khoje ka gita mala kilofnaknoni Lord, nodi God maedi Israel.

⁴ “Lord God, kate fakakhana iagho nou nolaghi na ka thogele Seia ka nogna glose Idom, nakhete biꞌo soru mei ka maloa na eghuteuna nauthoglu gne ne nghali tongana.

⁵ Thogele igre jaola ne nghali tongana ke ulugna Lord, nodi God maedi Israel, mae ihei te fakakhana nogna nolaghi na Thogele Sanai.

⁶ “Ka narane gna Samga, thugna Anat, nei ka narane gna Jael, naiknore magnahaghe te leghudi nabrou te ikodire kolho, naugna nabrou biꞌo re theome keli.

⁷ Namono ikodire krogha. Uve, nakarha ka namono na theome keli ghilei posa ka narane iara Debora, iara kegra haghe kaisei naikno biꞌo jateula idogna eghu Israel.

⁸ Ka narane naiknodi Israel igre te vahidi keha god delei igne, magra ne thoke mei, nu theo kaisei ka phiatutu thogha soldia di Israel te au grojo ba greoreo mala magra!

⁹ Iara thofno glealeꞌa fara ka noda lida tahati maeda Israel. Uve, iara glealeꞌa fara ka iheire te sasaꞌa mala magra. Cheke fakelini Lord!

¹⁰ “Fanomho ka igne ghotilo mae iheire te saghe ka famane dongki vegha ra, nei ghotilo mae dedei te gnokro kolho ra, nei ghotilo mae iheire te nolo tafri kolho ra, ghotilo te gnafa na kafe ghaoghatho fakeli.

¹¹ Ghotilo fanomho! Naikno te khapru ka Seu igne te koje eigna Lord te uluni magra igne. Uve, te chekeni mare na tahati naiknoda Israel la uluni magra na. Aonu, nogna naikno Lord igre jifla mala magra.

¹² Eghuteuna mare ne cheke eghu, ‘Dofra haghe, dofra haghe Debora! Kegra haghe kojeni khojegna magra ia! Kegra haghe Barak! Thugna Abinoam, hata tei nomi naokare!’

¹³ “Goro mae biꞌo te au teu ka thogele ra soru mei mala magra. Uve, nogna naikno Lord ra tei mala magra ka naoka te rheta tuana.

¹⁴ Mare ka vikegna Efrem igre soru pari ka glogu. Mare leghuni tei vikegna Benjamin, kheradi mare ra. Mae te nheta ka vikegna Makia ra nei mae biꞌo ka vikegna Sebulun igre jaola soru mei.

¹⁵ Eghuteuna mae funei ka vikegna Isaka igre loku fodu balugna Debora. Uve, mare ka vikegna Isaka igre toghoni Barak. Eghuteuna mare chari ne tei ka glogu ke leghugna mae Barak. Vido gaga ka vikegna Ruben te au keha gaoghatho rheta te mala mei.

¹⁶ Nu naugna unha site gnokro teu kolho baludi sipu te fanomho kolho ka mae ihei te ifu ka phoposa gnea? Keha ka vikegna Ruben igre au phei gaoghatho, naugna igne mare theome tangomana te mei na.

¹⁷ Vikegna Gad te au nohi Gilead igre au kolho ka keha phile Khoꞌu biꞌo Jordan. Mala unha si vikegna Dan igre te au ka waf kolho igrea? Eghuteuna vikegna Asa igre jaola au kolho ka nodi namono re rhegna gratha na.

¹⁸ Nu vikegna Sebulun balugna vikegna Naftali kolho te mei ka magra na. Eghuteuna mare tarabana kolho te fadidiꞌa nakarhadi re.

¹⁹ “Hatimare mae king mei mala magra. Uve, hatimare mae king di Kenan igre mei ka magra. Neubane eghu ngau, namono Tanak rhegna khoꞌu Megido, mare theome uluni kaisei glepo te keli te mala hata fapulo na.

²⁰ Nathunu ka maloa na igre jaola loku fodu mala magra. Nathunu igre au ka nodi vido re magra ka funei biꞌo Sisera.

²¹ Nabritha biꞌo ka khoꞌu biꞌo Kison igne goigonidi nogna soldia Sisera igre. Uve, nabritha igne toku tafrudi mare. Leuleghu fata na, iara ginauna au rheta kate tei iara ka magra na!

²² Ka narane tuana, nogna hose Sisera igre ne rikha. Uve, ghahedi re ne tothokei ka glose kate rikha na.

²³ Engel nogna Lord na ne cheke eghu, ‘Puhi biꞌo na thokedi naiknodi Meiros. God ginauna paradi naiknodi Meiros, naugna mare ne theome magnahaghei te toghodi nogna soldia Lord ka magra.’

²⁴ “Jael khetogna Heba ka vikegna Kein, God ginauna fablahi nigho iagho salaꞌudi keha gaꞌase are, eghuteuna mana na faglealeꞌa nigho salaꞌudi goro gaꞌase te au ka suga tapuale are.

²⁵ Sisera neke tore khoꞌu ka naꞌa, eghuteuna Jael neke tusu lao milk te keli ka mana, eghuteuna naꞌa lilisei ka kaisei kapu te nabagna funei.

²⁶ Nu ke leghu na, naꞌa hata peg gna suga tapuale na. Naꞌa hata kaisei hama, ne tugeni phaꞌugna Sisera, ne phosa phaꞌugna mana na, eghuteuna gaju igne ne tei lamna ka glangi phaꞌugna na.

²⁷ Sisera ne khoko soru pari rhegna ghahegna gaꞌase igne, eghuteuna mana ne lehe ka vido aheva teke khoko soru mana na.

²⁸ “Idogna Sisera na filo fakosi neu ka wida na. Uve, naꞌa ofoni neu ke pulo meigna mana na. Naꞌa ne cheke eghu fabrahu, ‘Naugna unha si thugu iara gne teke theome faghose pulo mei gnea?’

^29-30 Naꞌa nei kheragna gaꞌase naꞌa te lalase igre eghu ne kaisei nanaba nodi cheke tughu re, ‘Jame Sisera baludi nogna soldia re salo glepo te keli teke uludi mare ka magra na. Eghuteuna reꞌe jame tusu lao kaisei ba phei gaꞌase ka soldia te gnafa re. Sisera jame hata mei famane pohe teke uludi ka magra na. Uve, mana jame pala mei kaisei ba phei famane pohe malagu iara.’

³¹ “Lord God, snakredi nou naoka iagho re mala lehe jateula Sisera eghu! Nu snakredi iheire te namha nigho iagho igre mala phae jateula naprai te haghe hamerane ia eghu!” Eghume naiknodi Israel igre na au ka pharikeli nabagna phiatutu finogha.