Jajis 4 - Buka Blahi Ka Cheke Holo

Debora, Barak nei Jael

¹ Ke leghugna tela lehehi Ehud igne, naiknodi Israel igre neke edi kmana puhi te diꞌa ka tathagna Lord.

² Eghume, Lord ne snakreni Jabin king gna Kenan mala funei frunidi naiknodi Israel. Nogna namono mana na Haso, eghuteuna nanghagna nodi lida nogna soldia mana re Sisera. Lida igne mei funugna namono Haroset-Ha-Goeim.

³ Sisera au nheva gobi chariot mala magra te au aean wil. Eghuteuna naiknodi Israel igre au ke parigna nogna nolaghi mana nabagna varadaki finogha. Ka narane tuare mana ne faparadi fara naiknodi Israel. Aonu mare ne tanhi lao ka God mala toghodi.

⁴ Ka narane tuare, Debora khetogna mae Lapidot igne kaisei thau profet. Debora ne batudi naiknodi Israel.

⁵ Naꞌa tangomana te gnokro ke parigna nogna gaju thubo na farihoteidi phei namono Rama ghe Betel, ka thogele ka nodi glose vikegna Efrem. Eghuteuna iheire te au nodi faripholai igre tangomana te tei filoni naꞌa mala fadoglidi nodi puhi biꞌo re.

⁶ Kaisei narane, naꞌa ne fatei cheke ka mae Barak, thugna mae Abinoam, jare Kedes ka nogna glose Naftali, mala mei filoni naꞌa. Eghuteuna kate mei thoke mana ka naꞌa na, Debora ne cheke eghu ka Barak, “Lord nodi God naiknodi Israel igne ne cheke eghu ka iagho, ‘Iagho tei kilodi nabotho thogha mae mala magra ka vikedi Naftali ghe Sebulun. Iagho batudi mare tei ka thogele Teboa.

⁷ Iara ginauna vahini Sisera, nodi lida nogna soldia Jabin ra mala mei magra ka ghotilo ka khoꞌu biꞌo Kison. Mana ginauna mei balu nogna soldia nei chariot mala magra eghu, nu iara ginauna togho ghami ghotilo mala uludi mare.’ ”

⁸ Nu Barak ne cheke eghu ka Debora, “Jame te tei iagho balugu iara na, iara ginauna tei, nu jame te theome mei iagho balugu iara na, iara ginauna theome tei.”

⁹ Aonu Debora ne cheke eghu, “Uve, iara ginauna age balumi ghotilo. Nu neubane uluni iagho magra na, iagho ginauna theome hata fnakno ka magra tuana. Naugna Lord ginauna lisa laoni Sisera ka khamegna kaisei naikno biꞌo.” Aonu phiamare tei ne posa namono Kedes.

¹⁰ Barak ne kiloni vikegna Sebulun, balugna vikegna Naftali mala mei filoni mana. Eghuteuna mana ne hata nabotho thogha mae ka phei vike igre mala tei balugna, eghuteuna Debora jaola ne tei baludi mare.

¹¹ Ka narane tuare, Heba kaisei mae ka vikegna Kein, mana neke tei kokonihi vikegna na. Vike igne neke jifla mei ke leghugna Hobab, kaisei nanghogna Moses. Heba neke fakegra haghehi nogna suga thapuale na ka namono Kedes, rhegna kaisei gaju biꞌo ka vido te kiloi mare Sananim.

¹² Kate nomhini Sisera nonomho te batudi Barak nogna soldiare ka thogele Teboa igne,

¹³ mana ne kaikaliti nheva gobi chariot mala magra baludi nogna mae soldiare, eghuteuna mana ne kuru teidi Haroset-Ha-Goeim mala tei ka khoꞌu biꞌo Kison.

¹⁴ Aonu, Debora ne eha eghu tei ka mae Barak, “Tei si ghotilo! Gognarogne, Lord ginauna togho ghami ghotilo mala uludi mare, naugna mana nate batu ghami ghotilo ka magra igne! Mana la lilisehi Sisera ke parigna noda nolaghi tahati!” Aonu Barak ne batudi ne soru nabotho thogha nogna soldia funu ka thogele Teboa.

¹⁵ Eghuteuna kate funu magra mare na, Lord ne famhaghuni Sisera baludi nogna soldiare, aonu mare ne chari tafri jateula naikno te nolira neu ka vido igne. Sisera ne krofu soru ka nogna chariot na ne funu rikha.

¹⁶ Keha nogna soldia Sisera re ne rikha, nu Barak balugna nogna mae soldiare ne ngohlidi mare te thoke ka namono Haroset-Ha-Goeim. Mare aknu falehe ne hui nogna soldia Sisera re eghuteuna theo kaisei te karha na.

¹⁷ Sisera ne mhaghu nogna fara, aonu mana rikha ne tei poru ka nogna suga thapuale Jael khetogna mae Heba. Mana tangomana te tei ka vido igne na naugna mae king Jabin neke eni kaisei nhaꞌa cheke balugna vikegna mae Heba tifa mala au fodu ka pharikeli.

¹⁸ Eghuteuna kate thoke mana ka vido igne, Jael jifla mei ne thafoni mana, ne cheke eghu ka mana, “Mae biꞌo, thosei mhaghu! Iagho tangomana te tei poru ka nogu suga thapuale iara gno.” Aonu Sisera tei lamna, eghuteuna naikno biꞌo igne tei ne pophoruni mana, naꞌa toku tafruni mana ka kaisei pohe biꞌo.

¹⁹ Mana ne cheke eghu, “Iara rogu koꞌu fara!” Nu naugna te mae biꞌo mana na, naꞌa hata keha milk ne tusu lao ka Sisera ne koꞌu mana. Aonu naꞌa neke toku tafruni mana.

²⁰ Sisera ne cheke eghu ka naꞌa, “Tei kegra ka grengatha gno. Jame kaisei mae mei ghusna eghu ka iagho, ‘Ba, kaisei mae mei agne?’ iagho cheke eghu, ‘Theo.’ ”

²¹ Nu Sisera thono babaꞌo fara ne thuru iho. Nu Jael megei nga ne tei hata kaisei hama balugna kaisei gaju fnonu ka suga thapuale na. Eghuteuna naꞌa thoghei ne tei rhegna vido te thuru teu mana na. Eghuteuna naꞌa tuge soru gaju igne lamna ka glangi phaꞌugna mana na ne ghilei thoke pari ka glose ro. Aonu mae igne ne lehe.

²² Barak ne harini Sisera, eghuteuna kate posa mana ka vido igne, Jael ne thafoni mana. Eghuteuna naꞌa ne cheke eghu, “Mei sagho. Mae te hironi iagho na au agne. Iara ginauna fakakhana ka iagho.” Mae Barak ne tei balugna naꞌa ne filoni Sisera tela lehehi na eghuteuna mana jaola ne filoni gaju te au teu ka glangi phaꞌugna mana na.

²³ Eghume ka narane tuana, God ne toghodi naiknodi Israel ne uluni Jabin, kaisei king gna Kenan.

²⁴ Eghuteuna funu ka narane igne te haghe na Israel ne rheta ne rheta fara ne ghilei tapla soruni nei goigonini eghu nogna nolaghi King Jabin.