Jajis 3 - Buka Blahi Ka Cheke Holo

Keha kokholo te au fapulo Kenan

¹ Lord ne snakredi keha naiknodi Kenan mala au ka glose igne. Mana eni igne mala fariuriudi naiknodi Israel mae iheire teke theome tei baludi kmadi ka magra Kenan tifa ra.

² Mana eni igne, mala farirhiudi naiknodi Israel iheire teke theome magra tifa ra mala laseni magra na.

³ Vike te au ka glose igne na igre: glima lidadi Filistia te diꞌa igre baludi nodi naiknore, nei vikegna Kenan, nei vikegna Saedon, nei vikegna Hivi te au ka Thogele Lebanon fari hotei Baal-Hemon tei posa Lebo-Hamat.

⁴ Naikno igre neke au fapulo naugna Lord neke fariuriudi nogna naiknore. Mana magnahaghei te lasedi glahula leghudi cheke teke tusu lao mana ka Moses teke cheke mana kuꞌedi mare tifa teke mei ra, ba theo.

⁵ Aonu, naiknodi Israel te au teu baludi vikegna Kenan, nei vikegna Het, nei vikegna Amoa, nei vikegna Peris, nei vikegna Hivi, nei vikegna Jebus.

⁶ Eghuteuna naiknodi Israel igre snakredi thudire mala tolaghi ka vike igre. Aonu naiknodi Israel igre ne tarai nodi god chaichaghi mare igre.

Mae Otniel te nodi funei ululahu naiknodi Israel

⁷ Naiknodi Israel ne eni puhi te diꞌa na ka tathagna Lord nodi God mare na. Mare ne loku ranghini mumuju god Baal ghe Astarot.

⁸ Aonu Lord brana ne salaꞌui diꞌatagna na ranghini Israel. Eghuteuna mana ne snakre laodi ka khamegna King Kusan-Risataem gna Mesopotemia, mala uludi mare ka magra. Eghuteuna mare ne au ke parigna mana nabagna nhana finogha.

⁹ Nu naiknodi Israel igre ne tanhi lao ka Lord mala toghodi, eghuteuna mana ne vahini Otniel thugna Kenas tahigna Kelab.

¹⁰ Aonu Tharunga gna Lord na ne mei ka Otniel ne tusu lao nolaghi ka mana, eghuteuna mana batudi maedi Israel ne tei magra ne uluni King Kusan-Risataem.

¹¹ Aonu naiknodi Israel igre ne au ka pharikeli nabagna phiatutu finogha ka glose igne. Aonu Otniel thugna Kenas ne lehe.

Ehud ne funei gna Israel

¹² Ke leghu, naiknodi Israel igre neke eni fapulo puhi te diꞌa na ka tathagna Lord. Aonu Lord ne tusu lao narheta ka Eglon king gna Moab mala uludi naiknodi Israel.

¹³ King Eglon ne kilo meidi vikegna Amon baludi vikegna Amalek mala loku fodu balugna mala magra ka naiknodi Israel, eghuteuna mare ne uludi mae Israel. King igne ne hata Jeriko namonogna gaju thubo.

¹⁴ Aonu naiknodi Israel igre ne au ke parigna nogna nolaghi mana nabagna nabotho nhana finogha.

¹⁵ Nu kate tanhi mare ka Lord te mala toghodi na, Lord ne vahini Ehud thugna Gera ka vikegna Benjamin mala fakharhidi. Mae igne loku ka khame maeri. Naiknodi Israel igre ne lisei takis ka khamegna mana mala fatei ka King Eglon.

¹⁶ Aonu Ehud ne eni kaisei naflahi te fnonu piepile, eghuteuna brahugna na thokeni phiatutu glima sentemita. Eghuteuna mana haru naflahi igne ke lamna pohe fei ghahe nhetagna.

¹⁷ Aonu mana baludi nogna mae glokure hata ne tei takis igne ka King Eglon, mae ihei te thofno blokha fara.

¹⁸ Ke leghugna te tusu lao te gnafa na ka king, mae Ehud nei nogna mae glokure neke pulo ka namono.

^19-20 Nu kate mei namo mare Gilgal ka thina mumuju god igne, Ehud kolho figri neke pulo ka king. Kate mei ka nogna suga biꞌo king igne, King Eklon ne gnokro pari lamna ka nogna chogho na ke tagru suga. Aonu Ehud ne cheke eghu ka mana, “King. Iara au kaisei glepo mala tusu ari ka iagho kolho.” Aonu king ne chekedi nogna mae glokure mala au kmu. Eghuteuna kate jifla kosi te gnafa mare na, Ehud mei ne namo ka mana ne cheke eghu, “King, iara au kaisei glepo funugna ka God malamu iagho.” Aonu king ne kegra haghe.

²¹ Aonu Ehud korho fajifla naflahi na ka khame mairigna na ne cha lao naflahi igne churu ne tei lamna ka thiꞌagna king na.

²² Naflahi igne ne thofno tei lamna ne posa ka mala lokugna naflahi na, eghuteuna garofa ka thinigna king na ne thafru ka naflahi igne. Ehud ne lisa lao naflahi igne mala au kolho lamna ka thiꞌagna mana na eghuteuna chara ka thiꞌagna mana re jaola ne jifla mei.

²³ Ehud jifla kosi ne bobotho famaku nei bibilakhi famaku phei grengatha gna suga igne,

²⁴ aonu mana jifla ka kaisei wida. Kate pulo mei nogna mae gloku king igre, mare ne filodi phei grengatha igre ne bibilakhi famaku, nu mare gaoghathodi na king na au ka suga ikodi na.

²⁵ Aonu mare kegra ofo neu jare ne ghilei hongodi. Nu kate theome tothora grengatha na te theome jifla mei king na, mare hata khi na ne ghilei tora grengatha na. Kate tora mare grengatha na, mare filoni nodi funei na thuru neu pari naugna mana la lehehi.

^26-27 Nu raugha fara kate rogheni teu mare unha nate eni na, Ehud rikha la tei salaꞌudihi thina mumuju igre, eghuteuna mana rikha ne tei ka namono Seira ka thogele kantri Efrem. Eghuteuna kate tei posa mana ka vido igne, mana ne khufli mala kilodi naiknodi Israel mala tei magra. Mana batudi mare ne soru ka thogele na.

²⁸ Aonu mana ne cheke eghu, “Ghotilo mei leghu ghau iara! Lord na la snakre meihi vikegna Moab ka khameda tahati!” Aonu mare leghuni mana ne soru ka nabrou re ne kasa ka Khoꞌu biꞌo Jordan. Eghuteuna mare theome snakreni kaisei maegna Moab te kasa ka khoꞌu na te tei Moab.

²⁹ Ka narane tuana, mare ne aknu falehe namo nabotho thogha soldiadi Moab eghuteuna ka vido tuana theo kaisei naikno ka mare te tangomana te rikha na.

³⁰ Ka narane tuana, igne puhi te eni naiknodi Israel te uluni vikegna Moab. Aonu naiknodi Israel igre ne au ka pharikeli nabagna nhana salei finogha.

Samga ne uludi mae Filistia

³¹ Ke leghugna Ehud, Samga thugna Anat jaola neke fakarhidi naiknodi Israel. Mana kaisei fata na neke aknu falehe namno gobi maedi Filistia ka kaisei gaju fnonu te atha mare te mala batudi buluka re.