Jajis 21 - Buka Blahi Ka Cheke Holo

Mae Israel tufa gaꞌase ka maedi Benjamin

¹ Kani teke khapru mae Israel igre Mispa na, mare ne eni kaisei nhaꞌa cheke eghu, “Ghehati theome snakredi thumi gaꞌase re mala tolaghi ka vikegna Benjamin.”

² Ke leghugna magra balugna vikegna Benjamin igne, naiknodi Israel igre neke khapru ka vido blahi Betel eghuteuna mare diꞌanagnafa fara ne tanhi fara ne ghilei rafi.

³ Eghuteuna mare ne tanhi eghu, “Lord, nodi God mae Israel! Naugna unha ne snakreni ka ghehati maemi Israel sagho puhi ignea? Gognarona kaisei vikemi ghehati la namo hui.”

⁴ Hamerane boibongi ka keha narane na, mare ne kaisei olta mala gahu soasopai nafnata fafara mala ke fofodu fakeli balugna Lord.

⁵ Aonu mare ne cheke eghu fari thedi, “Ba, ka narane teke khapru tahati ke ulugna Lord Mispa ia, ihei ka vike tahati gne teke theome mei baluda tahati na?” Mare ne cheke eghu, naugna ka narane tura mare neke eni kaisei nhaꞌa cheke eghu, “Jame kaisei mae ka tahati theome mei baluda tahati ke ulugna Lord gognarogne, tahati ginauna aknu faleheni.”

⁶ Mare kokhoni nodini fara vikegna Benjamin, ne cheke eghu, “Gognarona, tahati la namo dofini kaisei ka nabotho phei vikeda ra.

⁷ Gognarona phei ba thiloi mae kolho te karha nga teuna eghuteuna mare theo kaisei khetodi. Tahati neke nhaꞌa cheke hi ka nanghagna Lord te mala thosei snakredi thuda gaꞌasere te mala tolaghi ka mare na. Eghume unha gne nate tangomana ghita nate eni tahati te mala toghodi mare na?”

^8-9 Aonu mare ne ghusna eghu, “Ka narane teke mei khapru tahati ke ulugna Lord Mispa ia, ihei ka vike tahati igne teke theome mei baluda tahati ia?” Aonu kate kaha mare naikno te gnafa re, mare ne laseni te maedi Jabes Gilead igre neke theome mei baludi mare.

^10-11 Aonu mare ne vavahi nabotho phei thogha mae nheta mala magra eghuteuna mare ne cheke eghu ka mare, “Ghotilo tei aknu falehe mae nalhaꞌu te gnafa Jabes Gilead balu khetodi nei thudi te gnafa teu mare re. Mae nalhaꞌu te gnafa nei gaꞌase te gnafa te tolaghi ra mala kafe lehe, nu ghotilo thosei aknu falehe goro gaꞌase majaghani te theome thuru teu kaisei mae balugna.”

¹² Mare tei magra ne filodi fati gobi gaꞌase majaghani Jabes Gilead, eghuteuna mare hata neke pulo namono Saelo jare nohi Kenan, ka vido aheva te au teu maedi Israel tagna.

¹³ Ka narane tuana, mae Israel faidu ne fatei keha mae ka maedi Benjamin te poru teu ka thina biꞌo Rimon, cheke ranghidi mare mae Israel igre magnahaghei pharikeli baludi mare.

¹⁴ Aonu maedi Benjamin igre neke pulo ka nodi namono re, eghuteuna maedi Israel igre hata gaꞌasedi Jabes Gilead igre ne tusu lao ka mare. Nu maedi Benjamin igre kmana fara, aonu gaꞌase igre theome nabadi mare.

¹⁵ Naiknodi Israel igre ne kokhonidi naiknodi Benjamin igre, naugna Lord ne namo ghiha koko kaisei vikegna Israel.

¹⁶ Aonu mae lidadi vike igre ne cheke eghu, “Goro gaꞌase ka vikegna Benjamin ra la lehehi. Aheva nate filo gaꞌase tahati maladi mae iheire te theo khetodi teu ka vikegna Benjamin igre?

¹⁷ Tahati na hironi kaisei puhi mala au kmana naikno, naugna jame te theo thudi mare na, kaisei vikegna Israel ginauna hui.

¹⁸ Nu tahati neke enihi nhaꞌa cheke te theo kaisei ka tahati nate snakre lao thugna na te mala tolaghi ka kaisei mae ka vikegna Benjamin. Eghuteuna tahati neke cheke eghu, ‘God ginauna tibrini mae ihei te snakreni thugna gaꞌase na ka vikegna Benjamin.’ ”

¹⁹ Aonu mare ne ghilei ghathoni leuleghu finogha na mare tei namono Saelo mala ei gaghamu mala ghatho tahuni Lord. Saelo gne au ke raru namono Betel, ke mata namono Lebona nei ke maghati gna nabrou te funu Betel te tei thoke namono Sekem igne.

²⁰ Aonu mare ne cheke ka vikegna Benjamin mae ihei te theo khetogna na, “Ka narane gaghamu Saelo na, ghotilo na te tei poru ka nagare grep gro.

²¹ Ghotilo ginauna ofou jare ghilei jifla mei ragi gaꞌasedi Saelo re. Eghuteuna ghotilo ginauna tei hata gaꞌase igre mala khetomi ghotilo. Eghuteuna ghotilo ginauna hata ke pulo ka namonomi re gaꞌase tuare.

²² Jame kmadi nei kheradi teu gaꞌase igre neke mei cheke ka ghehati, eghuteuna ghehati ginauna na cheke eghu ka mare, ‘Ghathoni si ghotilo vikegna Israel ia eghuteuna snakredi gaꞌase igre mala au ka vikegna Benjamin. Naugna ka magra ka maedi Jabes Gilead ia, tahati neke theome hata naba gaꞌase maladi mare. Eghuteuna naugna ghotilo neke theome snakre laodi gaꞌase igre ka vikegna Benjamin, ghotilo theome huhughuni nhaꞌa cheke teke eni tahati ia.’ ”

²³ Aonu maedi Benjamin ne eni igne. Mare tei ne poru, eghuteuna kate jifla mei te ragi gaꞌase igre na, mare te gnafa na kaisei mae hata kaisei khetogna neu. Mare hata neke pulo ka namonodi re. Eghuteuna mare neke eni fakeli nodi namonore mala ke au tadi.

²⁴ Aonu ka narane tuana, naiknodi Israel igre neke pulo ka tharaknadi nei ka nodi namono aheva God teke tusu ranghidi.

²⁵ Ka narane tuare, naiknodi Israel igre neke theome au king neku, aonu mare ne edi unha te doglo ka gaoghathodi thedire kolho.