Jajis 2 - Buka Blahi Ka Cheke Holo

Nogna engelLordne tei jare Bokim

¹ Nogna engel Lord na ne jifla funugna namono Gilgal ne tei namono Bokim. Mana ne cheke eghu ka naiknodi Israel, “Tifa na, iara neke hata fajifla ghami ghotilo kantri Ijep, eghuteuna iara neke hata mei ghami ghotilo ka vido glose teke nhaꞌa chekeni iara ka kuꞌemi ghotilo tifa ra. Eghuteuna iara neke cheke eghu ka kuꞌemi ghotilo ra, ‘Iara ginauna theome huhughuni nhaꞌa cheke teke eni iara balumi ghotilo ia.

² Eghuteuna ghotilo thosei ke eni kaisei nhaꞌa cheke baludi naikno te au ka namono Kenan igne, eghuteuna ghotilo ginauna paꞌe soru nodi olta naikno bongihehe are.’ Nu ghotilo theome edi kolho unha teke chekedi iara ka ghotilo ra. Naugna unha site edi ghotilo glepo igrea?

³ Eghume iara na cheke fadoglo ari ka ghotilo gognarona, jame te tei magra ghotilo ka naikno te au agne Kenan igre, iara ginauna na theome togho ghami ghotilo mala uludi mare. Nu mare ginauna goigoni ghami ghotilo, eghuteuna nodi god mare igre ginauna jateula kaisei phighoro eghu mala khale ghotilo tagna.”

⁴ Kate cheke te gnafa nogna engel Lord igne ka naiknodi Israel igre na, mare te gnafa na ne kafe tanhi.

⁵ Aonu mare ne kiloni namono igne “Bokim”, gaoghathogna na “Mare ne kafe tanhi.” Eghuteuna mare ne eni kaisei fafara ka Lord ka namono igne.

Ke leghugna te lehe Josua na, mare ne theome leghuniLord

⁶ Tifa te mei na, Josua neke kuru teidi naiknodi Israel. Eghuteuna mare te gnafa na ne tei ne atha keha vido glose ke lamnagna glose teke nhaꞌa cheke ranghidi.

^7-9 Josua thugna Nun, mana kaisei nogna mae gloku Lord eghuteuna mana thokei kaisei gobi nabotho finogha neke lehe nga. Mare giugiluni mana ka nogna vido glose thegna na Timnat-Heres jare Efrem ke raru thogele Gas. Ka narane karha nga teku Josua igre, naiknodi Israel igre neke ghatho tahuni Lord. Eghuteuna mare jaola neke thofno leghuni Lord kani au teku goro mae biꞌo igre balugna Josua neke filodi glepo biꞌo teke edi Lord ranghidi naiknodi Israel.

¹⁰ Nu ke leghugna te lehe phagusu igne, iheire te gnafa teke kotu haghe ke leghudi mae igre neke theome ghatho tahuni Lord. Eghuteuna mare theome lasedi glepo biꞌo teke edi Lord ranghidi naiknodi Israel.

¹¹ Ka narane tuare, naiknodi Israel igre ne funu edi puhi te diꞌa ka tathagna Lord nei tarai ka god chaghi Baal.

¹² Lord ngala nodi God ku'edi mare ra, eghuteuna mana ngala teke atha fajifladi mare Ijep. Neuba ne eghu ngau, mare theome ghatho tahuni mana eghuteuna mare tarai ka nodi god naikno te au faligohodi mare. Aonu Lord ne thofno diꞌatagna fara ka mare.

¹³ Mare lisei kokoni Lord ne tarai ka god Baal ghe god gaꞌase Astarot.

¹⁴ Diꞌatagna Lord na ne thono brana fara ka mare ne snakre laodi ka khamedi nodi naoka te au faligohodi mare. Eghuteuna nodi naoka mare igre raꞌe ne nheta fara, eghuteuna naiknodi Israel igre ne theome tangomana te reireghidi thedire. Eghuteuna naoka igre blau koba nodi gobigna lepo re.

¹⁵ Eghuteuna leuleghu fata na nodi soldia maedi Israel igre tei ne magridi nodi naokare, nu mare theome tangomana te uludi kolho mae naoka igre, naugna Lord na theome au baludi mare jateula teke chekenihi mana thegna ia eghu. Naugna igne, maedi Israel ne thofno papara fara.

¹⁶ Aonu, Lord ne vavahi keha mae lida mala fakarhidi naiknodi Israel igre ka khamedi nodi naoka mare igre.

¹⁷ Neuba, mare theome fanomho fakeli kolho ka mae lida igre. Eghuteuna mare tei leghudi kolho god chaichaghi igre jateula gaꞌase te tei leghuni nalhaꞌu te theome khetogna naꞌa na. Eghuteuna theome raugha mare theome leghudi puhidi kuꞌedi mare te keli teke thofno leghudi nogna cheke Lord ra.

¹⁸ Leuleghu fata na, Lord vahini kaisei mae lida mala toghodi mare. Leghu fata na mae lida igne batudi naiknodi Israel igre, Lord fakarhidi mare ka khamedi mae naoka te mei goigonidi mare re. Lord theome gnafa te fakarhidi re, naugna mana ne kokhoni nognadi fara.

¹⁹ Nu kate lehe mae lida na, mare te gnafa na ke puloi ngala ke leghudi puhi te diꞌare. Eghuteuna mare edi fabrahu glepo te thono diꞌa fara salaꞌudi puhidi kmadi tifa ra. Mare leghudi nei tarai eghu ka keha god delei. Eghuteuna leghu fata kolho, mare patugama fabrahu nei theome tangomana te lisa kokodi puhi te diꞌa re.

²⁰ Aonu Lord ne diꞌatagna fara ka mare ne cheke eghu, “Naiknodi Israel igre huhughuni nhaꞌa cheke teke chekeni iara ka kuꞌedi mare tifa mala tathaji mare teku ia. Naugna te theome leghu ghau iara mare na,

²¹ iara ginauna theome ngolhi fajifladi keha naikno te au teu ke leghugna narane te lehe Josua igne.

²² Iara ginauna hata vikegna Kenan igne mala farirhiudi naiknodi Israel igre mala laseni ihei gne te leghudi puhigu iara te keli jateula teke edi kuꞌeda tifa ra.”

²³ Naugna igne Lord neke snakredi vikegna Kenan mala au kolho baludi nogna naikno mana te au ka glose igne nei mana theome snakreni Josua te ngolhi fajifladi vike te gnafa igre.