Jajis 19 - Buka Blahi Ka Cheke Holo

Keha mae ka vikegna Benjamin ne aknu falehe kaisei gaꞌase

¹ Kani theo nodi king teku naiknodi Israel igre, kaisei mae ka vikegna Livae au mata ka thogele ka nogna glose Efrem. Kaisei narane mana hata kaisei fapea khetogna Betlehem jare Juda.

² Kaisei fata, gaꞌase igne ei puhi diꞌa balugna kaisei mae, aonu naꞌa rikha neke pulo ka kmagna na Betlehem, eghuteuna naꞌa ne au ka namono igne fati nhigra.

³ Ke leghudi fati nhigra igre, khetogna gaꞌase igne jifla ne tei Betlehem mala cheke balugna gaꞌase igne mala ke pulo mei naꞌa. Mana hata nogna mae gloku na baludi phei nogna dongki re eghu ne tei phiamare. Kate tei phiamare ka namono igne, gaꞌase igne mei ne hatani mana ne tei ka sugagna kmagna na. Eghuteuna kate filoni mae igne, kmagna naꞌa na ne kelitagna fara.

⁴ Kmagna gaꞌase igne ne cheke ka mana mala au ghu. Aonu mana ne au ka namono igne thilo narane, eghuteuna mare ne ghamu nei koꞌu neu.

⁵ Hamerane boibongi ka fafati narane na, thilo mare kegra haghe tarabana mala ke pulo. Nu kmagna gaꞌase igne ne cheke eghu ka mana, “Ghamu ghu sagho tei nga.”

⁶ Aonu phiamare gnokro fodu ne ghamu nei koꞌu neu. Nu kate ghamu te gnafa na, kmagna gaꞌase gne ne cheke eghu ka mana, “Te keli na iagho na aughu bongi na mala gleꞌa noughu themu.”

⁷ Mae igne kegra haghe mala tei, nu naugna kmagna gaꞌase igne toreni mana mala aughu balugna, aonu mae igne ne theome tei.

⁸ Hamerane boibongi ka falima narane na, mae igne ne kegra haghe ne tarabana mala tei, nu kmagna gaꞌase igne ne cheke eghu ka mana, “Te keli na tahati na ghamu ghu eghuteuna jame grafi are eghu ame tei nga iagho eghu.” Aonu mare neke eni keha gaghamu na.

⁹ Kate tarabana mala tei teu retilo na, kmagna gaꞌase igne neke cheke eghu, “Gognarogne la rafihi. Te keli na aughu bongi na mala gleꞌa noughu themu. Hamerane boibongi nathuꞌu ame tei nga ghotilo eghu.”

^10-11 Nu gognarona mae igne tirogna teke thuru ka namono igne. Aonu mana balu fapea khetogna na, nei nogna mae gloku na, nei phei nogna dongki re eghu ne jifla ka namono igne. Eghuteuna kate mei namo ka namono Jebus te kiloi Jerusalem igne la romno fara hi. Mae gloku na ne cheke eghu ka nogna funei na, “Ei, funei, tahati na ari thuru Jebus!”

^12-13 Nu mana ne cheke eghu ka mae gloku igne, “Theo, tahati theome tangomana te ari au ka namono tuana naugna naiknogna namono tuana theome vikegna Israel. Tahati na teiu ngala. Tahati ginauna ari thuru namono Gibea ba Rama.”

¹⁴ Mare tei ne namo ka namono Gibea, kaisei nodi namono vikegna Benjamin. Eghuteuna naprai na pluluhi.

¹⁵ Aonu retilo tei ka namono igne ne hiro vido mala thuru. Retilo tei gnokro neu ka glalaba na, nu theo kaisei naikno te mei te hatadi te tei ka sugagna na.

¹⁶ Kate gnokro teu retilo jare na, kaisei mae khuekuꞌe gna vikegna Efrem neke mei funugna ka nagare ro. Mae khuekuꞌe igne mei funugna ka thogele ka nohi vikegna Efrem mei au neu Gibea. Nu naikno te gnafa gna namono igne neke mei funudi ka vikegna mae Benjamin.

¹⁷ Kate filodi retilo igre te gnokro teu ka glalaba na, mana filo glanidi retilo igre naikno phosa. Aonu mana mei ne ghusna eghu, “Ghotilo neke mei funumi aheva? Ghotilo ginauna tei aheva?”

¹⁸ Aonu mae igne ne cheke eghu, “Ghetilo neke tei Betlehem agno Juda, eghuteuna gognarona, ghetilo nake kulu tei tarai ghu ka nogna suga tapuale te blahi Lord na, ame ke figri nga ka nomi namono na mata ka thogele ka nohi vikegna Efrem. Ghetilo magnahaghei te mei thuru agne, nu theo kaisei naikno te mei cheke ghami te mala tei ka suga gna na.

¹⁹ Ghetilo hata gano maladi nomi dongki gre nei bret nei waen eghu malami themi, eghume, ghetilo auhi gobigna lepo te magnahaghedire, nu aheva te mala thuru na kolho.”

²⁰ Aonu mae khuekuꞌe igne ne cheke eghu, “Thosei nanga nomi. Ari ka suga. Iara ginauna reireghi ghami ghotilo, nu ghotilo thosei thuru agne.”

²¹ Aonu mana hatadi ne tei ka sugagna na, eghuteuna mana jaola ne faghaghamu phei dongki igre. Ke leghu retilo ne titihi ghahedire, eghuteuna mare ghamu nei koꞌu fodu.

²² Kate ghamu glealeꞌa teu mare na, kaisei tothoghei mae te diꞌa ka namono igne falithuini suga na tutini grengatha na ne eha eghu, “Iagho hata mei mae te mei ka sugamu iagho agne ia, mala lalahu nomi ka mana.”

²³ Mae khuekuꞌe igne jifla ne cheke eghu, “Kheraguro! Thosei eni nafnata puhi te diꞌa tuana ka mae ihei te mei ka sugagu iara na, puhi te eni ghotilo igne thono diꞌa fara!

²⁴ Nu iara tangomana te snakreni ka ghotilo thugu gaꞌase majaghani te theome thuru teu kaisei mae balugna na. Eghuteuna ghotilo jaola tangomana te hata fapea khetogna mae igne mala eni ghotilo unha te magnahagheni ka repa na. Nu ghotilo thosei eni puhi te diꞌa tuana ka mae igne.”

²⁵ Nu mare tirodi fanomho ka mana. Aonu mae Livaet igne hata fapea khetogna na ne huju fakosi ka mare. Mare repini naꞌa ne eni puhi te diꞌa na ka naꞌa ne ghilei goigoni ni fara naꞌa. Mare repini naꞌa ne ghilei hamerane ne lisani nga mare.

²⁶ Hamerane boibongi, gaꞌase igne neke figri ne khoko soru rhegna grengathagna suga aheva te au teu khetogna na. Eghuteuna naꞌa fnuda ka vido igne ne ghilei haghe naprai na.

²⁷ Kate dofra fapea khetogna na te tora grengatha na tarabana mala ke tei teu na, mana filoni gaꞌase igne thuru neu ke ulugna grengatha na eghuteuna khamegna namo ka grengatha na.

²⁸ Mana ne cheke eghu ka naꞌa, “Kegra haghe age noda!” Nu gaꞌase igne theome cheke, aonu mana pala haghe thinigna na ka nogna dongki na hata ne tei ka namono.

²⁹ Kate posa ka suga na, mana hata naflahi na ne vahe thinigna gaꞌase tela lehehi igne ne edi nabotho phei vido. Aonu mana ne fatei kaisei vido ka vike te gnafa ka nabotho phei vikegna Israel.

³⁰ Iheire te filoni glepo igne ne cheke eghu, “Tore! Funu ka narane teke jifla Ijep kuꞌeda tahati tifa ra te ghilei mei posa ka narane gognarogne, theo kaisei glepo teke eni jateula igne teuna. Tahati ghathoni glepo igne. Uve, tahati na eni kaisei glepo eigna puhi biꞌo igne!”