Jajis 18 - Buka Blahi Ka Cheke Holo

Vikegna Dan ne tugha tei ka namono ke raru

¹ Ka narane tuana, naiknodi Israel theo nodi king ngau. Eghuteuna vikegna Dan hiro glose mala khotogna thedi, naugna mare theome tangomana te uluni glose teke vahini Josua maladi mare teku na jateula keha vikegna Israel eghu.

² Ka narane tuana, mare vavahi glima mae nheta ka vike mare ka phei namono Sora ghe Estaol. Aonu mare ne kurudi glima mae igre mala tei filo fakeli ka rijon igne mala filoni kaisei namono majaghani malagna vike igne mala au mare tagna. Kate tei glima mae igre te posa ka thogele kantri Efrem igne, mare tei ne au ka sugagna Maeka ne thuru jare.

³ Mare ne nomhini chekegna pris ka vikegna Livae igne. Mare nomhi glani naoglagna mana na thofno jateula naogla maegna Juda eghu. Aonu mare tei ne ghusna eghu ka mana, “Ei, ihei teke hata mei nigho agne na, eghuteuna unha te eni iagho ka namono igne? Naugna unha gho ne mei agne gnea?”

⁴ Eghuteuna mana ne cheke eghu, “Maeka neke foli ghau iara mala nogna pris mana.”

⁵ Mare ne cheke eghu ka mana, “Ghehati magnahaghei nigho iagho te toreni God jame unha te fariuriu edi ghehati igre ginauna keliu kolho ba theo.”

⁶ Pris igne ne cheke eghu, “Thosei nanga nomi, eigna Lord na keli tagna fara ka nomi thei ghotilo gne.”

⁷ Aonu glima mae igre ne tei ka namono Lais te khaba ke raru. Ka namono igne glima mae igre laseni te gaoghathodi naiknogna namono tuana muana eghu. Eghuteuna nodi kastom mare na jateula kastom gna namono Saedon eghu, neuba Saedon ne khaba fara ka namono igne. Mare naikno fakmukmu kolho eghuteuna mare theome lase magra ba eni kaisei puhi ka keha naiknore. Eghuteuna mare au kmana famane glepo ka nodi namono na. Eghuteuna mare theome nanga nodi kolho ka keha naikno te au rhedi mare re.

⁸ Ke leghu, glima mae igre neke pulo Sora nei Estaol. Kheradire ne ghusna eghu, “Unha te filoni ghotilo ka namono tuana?”

⁹ Glima mae igre ne cheke eghu, “Uve, ghehati filoni nodi namono mare na Lais igne thofno keli fara! Eghume tahati na tei ka namono tuana mala magra ka mare. Eghuteuna tahati mala ghosei tei mala hata namono igne.

¹⁰ Kate tei te posa tahati ka namono tuana, ghotilo ginauna filodi naiknore gaoghatho dina mare au kolho ka vido te karha eghu. Namono igne namono biꞌo eghuteuna au gobigna lepo te magnahaghedi tahati re. Eghuteuna God la snakrenihi namono igne ka tahati!”

¹¹ Aonu namno gobi soldia ka vikegna Dan igre hata glepo mala magra ne jifla Sora nei Estaol.

¹² Kaisei bongi mare ne au rhegna Kiriat-Jaerim ke mosu Juda. Aonu mare kiloni vido igne “Mahane-Dan.” Gaoghathogna na, “Vido aheva vikegna Dan neke au katha vido.” Au ghilei mei posa ka narane gognarogne.

¹³ Mare jifla ka namono igne ne tei posa ka nogna namono Maeka ka thogele nohi ka vikegna Efrem.

¹⁴ Glima mae igre fifilo fakeli ka namono Lais ne cheke eghu ka kheradire, “Ei, kaisei maegna agne na, mana au kaisei mumuju teke horo ka silva nei kaisei nafnata pohe te kiloi efod baludi keha mumuju langau eghu. Ba, na faꞌunhadi si glepo igrea?”

¹⁵ Glima mae igre ne tei ka nogna suga Maeka na aheva pris ka vikegna Livae te au na, eghuteuna mare tei kegra ka grengatha na ne cheke fakelini Livaet igne.

¹⁶ Ka narane tuana, namno gobi soldia igre kegra neu kolho ke kosi grengatha.

¹⁷ Aonu pris igne tei au ka grengatha na baludi soldia gre. Nu glima mae igre tei lamna suga ne hata fajifla mumuju teke horo ka silva balu efod nei keha mumuju langau eghu.

¹⁸ Kate mei ke kosi baludi glepo igre, pris ne cheke faheta eghu ka mare, “Sei, unha si te eni ghotilo ignea?”

¹⁹ Nu mare ne cheke eghu ka mana, “Megeu sagho mei balumi ghehati! Iagho mala nomi pris ghehati. Eghuteuna iagho ginauna chekeni ka ghehati unha te magnahagheni God na mala eni ghehati. Jame te keli na iagho mala pris gna kaisei vike thongana gna Israel ke kelignai te pris iagho ka kaisei tharakna kolho na.”

²⁰ Pris igne ne thofno kelitagna fara ka gaoghatho igne. Aonu mana hata glepo blahi igre ne tei baludi vikegna mae Dan.

²¹ Mare jifla funu jare balu thudi nei nodi buluka nei nodi gobigna lepo teure ne kulu ulu nu soldia igre ne mei ke leghudi mare.

²² Kate tei khabahi mare ka sugagna Maeka na, Maeka laseni te blau mare glepo blahi igre, aonu mana kilodi mae iheire te au rhegna manare mala tei leghudi vikegna Dan. Eghuteuna kate mei te namo na,

²³ mare ne eha tei ka vikegna mae Dan igre. Eghuteuna vikegna mae Dan igre ne kafe figri ne cheke eghu, “Unha? Naugna unha site mei ngolhi ghami ghehati ghotilo gnea?”

²⁴ Aonu Maeka ne cheke eghu, “Ghotilo laseni unha te jafra na! Ghotilo hata nogu pris iara na baludi mumuju teke horo iara ra. Iara theo kaisei glepo te salaꞌu na!”

²⁵ Nu vikegna mae Dan igre ne cheke eghu, “Thosei cheke! Glahu keha mae ka ghehati te diꞌa puhidi igre figri mei falehe ghami ghotilo, nei iheire te gnafa ka tharaknami ghotilo ra eghu.”

²⁶ Kate nomhini cheke mare igne, Maeka neke figri neke pulo ka namono, naugna mana laseni mae igre nheta fara salaꞌudi mare.

²⁷ Aonu vikegna Dan igre jaola ne mei ne hata mae pris na baludi nogna glepo blahi mana re. Eghuteuna mare tei ne magra ka namono Lais. Naiknogna namono igne au kmu theome lase magra. Nu vikegna Dan igre aknu falehedi nei gnubra nodi namono mare na.

²⁸ Theo kaisei te toghodi naiknodi Lais igre naugna Saedon au khaba fara ka mare, eghuteuna naiknodi Lais igre theome tangomana te au baludi naikno te au rhedire. Namono igne au ka kaisei glogu rhegna namono Bet-Rehob. Ke leghu, vikegna Dan igne neke horo fakeli namono igne neke au tagna.

²⁹ Aonu mare neke tughu nangha namono Lais teu igne neke kiloni Dan, nanghagna kuꞌedi mare tifa thugna Jekop.

³⁰ Mare ne lisei haghe mumuju teke horo ka silva hata teke mei mare mala tarai. Eghuteuna Jonatan mae ihei teke karha ka vikegna Gesom, thugna Moses, teke pris ka mare na. Eghuteuna iheire te karha mei ke leghu ka vikegna mana igne, mare te mala loku jateula pris teu te ghilei thokeni narane te mei nodi naoka maedi Israel igre hata teke teidi mala sneka ka keha kantri te khaba fara delei.

³¹ Eghume mumuju teke lisei haghe vikegna Dan igre, au fabrahu ngala ka namono igne ka narane naiknodi Israel te tarai ka Lord ka suga tapuale te blahi jare Saelo.