Jajis 17 - Buka Blahi Ka Cheke Holo

Maeka ne sari kaisei mumuju

¹ Kaisei mae nanghagna na Maeka, vikegna Efrem. Mana au ka thogele ka nogna glose Efrem.

² Kaisei narane, mana ne cheke eghu ka idogna na, “Iara nomhi nigho iagho te nhaꞌa lao kaisei thibri mala thokeni ihei teke blau kaisei thogha kaisei gobi nou vido silva iagho. Iara kolho teke hata na, au ngala balugu iara.” Aonu idogna na ne cheke eghu, “Thuguo, iara toreni Lord mala fablahi nigho.”

³ Aonu Maeka neke tusu fapulo silva koen igre ka idogna na. Eghuteuna idogna na ne cheke eghu, “Gognarona iara fablahini silva koen igre mala tei ka Lord mala au kaisei nogna mumuju thugu iara gne.” Aonu idogna na ne cheke eghu ka Maeka, “Gognarona, iara tusu ari silva koen igne ka iagho.”

⁴ Nu Maeka neke tusu fapulo silva koen igre ka idogna na. Idogna Maeka na hata fajifla phia gobi silva koen ne tusu lao ka kaisei mae mala horo kaisei mumuju. Mare ne lilisei igne ka nogna suga Maeka na.

⁵ Maeka horo haghe kaisei vido blahi malagna nogna mumuju na, eghuteuna mana edi keha mumuju mala au ka suga, nei kaisei pohe blahi te kiloi efod. Eghuteuna mana fablahini kaisei thugna te mala pris gna nogna vido blahi na.

⁶ Ka narane tuana, naiknodi Israel igre theo nodi king ngau, aonu mare edi kolho unha te doglo ka gaoghathodi thedire.

⁷ Kaisei mae majaghani ka vikegna Livae au Betlehem jare ka nodi glose vikegna Juda, nu mana theome maegna ka namono tuana.

⁸ Mana jifla Betlehem ne tei hironi kaisei namono majaghani mala au tagna. Kate tei mana na, mana tei ne posa ka sugagna mae Maeka na ka thogele ka nohi vikegna Efrem.

⁹ Maeka ne ghusna eghu ka mana, “Iagho maemu aheva?” Eghuteuna mana ne cheke eghu, “Iara kaisei mae Livaet mei funu Betlehem jare Juda. Iara hironi kaisei namono mala au tagna.”

¹⁰ Aonu Maeka ne cheke eghu ka mana, “Iagho mei au kolho balugu iara agne. Iagho ginauna mala nogu pris iara, eghuteuna iagho ginauna cheke ranghi ghau iara unha te magnahagheni God te mala eni iara na. Iara ginauna tusu ari ka iagho nabotho silva koen nabagna kaisei finogha, eghuteuna iara ginauna tufa pohe nei gano eghula ka iagho.”

¹¹ Aonu mae Livaet igne ne keli tagna te au ka namono igne. Maeka ne reireghi fakelini mana jateula kaisei thugna neu.

¹² Aonu Maeka ne fablahini mae majaghani igne mala kaisei mae pris, eghuteuna leuleghu fata na mae igne au kolho ka sugagna Maeka.

¹³ Eghuteuna Maeka ne cheke eghu, “Iara gognarona laseni Lord ginauna mana fablahi ghau iara, naugna kaisei mae Livaet la nogu pris iara.”