Jajis 16 - Buka Blahi Ka Cheke Holo

Samson ne tei Gasa

¹ Kaisei narane, Samson ne tei Gasa, kaisei nodi namono naiknodi Filistia. Kate au teu Samson Gasa na, mana ne filoni kaisei gaꞌase vine, eghuteuna mana tei ne thuru balugna naꞌa.

² Kate nomhini maedi Gasa igre te au teu Samson ka namono igne, mare kafe mei ne ofo neu ka grengathagna gringnigna namono na mala faleheni mana. Eghuteuna ka bongi igne, mare ne cheke eghu fari thedi, “Tahati ginauna ofou ghilei ghagra pasa, eghuteuna tahati ginauna faleheni mana.”

³ Nu Samson thuru ne ghilei farihotei bongiro. Aonu mana kegra haghe, eghuteuna mana mei ne loku ka grengatha biꞌogna namono igne. Eghuteuna mana korho grengatha igne baludi phei kegra re, nei bibilakhigna grengatha igne. Aonu mana pala ne tei gobigna lepo igre delei ke kligna thogele ke mosu namono Hebron te khaba fara.

⁴ Ke leghudi igre, Samson ne magnahagheni fara kaisei gaꞌase te au ka glogu Sorek. Nanghagna Delila.

⁵ Goro mae funeidi Filistia igre tei ka Delila ne cheke eghu ka naꞌa, “Ghehati magnahaghei nigho iagho te chaghini Samson, mala chekeni mana ka iagho unha te eni ka mana te rheta fara mana igne. Iagho hironi kaisei puhi te mala haruni ghehati mana mala theome tangomana mana te eni kaisei glepo na. Jame te eghu iagho na, mae funei te gnafa ka ghehati igre ginauna tusu ari kaisei thogha kaisei gobi silva ka iagho.”

⁶ Aonu Delila tei ka Samson ne cheke eghu, “Samson, ne unha site rheta fara iagho gnea? Faꞌunha eghu ame tangomana nga iagho te glaꞌe te mala haru nigho na?”

⁷ Samson ne cheke eghu, “Jame te haru ghau iara mare ka fitu phukri phaloho majaghani na, iara ginauna glaꞌe jateula keha mae are eghu na theome tangomana te eni kaisei glepo na.”

⁸ Kate nomhini mae funei igre cheke igne, mare hata ne mei fitu phukri phaloho majaghani ka Delila, eghuteuna naꞌa ne haruni Samson ka phukri igre.

⁹ Naꞌa pophoru neu keha mae lamna ka chogho rhegna te au repa na. Eghuteuna naꞌa ne eha eghu, “Samson, kegra haghe! Maedi Filistia igre la jifla mei mala loki nigho iagho!” Nu Samson ne tungnu kusu phukri igre jateula phukri te khusu ka khaꞌaghi ra neu. Aonu mare theome laseni unha te eni te rheta fara mana tagna igne.

¹⁰ Ke leghu, Delila ne cheke eghu, “Iagho thofno chaghi ghau iara eghuteuna iagho filo ghau iara jateula kaisei naikno fameomekro eghu! Chekeni ka iara unha glepo te tutuani na. Jame kaisei mae magnahaghei haru nigho iagho, unha nate eni mana na?”

¹¹ Samson ne cheke eghu, “Jame te haru ghau iara na, mare hata phukri majaghani te theo kaisei mae teke loku tagna tifa na, iara ginauna glaꞌe kolho jateula keha mae are eghu.”

¹² Delila hata phukri majaghani ne haruni Samson. Mae teke poru teku jateula tifeiro ia neu. Delila ne eha eghu, “Samson dofra haghe! Maedi Filistia tela mei igre mala loki nigho iagho!” Nu Samson kegra haghe ne kusu phukri igre ka khamegna na jateula grua ghajo neu kolho.

¹³ Aonu Delila ne cheke eghu, “Iagho thofno chaghi ghau iara, eghuteuna iagho filo ghau iara na jateula kaisei naikno fameomekro eghu kolho. Glepo te chekedi iagho igre theome tutuani! Uve, jame kaisei mae magnahaghei haru nigho iagho, unha nate eni mana na?” Eghuteuna Samson ne cheke eghu, “Iagho laseni iara au fitu glopo khaklagu te brahu, eghuteuna jame hata iagho igre te haru ka pohe te edi iagho igre, eghuteuna iagho famamhaku ka gajugna masin te ei pohe igne teuna, iara ginauna glaꞌe kolho jateula keha mae are eghu.”

¹⁴ Kate thuru teu Samson na, Delila ne haru fitu glopo khaklagna mana igre ka pohe teke horo naꞌare, eghuteuna fagefe lao ka gajugna masin te mala ei pohe na. Aonu naꞌa ne eha eghu, “Samson dofra haghe! Maedi Filistia tela mei igre!” Aonu mana ne kegra haghe, eghuteuna mana kaisei fata korho haghe kolho khaklagna re baludi gaju nei pohe eghu teke maku ka masin teke chakhi tagna khakla igre.

¹⁵ Aonu Delila ne tanhi eghu ka mana, “Samson, faꞌunha eghu iagho chekeni, iagho ne thofno namha ghau iara teuna? Iagho la ghilei thilo fata chaghi ghau iara! Naugna unha sagho te theome chekeni ka iara unha te eni ka iagho te rheta fara gnea?”

¹⁶ Leuleghu narane kolho naꞌa te ghusnani mana eigna nogna narheta mana na ghilei namo lehe mae Samson.

¹⁷ Aonu leghu lahu na mana ne ghilei toutonu ka naꞌa unha teke poruni mana na. Mae Samson ne cheke eghu, “Tifa na, funu ka narane teke karha iara na, mare neke theome kuchi khaklagu iara na naugna mare neke fablahi ghau iara ka God mala kaisei Nasaraet. Jame te kuchi mare khaklagu iara na gognarogne, iara ginauna na theome nheta eghuteuna iara ginauna glaꞌe kolho jateula keha mae are eghu.”

¹⁸ Aonu Delila laseni Samson te cheke kate tutuani na. Naꞌa ne fatei cheke ka mae funeidi Filistia, ne cheke eghu, “Ghotilo ke mei kaisei fatai. Gognarona, mana la cheke kate tutuani ka iara.” Aonu mare neke pulo mei balu seleni ka khamedire.

¹⁹ Delila ne fathuru soruni Samson ka phei ghahegna re, eghuteuna mana ne thofno thuru iho. Eghuteuna kate thuru iho teu mana na, kaisei mae mei ne kuchi fitu glopo igre ka khaklagna mana re. Aonu ka puhi igne naꞌa ne funu faparini mana, eghuteuna nogna narheta mana na ne tei kokoni mana.

²⁰ Eghuteuna naꞌa ne eha eghu, “Samson dofra haghe! Maedi Filistia igre la mei!” Aonu Samson ne dofra haghe. Kate dofra haghe na, mana ghaoghathogna na ne keli neu kolho na snagla teu nogna eghu. Nu mana theome laseni nogna nolaghi Lord tela tei kokonihi mana na.

²¹ Aonu maedi Filistia igre mei ne lokini mana ne bilo koko phei tathagna mana re. Mare ne hata tei mana Gasa. Ka namono igne, mare ne haruni mana ka chen biꞌo teke horo ka bras, nei liseini mana ka suga sosolo. Eghuteuna nogna gloku mana na mala figri thina biꞌo mala ghorhu wit mala ei flaoa.

²² Nu kate au ka sosolo na khaklagna mana re neke funu kotu fapulo.

Samson ne lehe

²³ Goro mae funeidi Filistia igre salo fodu mei ne eni kaisei gaghamu biꞌo, mare fafara ne cheke fakelini nodi god Degon. Mare koje ne cheke eghu, “Gognarona, noda god tahati igne la uluni noda naoka tahati Samson!”

²⁴ Eghuteuna kate filoni naiknore mumujugna Degon na, mare koje ne cheke fakelini nodi god igne, “Samson neke goigonidi noda glose tahati ra, eghuteuna mana neke aknu falehe kmana mae ka tahati. Igne noda naoka tahati ia, nu noda god tahati na togho ghita ne uluni mana!”

²⁵ Ka narane tuana, mae funei re ne glealeꞌa fara aonu mare ne cheke eghu, “Tei hata fajifla mei Samson ka sosolo, mala maꞌe nodani!” Mae funei igre hatani mana ne mei, eghuteuna mare maꞌe ne maꞌeni mana. Aonu, mare ne fakegra mana farihoteidi khegra biꞌo ke lamnagna nodi Sugablahi na.

²⁶ Samson ne cheke eghu ka mae majaghani te reireghini mana na, “Iara magnahaghei te loku ka phei khegra biꞌogna Sugablahi na naugna iara magnahaghei te gnafa kakatha.”

²⁷ Sugablahi igne thofno fodu salaꞌui ka mae nalhaꞌu nei gaꞌase, eghuteuna mae funei te gnafadi Filistia re jaola au baludi mare. Eghuteuna sare ke tagru Sugablahi na, jame thilo thogha nalhaꞌu nei gaꞌase filo soru ka Samson ne maꞌeni mana.

²⁸ Aonu Samson ne tarai, “Lord God, ghatho ghau iara. God, ke farheta ghau kaisei fata. Naiknodi Filistia igre bilo kokohi phei tathagu iara gre, eghume iara magnahaghei nigho iagho teke tughu fapulo unha teke eni mare ka iara na.”

²⁹ Aonu Samson ne loku kaisei khamegna ka kaisei khegra biꞌo eghuteuna keha khame na ka keha khegra biꞌo na neu ka Sugablahi na.

³⁰ Mana eha fabiꞌo, “Snakre ghau iara mala lehe baludi naiknodi Filistia igre!” Ka na nhetagna fateote'o, mana ne huta tei phei khegra igre, eghuteuna Sugablahi na ne grofo ne soru ke klignadi mae funei nei naikno eghu teke au ke lamnagna. Ka narane te lehe Samson igne, mana ne falehe ke kmana naikno salaꞌudi teke aknu falehe mana kani teke karha teku na.

³¹ Thabusigna nei vikegna teu te gnafa ka tharaknagna mana re ne kafe tei Gasa hata thinigna mana na neke pulo giugiluni mana ka vido aheva teke giugilu mare kmagna mana, Manoa. Vido igne au farihoteidi phei namono Sora ghe Estaol. Samson neke kaisei nodi lida maedi Israel nabagna varadaki finogha.