Jajis 14 - Buka Blahi Ka Cheke Holo

Samson ne tolaghi ka kaisei gaꞌasegna Filistia

¹ Kaisei narane, Samson ne soru ka namono Timna, eghuteuna mana ne filoni kaisei gaꞌasegna Filistia.

² Kate pulo ka namono na, mana ne cheke eghu ka kmagna ghe idogna, “Iara magnahaghei ghami ghopa te tei toreni kaisei gaꞌasegna Filistia te au ka namono Timna teke filoni iara na, naugna iara magnahaghei te tolaghi ka naꞌa.”

³ Nu repa ne cheke eghu ka mana, “Tahati au kmana gaꞌase ka vikeda tahati igre, nei ka keha naiknodi Israel aheva iagho tangomana te tolaghi na. Naugna unha sagho te magnahaghei tei hata khetomu Filistia ka naikno bongihehe igrea?” Samson ne cheke eghu ka mae kmagna na, “Ghopa tei atha mei gaꞌase ia naugna iara magnahagheini fara naꞌa.”

⁴ Ka narane tuare, Filistia funei fruni ni Israel. Tutuani, unha te eni Samson igne naugna Lord magnahaghei te goigoni ni Filistia. Nu idogna nei kmagna teu mana igre theome laseni igne.

⁵ Eghuteuna Samson nei idogna kmagna teu igre ne sukha Timna. Eghuteuna kate nolo te tei mana ka kaisei nagare grep rhegna namono Timna igne, mana ne nomhini kaisei lion ne nguru fabiꞌo ne jifla mei ka mana.

⁶ Nu Tharunga gna Lord na ne soru mei ka mana ne farhetani fara mana, eghuteuna mana tei ne aknu falehe lion igne, eghuteuna mana ne kina sasakani thinigna lion igne ka khamegna na kolho. Mae Samson ne aknu falehe lion igne jateula mae Samson te aknu falehe sua nanigot ra eghu kolho. Nu mana theome chekeni glepo igne ka idogna ghe kmagna gre.

⁷ Kate posa retilo Timna na, Samson ne cheke ka gaꞌase igne, eghuteuna mana thofno magnahagheni fara naꞌa.

⁸ Ke leghu, Samson nei idogna kmagna gre eghu neke sukha Timna mala tolaghi Samson ka gaꞌase igne. Kate nolo te tei retilo na, mana tei ne filoni lion teke aknu falehe mana na. Eghuteuna mana ne jaglo nogna fara te filodi kmana jurukuli fodu lamna ka thinigna lion igne.

⁹ Mana hata keha ghamu ne tei. Eghuteuna kate mei posa ka idogna kmagna gre ka nabrou na, mana ne tufa keha ka repa, nu mana ne theome toutonu ka repa aheva teke hata fajifla mana ka thinigna lion te lehe igne.

¹⁰ Eghuteuna, kmagna mana na tei ne filoni gaꞌase igne. Aonu Samson ne eni kaisei gaghamu biꞌo leghuni nodi kastom mae majaghani nate tolaghi na.

¹¹ Eghuteuna kheragna gaꞌase igne ne filoni Samson, aonu mare ne vavahi tolufulu mae majaghani mala au balugna mana ka gaghamu igne.

¹² Samson ne cheke eghu ka mare, “Iara ginauna toutonu kaisei grougromu ka ghotilo, eghuteuna ghotilo mala chekeni ka iara gaoghathogna na ke lamnadi fitu narane ka gaghamu igne. Jame te chekeni ghotilo gaoghathogna grougromu igne na, iara ginauna tusu ari ka ghotilo tolufulu lavalava teke horo ka famane pohe vegha nei tolufulu pohe mala pipichi ka gaghamu.

¹³ Nu jame te theome chekeni ghotilo gaoghathogna na te ghilei posa ka fafitu naranegna gaghamu igne, ghotilo ginauna tusu mei ka iara glepo igre.” Mare ne cheke eghu ka mana, “Uve, iagho cheke mei mala nomhini ghehati nou grougromu iagho na.”

¹⁴ Aonu mana ne cheke eghu, “Gano na jifla mei funu ka glepo te tangomana te ghamu na. Glepo te mamahe na jifla mei ka glepo te rheta na.” Thilo narane salaꞌu, nu mare theome tangomana te cheke thakleni gaoghathogna grougromu igne.

¹⁵ Aonu ka fafati narane na, mare mei ne cheke eghu ka khetogna mana na, “Ei, iagho chaghini mae igne, mala cheke thakleni mana gaoghathogna grougromu igne ka ghehati. Na eghu nu gnubra nigho ghehati ke lamnagna nou suga na eghu, baludi iheire te gnafa ka tharaknagna kmamu iagho na. Iagho jau kilo mei ghami ghehati ka gaghamu igne mala hata nomi glepo ghehati re neku signe!”

¹⁶ Aonu naꞌa mei ne filoni Samson, eghuteuna naꞌa tanhi ne cheke eghu, “Iagho theome namha ghau iara kolho! Jame namha ghau iara na, iagho jame cheke thakleni gaoghathogna grougromu igne ka kheragu iara igre!” Nu Samson ne cheke eghu ka naꞌa, “Sei, iara jaola theome chekeni gaoghathogna grougromu igne ka idogu kmagu re! Eghume faꞌunha eghu iara chekeni ka iagho?”

¹⁷ Aonu gaꞌase igne ne tanhi fabrahu ka mana ne ghilei thokeni fafitugna narane gaghamu igne. Eghuteuna naugna te tanhi fabrahu fara naꞌa igne, eghuteuna naꞌa toreni mana fabrahu kmana fata teu igne, ka fafitu narane na Samson ne cheke thakleni gaoghathogna grougromu igne ka naꞌa. Eghuteuna naꞌa tei ne cheke ka kheragna re.

¹⁸ Ka narane tuana, ame plulu nga naprai na teuna, maedi Filistia igre mei ne cheke eghu ka mana, “Unha gne te mamahe salaꞌuni jurukuli na? Eghuteuna unha gne te rheta salaꞌuni lion na?” Samson ne cheke eghu ka mare, “Ghotilo neke huhuruni khetogu iara na mala cheke thakleni gaoghathogna grougromu igne, jateula mae te huhuruni gaꞌase na mala loku ka nogna nagare na ia eghu. Jame theome chekeni naꞌa ka ghotilo meuna, ghotilo jame theome laseni nogu grougromu iara igne!”

¹⁹ Eghuteuna Tharunga gna Lord na ne mei farheta fara ka mana. Mana sukha ka namono Askelon. Eghuteuna ka namono igne, mana ne aknu falehe tolufulu mae ne hata nodi pohe mare re. Samson tei Timna ne tusu lao pohe igre ka mae iheire teke chekeni gaoghathogna grougromu igne. Mana thofno diꞌatagna fara eigna glepo igne, aonu mana neke pulo ka namonogna kmagna na.

²⁰ Nu kmagna khetogna Samson na hata khetogna Samson na ne tusu lao ka kaisei maegna Filistia teke gnokro balugna mana ka gaghamu tholaghi igne.