Jajis 10 - Buka Blahi Ka Cheke Holo

Tola ne kegra funeigna Israel

¹ Ke leghugna te lehe Funei Abimelek igne, Tola thugna Pua, ihei teke thugna Dodo, mana teke kegra funei ka naiknodi Israel. Mana kaisei mae ka vikegna Isaka, eghuteuna nogna namono mana na Samia ka thogele Efrem.

² Mana baubatu ka naiknodi Israel nabagna varadaki thilo finogha. Kate lehe mana na, mare neke giugiluni mana Samia.

Jaea ne kegra funeigna Israel

³ Ke leghugna te lehe Tola igne, Jaea maegna Gilead, mana ne kegra funei ne baubatu ka naiknodi Israel nabagna varadaki phei finogha.

⁴ Mae igne au tolufulu thugna nalhaꞌu, eghuteuna naugna mae igre lida, mare kafe saghe ka dongki. Eghuteuna mare reireghi tolufulu namono ke lamnagna kantri Gilead, eghuteuna nanghadi tolufulu namono igre kilodiu ngala, “Nogna Namono Jaea” ghilei mei posa ka narane igne.

⁵ Kate lehe mana na, mare ne giugiluni mana ka namono Kamon.

Naiknodi Israel theome ghatho tahuniLord

⁶ Eghuteuna theome raugha ke leghudi igre, naiknodi Israel igre ne funu huhughuni Lord ne tarai ka mumujudi Baal ghe Astarot. Mare jaola tarai ka nodi god naiknodi Siria, nei nodi god naiknodi Saedon, nei nodi god naiknodi Moab, nei nodi god naiknodi Amon, nei nodi god naiknodi Filistia.

⁷ Aonu Lord ne diꞌatagna fara ka naiknodi Israel ne lisa lao ka vikegna Filistia ke mosu nei vikegna Amon ke maghati mala mei magra ka mare.

⁸ Aonu ka finogha te lehe Jaea igne, mare mei ne thofno goigonidi naiknodi Israel te au Gilead ka nodi rijon vikegna Amoa ke maghati Khoꞌu biꞌo Jordan nabagna nabotho nhana finogha.

⁹ Eghuteuna vikegna Amon igre jaola ne tei kasa ka Khoꞌu biꞌo Jordan mala tei magra ka vikegna Juda, nei ka vikegna Benjamin, nei ka vikegna Efrem. Naugna igne naiknodi Israel igre ne au papara fara.

¹⁰ Aonu, mare tanhi ka Lord mala toghodi ne cheke eghu, “Lord God, iagho nomi God ghehati. Ghehati edi unha te thofno diꞌa fara ka tathamu iagho na kate tarai ghehati ka mumujugna Baal.”

¹¹ Lord ne cheke tughuni nodi tharai mare igne ne cheke eghu, “Tifa te mei na, vikegna Ijep, nei vikegna Amoa, nei vikegna Amon, nei vikegna Filistia,

¹² nei vikegna Saedon, nei vikegna Amalek, nei vikegna Maon teu igre neke thofno goigoni ghami ghotilo. Eghume ghotilo tanhi mei ka iara mala togho ghami ghotilo. Leuleghu fata na iara ngala te hata fajifla ghami ghotilo ka khamedi mare igre.

¹³ Nu neuba, ghotilo tei koko ghau iara eghuteuna ghotilo tarai ka keha god delei. Ginauna iara na theome tangomana nate fakarhi ghami ghotilo na.

¹⁴ Tei si ghotilo tanhi ka keha god te tarai ghotilo tadi are. Toredi mala fakarhi ghami kate thoke mei puhi biꞌo ka ghotilo na!”

¹⁵ Nu mare ne cheke eghu ka Lord, “Ghehati edi kmana glepo te diꞌa ranghi nigho iagho. Te keli na iagho eni ka ghehati unha te thofno doglo fara ka gaoghathomu iagho na. Nu ghehati magnahaghei nigho iagho te fakarhi ghami gognarona.”

¹⁶ Aonu mare ne lisei fadelei god teke tarai mare tadire ne loku ranghini Lord. Eghuteuna Lord ne kokhoni nognadi naiknodi Israel naugna mare ne au papara fara.

Jefta ne kegra funeigna Israel

¹⁷ Ka narane tuare armigna Amon ne tarabana mala magra, eghuteuna mare mei ne au rijon Gilead. Eghuteuna naiknodi Israel igre jaola ne mei au ka namono Mispa ka rijon igne.

¹⁸ Mae mala baubatu ka naiknodi Gilead igre ne cheke eghu fari thedi, “Ihei nate batu ghita te mala tei magra ka armigna Amon? Mae ihei nate batu ghita tahati na, mana ginauna mala funei fruni ghita tahati naikno te gnafa agne Gilead.”