Jajis 1 - Buka Blahi Ka Cheke Holo

Vikegna Juda nei vikegna Simion ne lokini King Adonibesek

¹ Ke leghugna te lehe mae Josua na, naiknodi Israel igre ne ghusna eghu ka Lord, “Vikegna ihei gne nate kulu tei magra ka naiknodi Kenan igre?”

² Lord ne cheke eghu ka mare, “Vikegna Juda nate kulu tei magra na, naugna iara neke tufa glose ka mare.”

³ Vikegna Juda igne ne cheke eghu ka vikegna Simion kheradi mare igre, “Keli fara te mei ghotilo balumi ghehati te mala ari magra tahati ka naiknodi Kenan te au ka glose teke tufa God ka ghehati ia. Ke leghu, ghehati ginauna tei balumi ghotilo mala magridi iheire te au ka glose teke tufa God ka ghotilo na.” Aonu phei vike igre tei fodu ne magra.

⁴ Lord toghodi phei vike igre ne uludi naiknodi Kenan nei naiknodi Peris. Uve, ka narane tuana mare ne aknu falehe nabotho thogha mae ka namono Besek.

⁵ Eghuteuna ka magra igne mare ne filoni King Adonibesek, eghuteuna mare brue teini mana baludi naiknodi Kenan nei Peris.

⁶ King igne ne fuha rikha, nu mare ngholini ne lolhokuni mana, eghuteuna mare ne kusu koko phei geghesu biꞌo ka khamegna nei ghahegna teu mana re.

⁷ Mana ne cheke eghu, “Tifa na, iara neke jaola neke kusu koko geghesu biꞌo khamedi fitusalei king, eghuteuna mare au fadiꞌa jateula khuma te ghamu phike gano ke parigna nogu tevo iara na ia eghu. Gognarona God kela tughu fapulo unha teke eni iara ka mare na.” Mare atha ne teini mana Jerusalem, aonu ke leghu, mana ne lehe jare.

Vikegna Juda ne uludi phei namono Jerusalem ghe Hebron

⁸ Maedi Juda igre tei ne magra Jerusalem. Mare uluni namono igne ne aknu falehe ne gnafa naikno te au jare re, eghuteuna mare ne nhako namono igne.

⁹ Ke leghugna igne, mare tei ke mata mala magra ka naiknodi Kenan te au ka thogele ro, nei ke mata namono nagou, nei ka gukhu ke mosu.

¹⁰ Eghuteuna mare tei ne magra ka naiknodi Kenan ka namono Hebron, nanghagna ulu lahu na Kiriat-Aba. Ka namono igne mare ne uludi vikegna Sesae, nei vikegna Ahiman nei vikegna Talmae.

Otniel ne uluni namono Debia

¹¹ Aonu maedi Juda jifla ka namono igne ne tei magra ka namono Debia, nanghagna ulu lahu na Kiriat-Sefa.

¹² Aonu Kelab ne cheke eghu, “Jame kaisei mae batu ghita mala magra ka namono tuana, ghilei uludi mare, iara ginauna snakreni thugu gaꞌase Aksa ka mana mala tolaghi ka mana.”

¹³ Mae Otniel, thugna Kenas, mae Kenas gne tahigna Kelab. Aonu Otniel ne uluni namono igne. Kelab ne snakreni thugna gaꞌase na ka mana, aonu repa ne tolaghi.

¹⁴ Ke leghugna tolaghi te gnafa na, Aksa ne cheke ka Otniel mala tei toreni kmagna mala snakre lao keha vido glose ka repa. Naꞌa tei ne filoni kmagna, eghuteuna kate tei thoke naꞌa ka namono na te krofu soru ka nogna dongki na, kmagna na ne ghusna eghu ka naꞌa, “Aksa, unha neu iagho ia?”

¹⁵ Aonu naꞌa ne cheke eghu, “Mama, kokhoni ghau iara. Vido glose ke mata namono nagou teke snakre mei iagho ka ghepa ia thono moja fara. Iara magnahaghei nigho iagho te snakre mei ka ghepa keha vido glose te au khoꞌu tagna.” Kmagna na ne snakre lao ka repa vido glose te au phei seu tagna na, keha na au ke holo eghuteuna keha na ke paka.

Magra glose na theome ke gnafa

¹⁶ Vikegna nanghogna naꞌa Moses te vikegna Kein igne, mare ne tei baludi vikegna mae Juda. Mare ne kafe jifla ka namono Jeriko te kiloi namono thubo igne, eghuteuna mare ne tei ne au ke mata namono nagou rhegna namono Arad baludi naiknodi jare re.

¹⁷ Aonu vikegna Juda baludi vikegna Simion igre tei ne magra ka naiknodi Kenan te au ka namono Sefat. Mare ne thofno goigoni ne nako namono igne jateula te fafara ka God eghu, eghuteuna ke leghugna te goigoni te gnafa namono igne, mare ne kiloni namono igne Homa. Gaoghathogna “Homa” teu igne, “Goigoni nei nako mala fafara ka God.”

^18-19 Lord ne toghoni vikegna Juda mala uluni mare vido glose holo ka thogelero. Nu mare theome tangomana te uludi thilo namono Gasa, Askelon nei Ekron nei namono rhedi thilo namono igre. Naugna namono igre au nodi chariot mala magra te au wil aean tadi.

²⁰ Aonu vikegna Juda igre ne snakre lao Hebron ka Kelab leghuni unha teke chekeni Moses tifa na. Namono igne au tagna thilo vike teke jifla mei ka vikegna mae Anak, nu Kelab neke ngolhi fajifladi ka namono igne.

²¹ Nu vikegna Benjamin igne neke theome ngolhi fajifladi vikegna Jebus teke au Jerusalem igre, naugna igne mare snakreni vikegna Jebus igne mala au fabrahu kolho baludi mare ka namono igne.

Vikegna mae Efrem nei vikegna mae Manase ne uluni namono Betel

^22-23 Phei vikegna Josef, Efrem ghe Manase igre tei ne magra ka namono Betel, nanghagna tifa na “Lus”. Ka magra igne, Lord ne toghodi mare. Nu ame tei nga mare ka magra teuna, mare neke kulu kuru tei keha mae mala filo glani namono igne.

²⁴ Kate tei na, mare ne filoni kaisei mae te jifla mei ka namono igne ne cheke faheta eghu ka mana, “Jame te falalase iagho ka ghehati nabrou te mala tei lamna ka namono igne na, ghehati ginauna kokhoni nigho iagho.”

²⁵ Aonu mae igne ne falalase nabrou na ka mare, eghuteuna mare tei ne aknu falehe naiknogna namono igne. Nu mare ne theome aknu faleheni mae igne balu tharaknagna.

²⁶ Aonu mae igne jifla balu tharaknagna teure ne tei au ka nogna vido glose vikegna Het, jare mana ne eni kaisei namono. Mana ne kiloi namono igne Lus, nangha igne au ngala gognaro na.

Naiknodi Kenan vikegna Israel te theome khi fajifladi

²⁷ Ka narane tuare, vikegna Manase igre theome kafe khi fajifladi gnafa naiknodi Kenan igre ka nodi vido glose na. Naiknodi Kenan igre au kolho ka namono Bet-San, nei Tanak, nei Doa, nei Ibleam, nei Megido, nei ka namono ikodi te au faligohodi namono tuare.

²⁸ Kate kmana te vuragha naiknodi Israel igre na, mare ne huhurudi naiknodi Kenan igre mala nodi naikno gloku. Nu neubane naiknodi Israel igre kmana, mare theome khi fajifladi naiknodi Kenan igre.

²⁹ Eghuteuna vikegna Efrem igne jaola theome khi fajifladi naiknodi Kenan te au ka namono Gesa igre. Eghume vike igre snakredi mare mala au kolho ka namono igne baludi mare.

³⁰ Eghuteuna vikegna Sebulun igne theome khi fajifla naiknodi Kenan te au phei namono Kitron ghe Nahalol. Vike igne snakredi mare mala au kolho ka phei namono igre baludi mare, nu mare huhurudi naiknodi Kenan mala nodi naikno gloku.

³¹ Eghuteuna vikegna Asa igne jaola theome khi fajifladi naiknodi Kenan te au ka namono Ako, nei Saedon, nei Ahalab, nei Aksib, nei Helba, nei Afek, nei Rehob.

³² Aonu vike igne snakredi naiknodi Kenan mala au kolho baludi ka namono igre.

³³ Eghuteuna vikegna Naftali igne theome khi fajifladi naiknodi Kenan te au ka phei namono Bet-Semes ghe Bet-Anat. Aonu vike igne snakredi mare mala au kolho baludi ka phei namono tuare, nu mare huhurudi mala nodi naikno gloku.

³⁴ Nu naiknodi Kenan ka vikegna Amoa igne huhuruni vikegna Dan mala au holo ka thogelero eghuteuna theome snakredi mare mala ke soru ka nodi glogure.

³⁵ Eghuteuna vikegna Amoa igne au fabrahu ka thilo namono Aejalon, nei Salbim, nei Har-Heres. Ke leghu na, vikedi Efrem ghe Manase igre thofno rheta fara, mare ne funei frunini vikegna Amoa eghuteuna huhurudi mala nodi naikno gloku.

³⁶ Ka narane tuare, fofotagna nodi vido glose vikegna Amoa igre tei salaꞌuni thogele Akrabim eghuteuna ke tei salaꞌuni namono Sela.