Hibru 9 - Buka Blahi Ka Cheke Holo

Glepo majaghani tughuni glepo te tiatifa

¹ Kau nhaꞌa cheke ulu lahu na au kaisei vetula maladi iheire te pogho soru ka God nei kaisei vetula eigna vido te mala pogho soru ka God teke horo naikno ka nauthoglu igne.

² Mare kiloni u suga te au ke lamnagna u bara na igne “Suga tapuale”. Eghuteuna chogho ulu lahu te mala ruma naikno na, mare kiloni “Chogho blahi”. Jare ka chogho tuana au kaisei juta, nei kaisei tevo mala lilisei gna u bret blahi na.

³ Ke lamnagna suga tapuale igne au fapea chogho na eghuteuna mare lilisei kaisei pohe jare mala fanogra gna grengatha na. Mare kiloni chogho igne “Chogho thono blahi fara”.

⁴ Ke lamnagna u chogho igne mare lilisei kaisei tevo te hohoro ka gol mala gahu insens ka God, nei kaisei bokis fagaglana gna nogna nhaꞌa cheke God na. U bokis tuana ghiha gol ke kosi. Ke lamnagna bokis na, au phei thabasoa teke riso soru God nogna vetula na. Jaola mare tathaji kaisei botol gol, ke lamnagna botol tuana au katha vido gano gna tifa teke mei funugna ka God te kiloi ‘manna’, nei nogna khodo mae Eron te kotu khakla na au la jare.

⁵ Ke tagrugna u bokis tuana au phei thotoghaledi engel te kilodi “Serabim”, fagaglana gna God te au ka vido tuana. U baghidi phei thotoghale igre toku tafruni fofothogna bokis na. Jare hatimare te fuafusa u dadara te mala hata fadelei nakhibodi naiknore. Nu ghehati gognaro na theome tangomana te toutonudi gobigna lepo igre ka ghotilo.

⁶ Kate tarabanahi glepo igre, leuleghu narane na hatimare mae pris ruma ka chogho ulu lahu na mala eni nodi gloku na.

⁷ Nu thegna mae pris biꞌo ngala te ruma ka fapea chogho te blahi fara na. Mana ruma jare kaisei fata kolho ke lamnagna kaisei finogha. Kate eni igne, mana atha balugna dadara buluka nei nanigot mala fafara ka God, mala hata fadelei nakhibogna thegna re, baludi nakhibo teke edi naiknore, naugna mare theome laseni unha glepo te keli na.

⁸ Ka puhi igne, mae Tharunga te Blahi thofno falalase fakeli ka tahati u nabrou te mala ruma kau chogho te blahi fara na, u nabrou igne theome thora ngau, naugna suga tapuale gna tifa igne kegra ngau.

⁹ Igne kaisei thotoghale te mala laseni tahati ka unha glepo te thoke mei gognaro na. U gaoghathogna u thotoghale igne eigna u fafara nei kilo fnakno te edi mae pris ka God igre theome naba te famane fagagaeni nagnafagna naikno te mei ka God na.

¹⁰ Naugna glepo te gnafa igre puhi eidi gano nei khoꞌu, ba nafnata puhi mala titihi igre maladi thini kolho. Eghuteuna vetula igre mala leghudi tahati ghilei thoke mei u narane God nate tughu ka nhaꞌa cheke te majaghani.

Dadaragna Kraes

¹¹ Nu mae Kraes mae pris biꞌo na hata la meihi glepo te keli ka tahati gognaro gne. Mana rumahi ka chogho te blahi fara teke theome horo naikno nei theome nogna nauthoglu igne. U chogho tuana te au ka suga tapuale gna kligna te ulu nei klino ke tulao gna suga tapuale tifa na.

¹² Mae Kraes ruma kaisei fata ngala ka chogho te blahi fara na, kaisei fata tuana ngala tifa tifa. Mana neke theome atha balugna dadara nanigot ba dadara buluka. Theo. Mana neke hata dadaragna thegna mala fafara! Ka puhi igne, mana tangomana te atha fajifla ghita mala snagla fabrahu tahati ka khamegna mae Satan.

¹³ Tifa na mare neke atha u dadara nanigot nei buluka, nei nakrofugna sua buluka teke fafara mare re. Aonu mare fuafusa ke klignadi naikno te theome gae mala klino ke ulugna God.

¹⁴ Nu dadaragna mae Kraes na au nolaghi biꞌo fara uluni igne te mala fagae ghita na. Mana neke atha thinigna thegna na mala eni kaisei fafara te klino tughu ghita ka nogna nolaghi mae Tharunga te Blahi te karha fabrahu. Naugna igne dadaragna mae Kraes na ne fagaedi nagnafadare mala theome eni tahati kaisei glepo te batu ghita kau glehe, nu tahati mala loku ranghini God mae te karha.

¹⁵ Eghume mae Kraes hata ne mei kaisei nhaꞌa cheke majaghani funu ka God ka nogna naiknore, mala tangomana naikno teke kilodi God re mala hata u thofno nakarha te au kligna te theo ka huigna teke nhaꞌa cheke mana ranghidi. Naugna mae Kraes neke lehe mala foli fajifladi naiknore ka glehe eidi nakhibo teke edi mare kate tathaji nga tekeu mare u nhaꞌa cheke ulu lahu na.

¹⁶ Jame kaisei mae rioriso nhaꞌa cheke maladi keha naikno teke hata kasa nogna glepo mana re ke leghugna te lehe mana na. Ghotilo thofno laseni te lehe tutuani mana na ame hata nga glepo igre.

¹⁷ Naugna kate karha nga teu mana na, u nhaꞌa cheke igne theo nolaghi gna. Nu kate lehe mana na, naiknore tangomana te leghuni nhaꞌa cheke na.

¹⁸ Naugna igne, u nhaꞌa cheke ulu lahu teke eni God igne tutuani kolho kate tofa mare dadaradi nanigot nei buluka teke fafara na.

¹⁹ Ulu lahu na, mae Moses ne kulu rurutha ranghidi naiknore u vetula te gnafa igre. Aonu mana hata khakla sipu te ukru na ne haru ka grege gaju te kiloi “Hisop” ne fabobothu ka dadaradi buluka nei nanigot tela ngigno foduhi ka khoꞌu. Aonu mana ne fuafusa ke kligna gna u buka gna vetula na, eghuteuna ke fuafusa la ke klignadi naiknore.

²⁰ Kate fuafusa te gnafa ke klignadi u dadara na, mana ne cheke eghu, “U dadara igne mala farerheta gna u nhaꞌa cheke teke eni God mala leghuni ghotilo teku ia.”

²¹ Jateula tuana eghu mae Moses neke fuafusa u dadara ke tagrugna suga tapuale te blahi na, nei ke klignadi gobigna lepo te blahi te mala loku mare te au ka suga tuana.

²² Tuani fara, te mala leghuni vetula na, teke fuafusa mare dadara na thogra glepo te gnafare te mala gae ke ulugna God. Te theome thofa dadara na, God ginauna theome atha fadelei nakhibodi naiknore.

Nogna fafara mae Kraes

²³ Uve, glepo mala fafara igre jateula thotoghaledi eghu glepo te au kligna igre. Glepo igre nabadi te fuafusa dadara mala gae ke ulugna God. Nu glepo te au kligna gre nabadi kaisei fafara biꞌo ke tulaodi fafara te edi pari igre.

²⁴ Mae Kraes theome ruma ka suga tapuale teke hohoro kolho ka khame naikno te thotoghale gna kolho chogho aheva te au God na. Theo. Nu mana gognaro na la rumahi kligna ka vido aheva te au God mala cheke ka God eida tahati.

²⁵ Mae pris biꞌo na, ruma ke lamnagna suga tapuale leuleghu finogha. Mana hata balugna dadara buluka, theome dadaragna thegna. Nu mae Kraes ruma jare kaisei fata kolho ne fafarani thegna ka God.

²⁶ Jame theome eghu na mana jame au papara kmana fata funu ka vuvuhagna God u nauthoglu igne! Nu mana fathakleni thegna ka nauthoglu igne kaisei fata kolho, ka narane nate theome raugha te gnafa nauthoglu igne. Mana ne fafara thinigna thegna na mala hata fadelei nakhibodi naiknore.

²⁷ Naikno te gnafare na kaisei fata lehe kolho, ke leghugna igne God ginauna fatedi mare.

²⁸ Eghume, mae Kraes jaola neke fafarani thegna kaisei fata ngala, mala tangomana mana te koko fahui nakhibodi naikno te kmanare. Mana ginauna nake pulo mei ka nauthoglu igne fapea fata. Kau narane tuana mana ginauna na theome mei mala atha koko nakhibo, nu mana mei ka nauthoglu igne mala fakarhadi iheire te ofoni teu mana.