Hibru 8 - Buka Blahi Ka Cheke Holo

Mae Jisas noda mae pris biꞌo

¹ Unha te chekeni ghehati na igne: tahati au kaisei noda mae pris biꞌo mala kegra tughu ghita. Mana gnokro fei nhetagna God ka sape nafnakno kligna.

² Mana kegra jateula mae pris biꞌo eghu ke ulugna God ka vido te blahi fara ke lamnagna suga tapuale gna kligna na, teke hohoro thegna God neke theome hohoro naikno.

³ Mae pris biꞌo te gnafare hata gloku igne mala fafara nei cheke fakelini God baludi keha nafnata fafara langau. Eghume noda mae pris biꞌo tahati na mana mala eni langau kaisei fafara ka God.

⁴ Jame au mae Jisas baluda ka nauthoglu igne meuna, mana ginauna theome loku jateula kaisei mae pris biꞌo eghu, naugna tahati auhi kmana mae pris ka vikegna mae Livae te mala fafara nei cheke fakelini God teuna, jateula te chekeni ka nogna vetula mae Moses.

⁵ Nodi gloku hatimare mae pris gre jateula u thotoghale gna eghu kolho eigna unha te eni kligna na. Tahati laseni igne, naugna kate magnahaghei hohoro mae Moses suga tapuale igne, God neke cheke faheta eghu ka mana, “Filo sagho! Iara magnahaghe nigho te hohoro gobigna lepore leghuni unha teke falalase ka iagho ka thogele ia.”

⁶ Eghume gloku te eni mae Jisas na biꞌo fara ke uludi nodi gloku keha mae pris gre. Jaola nhaꞌa cheke majaghani hata teke mei mae Jisas funu ka God ka nogna naiknore famane keli fara uluni u nhaꞌa cheke tiatifa na. Eigna kate eni God nhaꞌa cheke majaghani igne, mana ne cheke eghu, “Ghotilo ginauna snori nomi ka glepo te keli uluni nhaꞌa cheke tifa ia.”

⁷ Jame loku fakeli nhaꞌa cheke ulu lahu igne meuna, ginauna theo kaisei nhaꞌa cheke majaghani nate mei ke leghu na.

⁸ Nu God ne filo glanidi nodi najafra naiknore kate theome leghuni mare u nhaꞌa cheke ulu lahu na. Eghume God ne cheke eghu, “Fanomho fakeli! Narane na la namo meihi, iara ginauna eni kaisei nhaꞌa cheke majaghani baludi naiknodi Israel nei naiknodi Juda.

⁹ Nhaꞌa cheke igne theome jateula teke eni iara tifa ka mae ku'edi mare kau narane teke atha fajifladi iara ka namono Ijep ia eghu. Hatimare neke theome leghuni u nhaꞌa cheke teke eni iara tifa ka mare na. Naugna igne iara neke figri tagrudi.

¹⁰ Nu igne u nhaꞌa cheke nate chekeni iara ka naiknodi Israel re: Kate thokei mei narane tuare iara ginauna lilisei nogu vetula na ka nagnafadi nei jaola rioriso ka gaoghathodi. Iara ginauna nodi God mare, mare jaola nogu naikno iara.

¹¹ Ginauna theome tangomana kaisei naikno nate farirhiudi kheradi ba vikedi, ‘Ghotilo mala kafe laseni Lord’, naugna ka narane tuana mare ginauna kafe lase ghau iara funu ka sua thoke ka naikno biꞌo.

¹² Iara ginauna kokhonidi iheire te edi glepo te diꞌa eghuteuna iara na hata fadelei nakhibodire.”

¹³ Tahati laseni glepo te tiatifa na theo kaisei nogna gloku eghuteuna ginauna theome raugha dofini. God jateula tuana eghu kate eni u nhaꞌa cheke majaghani igne. Tuani fara, mana neke nhaꞌa fadelei u nhaꞌa cheke te tiatifa na jateula glepo te tiatifa ba te thona.