Hibru 7 - Buka Blahi Ka Cheke Holo

Mae Melkisedek mae pris biꞌo

¹ Gognaro gne iara na toutonu ranghi ghami ghotilo eigna mae Melkisedek. Mae Melkisedek gne kaisei mae king ka namono te kiloi Salem, nei mana kaisei nogna mae pris biꞌo God te au kligna. Mae Melkisedek neke ludeni mae Ebraham ke leghugna teke pulo mei mae Ebraham funugna ka vido teke tei magra mana teke falehedi fati mae king baludi nodi mae armi hatimare fati mae king igre. Jare mae Melkisedek thafoni mae Ebraham ne fablahini mana.

² Aonu ka narane tuana mae Ebraham ne fofota gobigna lepo teke hata ka magra re, mana ne tufa ka mae Melkisedek fabothodi glepo tuare. Eghuteuna gaoghathogna u nangha Melkisedek teu igne. Ulu lahu na, “Mae king gna puhi te doglo.” Fapea na, “Mae king gna pharikeli.” Naugna nanghagna namono mana na kiloi “Salem”, ba “Pharikeli”.

³ Tahati theome lasedi idogna nei kmagna teu mae Melkisedek re. Nei theola kaisei thoutonu eigna vikegna mana na. Nei tahati theome lase nila niha teke karha mana na, ba niha teke lehegna na. Eghume mana jateula te thugna God eghu mala mae pris fabrahu tifa tifa.

⁴ Te filoni tahati na mae Melkisedek gne kaisei mae biꞌo fara! Naugna mae kuꞌeda Ebraham na neke tufa ka mana fabothodi glepo te hata mana kau magra na.

⁵ Te laseni tahati na mae pris te gnafare karha mei ka vikegna mae Livae kolho. Eghuteuna nogna vetula mae Moses na, cheke ka naiknore mala tufa fabothodi unha te atha gano ba glepo naiknore maladi hatimare mae pris. Hatimare mae pris gre atha gano ba glepo ka naiknodi Israel kolho, eigna neuba mare ne thabusigna jaola vikegna mae Ebraham neu.

⁶ Nu mae Melkisedek gne neuba neke theome jifla mei ka vikegna mae Livae, mana hata glepo ka mae Ebraham. Eghuteuna mae Melkisedek jaola neke fablahini mae Ebraham, mae ihei God teke nhaꞌa cheke ranghini.

⁷ Eghume te laseni tahati na mae Melkisedek gne mae ke ulugna mae Ebraham, naugna mana ne fablahini mae Ebraham. Naugna tahati thofno laseni mae ke biꞌo na fablahini koba mae ke iko na.

⁸ Eidi mae pris te atha kaisei fabothodi gobigna lepo ka naiknore igre, mare mala lehe. Nu te chekeni ka grioriso te blahi na, mae Melkisedek gne mana e karha fabrahu tifa tifa.

⁹ Eghuteuna mae pris ka vikegna mae Livae gre mare tangomana te hata kaisei fabothogna ka naiknore. Nu tifa na mae Ebraham, ku'egna Livae, neke tufa glepo ka mae Melkisedek. Eghume tahati tangomana te chekei mae Livae jaola neke tufa glepo ka mana.

¹⁰ Naugna ka teke tei mae Melkisedek te thafoni mae Ebraham, mae Livae theome karha ngau, nu mana au ngau ka thinigna mae ku'egna Ebraham.

¹¹ God neke tusu lao nogna vetula mae Moses na ka naiknodi Israel. Eghuteuna hatimare mae pris ka vikegna mae Livae gre neke eni nodi gloku na mala toghodi naiknore mala leghuni u vetula igne nei mala au doglo fabrahu ke ulugna God. Nu jame naba te mala fakelidi naiknore ka nodi gloku mare na meuna, mala unha si teke mei kaisei mae pris ke leghu gnea? Tutuani, nodi gloku mare na ne theome naba, naugna igne kaisei pris jateula mae Melkisedek eghu te mei na, theome jateula mae pris ka vikegna mae Eron.

¹² Eghuteuna, jame teke mei kaisei nafnata pris na, vetula na jaola ke tughu.

¹³ Eigna noda Lord Jisas te chekeni tahati igne mana neke mei ka vikegna mae Juda, neke theome mei ka vikegna mae Livae. Eghuteuna, theo kaisei naikno ka vikegna mae Juda teke atha gloku pris tifa na.

¹⁴ Naugna tahati lasenihi, mae Jisas igne neke karha mei ka vikegna mae Juda. Eghuteuna mae Moses neke theome chekeni kaisei glepo eigna vike tuana kani teke cheke eidi mana hatimare mae pris.

Mae Jisas jateula mae Melkisedek

¹⁵ U cheke eidi mae pris igne glola fara ka tahati gognaro na, naugna keha mae pris jateula mae Melkisedek teuna la thakle meihi.

¹⁶ God neke vahini mana mala mae pris, theome leghuni kaisei vetula eigna vike, nu mana mala mae pris ka nogna nolaghi nei nakarhagna te theo ka huigna.

¹⁷ Naugna kau grioriso te blahi eigna mana na, God ne cheke eghu, “Iagho kaisei mae mala pris fabrahu tifa tifa jateula mae Melkisedek.”

^18-19 God neke atha fadelei vetula gna tifa igne, naugna nogna vetula mae Moses gne theo nolaghi nei theome naba te mala fakelidi naiknore ke ulugna God. Nu gognaro na God ne tothora kaisei nabrou te fatutuani ni tahati na. Nabrou igne keli fara uluni nogna vetula mae Moses. Eghuteuna tangomana te hata gita te ari namo ka God.

²⁰ Eghuteuna keha glepo na teuna, God neke nhaꞌa cheke eigna mae Jisas, mana ginauna mala mae pris fabrahu. Kate pris hatimare mae vikegna Livae tifa na, God neke theome eni kaisei nhaꞌa cheke jateula tuana neku ka mare.

²¹ Nu kate pris mae Jisas na, God neke nhaꞌa cheke eghu, “Lord neke eni kaisei nhaꞌa cheke, eghuteuna mana ginauna theome tughu gaoghathogna na. Mana ne cheke eghu, ‘Iagho kaisei mae mala pris fabrahu tifa tifa.’ ”

²² Gaoghathogna igne mae Jisas ne fahoroghotoni kaisei nogna nhaꞌa cheke majaghani God teke tusu mei ka tahati. Nhaꞌa cheke majaghani igne uluni u nhaꞌa cheke tiatifa na.

²³ Keha glepo na igne, tifa na mare kmana mae pris, naugna hatimare lehe neke theome tangomana te eni fabrahu nodi gloku na.

²⁴ Nu mae Jisas na karha fabrahu. Eghume, mana theome gnafa te eni nogna gloku mae pris na.

²⁵ Naugna igne mana gognaro te haghe na au nolaghi te mala fakarhadi naikno te mei ka God re naugna mare ne fatutuani ni mae Jisas. Mae Jisas tangomana te mala fakarhadi naugna mana karha fabrahu, eghuteuna mana mala taraidi mare ka God Kmada.

²⁶ Eghume mae Jisas ngala nafnata mae pris biꞌo te magnahaghei tahati na. Mana mae blahi, mana kaisei mae doglo fara, nei mana theome eni kaisei puhi te diꞌa. Eghuteuna God neke hata fadeleini mana ka iheire te diꞌa nei hata hagheni mana kau nafnakno kligna.

²⁷ Mana theome jateula keha mae pris gre eghu. Hatimare fafara leghu narane. Ulu lahu na, mare fafara maladi nakhibodi thedire eghuteuna ke leghu na mala nakhibodi naiknore. Nu mae Jisas theome eni nafnata puhi igne. Naugna mae Jisas neke eni kaisei fafara ngala thinigna thegna na mala hata fadelei nakhibodi naikno te gnafare tifa tifa.

²⁸ Tutuani fara, neuba mare neke vahidi mae igre mala mae pris biꞌo, mare theome doglo fabrahu. Eghuteuna God neke vahidi mae igre mala mae pris biꞌo ka nolaghi nogna vetula mae Moses. Nu kate eni God u nhaꞌa cheke majaghani ke leghugna nogna vetula mae Moses igne, God neke vahini mae Thugna mala mae pris biꞌo. Eghuteuna mae Thugna na mala klino fabrahu ke ulugna God tifa tifa.