Hibru 5 - Buka Blahi Ka Cheke Holo

Jisas mae pris biꞌo

¹ God tangomana te vavahi mae pris biꞌo maladi naiknore. Mana kegra ke ulugna God mala kilo fnaknoni mana balu fafara mala hata fadeleidi nakhibodi naiknore.

² Mae pris biꞌo na mala kokhonidi nei toghodi eghu iheire te loku jafra naugna mare theome laseni unha te eni fadiꞌa na. Mana eni igne naugna mana thegna na jaola nigra ke ulugna God.

³ Naugna te nigra na mana nabagna te fafara ka God mala atha fadeleidi God nakhibogna thegna re, nei jaola fafara mala atha fadelei nakhibodi naiknore.

⁴ Kaisei glepo te mala ghathoni tahati na, theo kaisei naikno te vahini thegna te mala mae pris biꞌo na. Nu thegna God ngala te tangomana te mala vahini mae ihei te mala mae pris biꞌo na, jateula ngau God teke vahini mae Eron tifa ia eghu.

⁵ Mae Kraes jaola neke theome vahini thegna mala hata u nafnakno te mala kaisei mae pris biꞌo na, theo! Nu God neke vahini mana neke cheke eghu ka mana, “Iagho mae Thugu iara, funu gognaro iara mae Kmamu iagho.”

⁶ Nei kaisei vido kau grioriso te blahi na neke cheke eghu, “Iagho kaisei mae mala pris fabrahu tifa e tifa jateula mae Melkisedek.”

⁷ Kate au nga tekeu mae Jisas ka nauthoglu gne mana neke tarai balu tanhi fabiꞌo ka God Kmagna mae ihei tangomana te mala toghoni mana te mala theome lehe na. God neke nomhini nogna tharai mana na, naugna mae Jisas neke loku leghuni nagnafagna God na nei ghatho tahuni eghu mana.

⁸ Neuba mae Jisas ne thofno Thugna God, kate au papara na mana laseni te leghuni mae Kmagna na.

⁹ Kate loku fahui mana unha teke magnahagheni God na, mana mala au fabrahu mala fakarhidi naikno te gnafa te leghuni mana re.

¹⁰ Eghuteuna God neke vahini mae Jisas mala kaisei mae pris biꞌo jateula mae Melkisedek.

Farirhiu eigna te figri tagruni God

¹¹ Kmana glepo ghehati te romi chekedi ka ghotilo eigna mae Melkisedek, nu ninhigrana fara te famane ruruthadire eghu, naugna ghotilo theome tangomana te ghosei te lasedire glepo igre.

¹² Ghotilo naikno khiloaumi funu tifahi, eghuteuna ghotilo jame nabamihi te velepuhi na. Nu nabagna na kaisei mae ke pulo mei mala farirhiu ghami ghotilo eidi glepo ulu lahu teke nomhidihi ghotilo eigna mae Kraes. Ghotilo jateula sua te chuꞌu teu kolho te theome naba te ghamu gano te maku ia eghu puhimire.

¹³ Mae ihei te magnahaghei chuꞌu na, mana khogla jateula mae sua eghu kolho. Naikno tuana theome filo glanidi ngau kolho u farirhiu eidi unha te keli ba unha te diꞌa.

¹⁴ Nu ihei te ghamu gano te maku na mana jateula mae tela biꞌohi eghu. Nafnata naikno tuana au fabrahu tagna gaoghatho te keli mala laseni unha glepo te keli ba unha glepo te diꞌa.