Hibru 4 - Buka Blahi Ka Cheke Holo

Gnafa balugna God

¹ Tutuani fara, God neke nhaꞌa soru nhaꞌa cheke igne mala tei gnafa tahati balugna mana. Eghume fiofilo ghitai eghu, na eghunu keha ka ghotilo theome ari thokeni namono mala gnafa na jateula mae Israel tifa ra eghu.

² Tahati la nomhinihi u Nonomho te Keli igne, nei naiknodi Israel tifa re neke nomhi nila. Nu neubane nomhinihi mare u cheke igne, theome toghodi mare kolho, naugna kate nomhini u cheke igne mare theome fatutuani kolho.

³ Nu tahati naikno te fatutuani gre tangomana te ruma ka namono mala gnafa na tifa tifa. “Tahati laseni kaisei namono te thofno tutuani mala gnafa naugna God neke cheke eghu eidi mae Israel, ‘Ginauna na theome tangomana te mei ka namono te au iara na mala gnafa balugu iara!’ ” God ne cheke eghu theome eigna teke theome kulu tarabana mana kaisei namono te mala gnafa na, theo. Namono igne la kulu tarabanahi kate ke loku fagnafa nogna gloku na ka teke vuavuhadi mana gobigna lepo ka nauthoglu gne. Tutuani, nogna gnafa mana na fufunu ka narane tuana tifa tifa.

⁴ Naugna kaisei vido ka buka blahi na, kaisei mae neke cheke eghu eigna fafitu narane na ke leghugna teke vuavuhadi mana gobigna lepo ka nauthoglu igne, “God neke loku fagnafadi gobigna lepore. Kau fafitu narane na, mana neke gnafa.”

⁵ Jaola ka vido tuana tahati filoni mana ne cheke eghu, “Mare ginauna na theome tangomana te mei ka vido te au iara na mala gnafa balugu iara.”

⁶ Naikno teke kulu nomhini u Nonomho te Keli gne mare na theome ruma ka namono mala gnafa na, naugna mare ne theome fatutuani ni God. Nu tutuani fara kehare ginauna na ruma ka namono mala gnafa na.

⁷ Eghume tahati laseni God neke vavahi kaisei narane te kiloni mana, “Gognaro”. Naugna ka finogha kmana te sala'u ra, God neke vahini mae Devet mala toutonu eigna narane tuana. Mana ne cheke eghu, “Gognaro fanomho fakeli ka mana kate cheke mana ka ghotilo na. Thosei patugama nagnafami are.” Ghotilo iu'ijunihi igne.

⁸ Te laseni tahati na mae Josua neke theome batudi kuꞌeda tahati re neke tei ka vido mala gnafa na, mala gnafa balugna God. Tahati laseni igne naugna ke leghugna igne God neke cheke eigna keha narane nate mei ginauna.

⁹ Eghume tahati tangomana te mala gnafa jateula God teke gnafa ke leghugna teke vuavuhadi gobigna lepo ka nauthoglu gne eghu.

¹⁰ Eigna ihei te ruma te gnafa balugna God na ginauna na gnafa ka nogna gloku na, jateula God teke gnafa ke leghugna teke hohoro gna nauthoglu gne.

¹¹ Tahati fariuriu fara mala tei thoke ka namono igne mala gnafa tifa tifa balugna God. Na eghunu jateula teke edi mae tifa teke patugama ra eghu keha naikno ka tahati te figri tagruni God na, naugna mare neke theome thokeni namono tuana.

¹² Chekegna God na karha nei fodu kau nolaghi. Thono fnonu piepile fara jateula u naflahi kavara eghu. Thono churu tei fara lamna ka gaoghathogna nei karhagna eghu naikno na. Chekegna God na tangomana te ruma te fatedi unha te au ka gaoghathodi nei nagnafadi teu naiknore jateula u naflahi kavara te thono tei lamna farihotei thududi nei nhubragna teu mana re.

¹³ Eghuteuna theo kaisei glepo kau nauthoglu gne tangomana te poru ka God. Gobigna lepore kakhana ngala ka mana. Eghuteuna kaisei narane tahati ginauna na chekedi ka mana unha teke edi tahati re.

Mae Jisas noda pris biꞌo tahati

¹⁴ Eghume, tahati mala loku famaku ka noda fatutuani na. Naugna tahati au kaisei noda mae pris biꞌo te togho ghita. Mae pris biꞌo igne mae Jisas Kraes Thugna God tela haghehi kligna.

¹⁵ Noda mae pris biꞌo na lase ghita te nigra na. Ka teke au ka nauthoglu gne, mana neke thoke nila fariuriu ka nafnata puhi te kmana jateula tahati neku, nu mana neke theome eni kaisei najafra eghu.

¹⁶ Naugna igne tahati thosei mhaghu te mei ka God Kmada mae ihei te kokhoni ghita. Mana ginauna na kokhoni ghita nei lolokeli ghita, eghuteuna mana ginauna na tusu meini nogna namha te mala togho ghita ka vido te magnahaghei tothogho na.