Hibru 3 - Buka Blahi Ka Cheke Holo

Jisas mae biꞌo uluni mae Moses

¹ Uve, kheraguro, God kafe kilo ghami ghotilo gnafa mala nogna naikno blahi mana. Eghume, iara magnahaghei ghami ghotilo te ghathoni mae Jisas, mae ihei God teke kuru meini kau nauthoglu igne mala togho ghita. Mana noda mae pris biꞌo mala togho ghita ka gobigna lepo te fatutuanidi tahati.

² God neke vahini mae Jisas mala edi gobigna lepo te magnahaghedi mana re. Tutuani, mae Jisas neke thofno leghuni u chekegna God jateula mae Moses teke leghuni chekegna God na teke batudi nogna naikno God ra eghu.

³ Nu te keli na tahati kafe ghatho tahuni mae Jisas, ke tulao gna mae Moses, jateula ngau naiknore ghatho tahuni mae ihei teke horo gna u suga na, ke tulao gna ghatho tahuni eigna suga na.

⁴ Kmana mae tangomana horo suga eghuteuna thegna God ngala teke edi gobigna lepore.

⁵ Mae Moses mala reireghi fakelini tharaknagna God nei edi unha teke magnahaghedi God re. Nogna gloku mae Moses igne mala toutonuni unha nate chekeni God thogheiro eigna Kraes. Eigna mae Moses kaisei mae gloku kolho.

⁶ Nu mae Kraes Thugna God na, mana pha'u mae te mala reireghini tharaknagna God na nei eni unha te magnahaghei God na. Jame loku famaku tahati noda fatutuani na nei jame jaola gleale'a fabrahu eidi gobigna lepo God nate edi ranghi ghita na, tahati gne thofno tharaknagna God.

Farirhiudi naikno te theome fatutuani

⁷ Mae Tharunga te Blahi ne cheke eghu, “Gognaro na ghotilo fanomho fakeli ka God kate cheke mana ka ghotilo na.

⁸ Thosei patugama nagnafami are, jateula teke eni mae ku'emi tifa teke huhughuni chekegna God. Mare neke edi unha te theome magnahaghedi mana re ke lamnagna namono nagou na.

⁹ God ne cheke eghu, ‘Iara neke au baludi mae ku'emi ghotilo ra ke lamnagna namono nagou phiatutu finogha. Jare hatimare neke fariuriu ghau iara neuba mare filodi kmana kofubobhoi nei fagaglana eghu teke edi iara re.’

¹⁰ Naugna igne iara diꞌatagu fara ka mare ne cheke eghu, ‘Nagnafadire la tei jafra ka iara. Mare theome laseni nabrougu iara na.’

¹¹ Aonu iara diꞌatagu fara ne nhaꞌa cheke eghu, ‘Mare ginauna theome tangomana te mei ka namono teke nhaꞌa cheke iara te mala tusu ranghidi mala gnafa balugu iara!’ ”

¹² Eghume, kheraguro, fiofilo fakeli ghami ghotilo ia, na eghunu tei fajafra gaoghathomire mala theome fatutuani ni mae Kraes nei figri tagruni God mae ihei te nolaghi tulao na eghu!

¹³ Nu fari totoghoi leghu narane. Eni igne gognaro kani au nomi narane ngau ghotilo, mala theo kaisei naikno te dofu nei meglini eghu naoglagna God na ka nogna chaichaghi mae Satan, mae ihei te batudi nagnafada ka nakhibo.

¹⁴ Eni igne naugna tahati hui mala kaisei balugna mae Kraes, eghu te loku famaku fabrahu tahati u fatutuani teke kulu au ka tahati igne.

¹⁵ Ghotilo tangomana te eni igne leghuni unha te cheke eghu ka grioriso te blahi na, “Gognaro na fanomho fakeli ka mana. Thosei patugama nagnafami are, jateula teke eni mae ku'emi tifa teke huhughuni chekegna God na. Mare neke fariuriuni mana ke lamnagna namono nagou.”

¹⁶ Iheire si teke nomhini chekegna God na nu patugama nagnafadire me theome leghuni mana teku ia? Naikno te gnafare mae Moses teke baubatudi mala jifla kokoni Ijep.

¹⁷ Iheire si teke diꞌatagnadi God ka phiatutu finogha igrea? Iheire teke edi glepo te diꞌare teke lehe ka namono nagou na!

¹⁸ Ka iheire si teke nhaꞌa cheke mana tadi mala theome gnafa balugna teku igrea? Mana neke cheke ka naikno te theome leghudi nogna chekere.

¹⁹ Eghume te laseni tahati na, mare theome tangomana te thoke ka namono te mala gnafa na naugna mare ne theome fatutuani ni God.