Hibru 2 - Buka Blahi Ka Cheke Holo

Puhi farirhiu

¹ Eghume tahati famane leghu fakelidi nogna farirhiu mae Jisas Kraes Thugna God teke nomhidi tahati ra, mala thosei jateula mola te elo tafri ka nuri ia eghu noda fatutuani na.

² Naugna nogna farirhiu God teke cheke ka mae engel gre tutuani fara. Eghuteuna mae ihei teke theome leghuni ba huhughuni nogna vetula God na, God neke thono fateni mana eigna unha teke eni mana na.

³ Eghume, te theome ghatho tahuni tahati chekegna God te mala thofno fakarhi ghita na, tahati theome tangomana te fafraini glehe na. Thegna Lord neke kulu cheke eigna u karha igne. Eghuteuna iheire teke thofno nomhini ka thegna mana u cheke igne, mare fatutuani neke cheke eghu ka ghehati, “Thono tuani fara.”

⁴ God jaola neke falalase chekegna te thofno tutuani na ka kmana nafnata fagaglana nei kofubobhoi eghu teke edi mana re. Jaola, mana ne falalase neke tusu ranghidi nogna nolaghi mae Tharunga te Blahi na ka kmana nafnata puhi mala toghoni nodi gloku na, leghuni nogna gaoghatho thegna na.

Mae ihei te mala batu ghita kau karha

⁵ Kate vahini God mae ihei nate funei frunini nauthoglu igne nate mei ginau, mana neke theome chekeni kaisei engel.

⁶ Tahati laseni igne naugna ka u grioriso te blahi na kaisei mae ne cheke eghu ka God, “God, iara theome laseni ghaoghathogna te ghatho tahudi nei mei toghodi teu iagho naikno kolho gre.

⁷ Iagho tifa na neke nhaꞌa fasoruni mana katha vido ikoi ke paridi engel re. Nu gognaro na iagho lilisei ke kligna gna mana u nafnakno nei siasigla.

⁸ Iagho tusu ranghini mana nolaghi te mala funei frunidi gobigna lepo fateo ke lamnagna nauthoglu igne.” Te filoni tahati ka grioriso te blahi na, God neke vuavuha naikno mala funei frunidi gobigna lepo fateore. Nu tahati theome filoni ngau naikno na te funei frunidi gobigna lepore.

⁹ Nu tahati filoni mae Jisas! God neke nhaꞌa soruni mana katha vido ikoi ke paridi mae engel re. Nu gognaro na tahati filoni nafnakno nei siasigla ka mana mala tithini mae King naugna mana neke au papara nei lehe tughu ghita gnafa. God neke snakreni igne naugna mana ne namha ghita gnafa.

¹⁰ God, mae ihei teke vuavuhadi gobigna lepo igre, neke cheke fakelini mana. Mana nabagna te snakreni mae Thugna Jisas Kraes mala au papara. Naugna kate au papara mana igne, God neke fagnafani nogna gloku thegna na ka mae Jisas Kraes, mae ihei tahati te kiloni “Mae mala baubatu ghita kau thofno karha.” God tusu ranghini mae Jisas gloku igne mala tangomana te hata fapulo goro thugna mala au balugna kligna.

¹¹ Tutuani fara, mae ihei te faklinodi naiknore ke ulugna God nei naikno te klinore eghu God ngala Kmadi na. Naugna igne mae Jisas ne keli tagna te kilo ghita thabusigna thegna.

¹² Tahati kafe laseni igne, naugna kau grioriso te blahi na mae Jisas ne cheke eghu ka God, “Iara ginauna na chekedi thabusigure unha te edi iagho re. Kate khapru te pogho soru nigho naiknore, iara ginauna kilo fnakno nigho balu koje.”

¹³ Mae Jisas jaola ne cheke eghu ka God, “Iara ginauna na lisa lao ghau thegu ka khamegna God.” Eghuteuna mana ne cheke eghu la, “Iara au agne baludi naikno teke tusu mei God ka iara jateula sua teu igre.”

¹⁴ Naugna tahati naikno kolho, mae Jisas karha mei neke hata thinida mala jateula tahati. Mana neke eni igne, mala ka glehegna na mana tangomana te tapla soruni mae Satan, mae ihei te au nogna nolaghi te mala faleheni naikno na.

¹⁵ Eghuteuna, mae Jisas neke vuhai naikno mala tangomana te snagla iheire te mhaghuni glehe fabrahu funu tifa.

¹⁶ Naugna te laseni tahati na mae Jisas gne theome mei mala toghodi u engel gre, nu mala togho ghita tahati vikegna mae Ebraham.

¹⁷ Naugna igne, mae Jisas nabagna te karha mei naikno mala jateula tahati gnafa, mala tangomana mana te kaisei mae pris biꞌo mala loku ranghini God nei thofno leghuni chekegna mana na. Mana toghodi nei kokhonidi eghu nogna naikno God re ba tangomana te hata fadelei u nakhibodire.

¹⁸ Eghuteuna gognaro na mae Jisas tangomana te togho ghita tahati naikno te huhuru ghita mae Satan te mala edi glepo te diꞌare, naugna mae Jisas jaola neke au papara kani teke fariuriuni mae Satan mala jafra mana teku na.