Hibru 10 - Buka Blahi Ka Cheke Holo

Thofno puhi te mala cheke thakleni nakhibo

¹ Nogna vetula mae Moses igne theome thofno cheke thakleni glepo te tuani na nu jateula thotoghale eghu kolho eigna glepo te keli nate thakle mei ginauna. Naugna igne nafnata fafara te eni koba leuleghu finogha theome naba te faklinodi iheire te mei pogho soru ka God re.

² Jame nafnata fafara igne au nolaghi mala fagagae nakhibodi naiknore kaisei fata ngala meuna, mare jame theome tangomana te fafara koba na, naugna mare ginauna theome tangomana te diꞌanagnafa eidi nakhibodire.

³ Nu theome jateula tuana eghu. U fafara te edi mare leuleghu finogha igre, mare toghodi naiknore mala ke ghatho fapulodi koba nakhibodire kolho.

⁴ Naugna te laseni tahati na, u dadara buluka ba nanigot na theo kaisei nolaghi te mala atha fadelei nakhibodi naiknore.

⁵ Eghume, kate mei mae Kraes kau nauthoglu igne, mana ne cheke eghu ka God, “Iagho theome magnahaghei kaisei mae te hata buluka ba gano te fafara nei kilo fnakno nigho, nu iagho tarabanahi thinigu iara gne mala fafara ka iagho.

⁶ Iagho theome gleale'a kate gahu tongana buluka na ke kligna olta, ba keha nafnata fafara te mala hata fadelei nakhibore.

⁷ Eghuteuna ke leghu na, iara ne cheke eghu, ‘God, iara au teu ao, iara tarabana mala eni unha te magnahaghei iagho na, jateula teke riso mare eigu iara kau buka vetula ia eghu.’ ”

⁸ Filo si ghotilo. Ulu lahu na mae Kraes ne cheke eghu ka God, “Iagho theome magnahaghei kaisei mae te hata buluka ba gano te fafara nei kilo fnakno nigho, nei iagho jaola theome magnahaghedi buluka te gahu tongana ke kligna olta ba keha nafnata fafara te mala atha fadelei nakhibo. Nafnata fafara tuare iagho theome gleꞌadi kolho.” Mana ne chekeni igne neuba fafara te edi hatimare mae pris leghuni nogna vetula mae Moses na.

⁹ Aonu mana ne cheke eghu, “God, iara au teu ao, iara tarabana mala eni unha te magnahagheni iagho na.” Ka puhi igne mae Kraes ne hata koko u nafnata fafara tiatifa na neke tughu ka glepo majaghani.

¹⁰ Mae Jisas Kraes ne eni unha te magnahagheni God na ne snakreni thinigna thegna na ne lehe kaisei fata ngala. Kate eni fafara mana igne, tahati ne klino ke ulugna God.

¹¹ Mae pris te gnafare mare eni nodi gloku na ranghini God leuleghu narane. Mare eni koba nafnata fafara igne ngala leuleghu fata na. Nu nafnata fafara igne theome tangomana te atha koko u nakhibo teke edi naiknore.

¹² Nu mae Kraes neke eni kaisei fafara kolho te nolaghi te mala atha koko nakhibodi naiknore tifa tifa. Eghuteuna ke leghugna igne mana tei ne gnokro fei nhetagna God.

¹³ Mana au jare mala ofoni u narane God nate huju sorudi nogna mae naokare ke parigna nogna nolaghi na.

¹⁴ Kate fafarani thegna kaisei fata ngala, mae Kraes ne fablahidi naikno teke fagagae thegna igre mala klino fabrahu tifa tifa.

¹⁵ Mae Tharunga te Blahi na neke cheke ranghi ghita glepo igre thofno tutuani fara. Naugna ulu lahu na mana neke cheke eghu,

¹⁶ “Iara ginauna na eni nhaꞌa cheke igne ranghidi mae Israel. Iara ginauna na lilisei nogu vetula na kau nagnafadire, nei iara ginauna rioriso kau gaoghathodire.”

¹⁷ Eghuteuna God ne cheke eghula, “Iara ginauna hata fadelei nakhibore, ba unha najafra teke edi mare. Naugna igne, iara ginauna theome ghathodi nakhibo teke edi mare re.”

¹⁸ Eghuteuna kate atha fadelei God nakhibodi naiknore, mae pris gognaro na theome tangomana te fafara fabrahu te mala gnafa nakhibo na.

Tahati mei namo ka God

¹⁹ Uve, kheraguro, naugna ka dadaragna mae Kraes teke thofa ka glehegna mana ia, tahati au noda nolaghi te mala ruma ka chogho te blahi fara ke ulugna God igne.

²⁰ Tahati tangomana te tei ka nabrou majaghani te thoke ka God teke tothora ranghi ghita mae Jisas te karha. Naugna kate fafara thinigna thegna na, mana neke tora u pohe teke fofothogna u chogho te blahi fara na neke ruma lamna.

²¹ Mae Jisas Kraes ngala mae pris biꞌo te mala reireghidi nogna naikno God re.

²² Naugna igne tahati mala mei namo ka God balu nagnafa heta nei fatutuani ni fara mae Jisas Kraes. Mana faklinodihi nagnafada nei gaoghathoda te thona. Eghume tahati laseni God na la hata fadeleidihi nakhibodare nei mana la faklino ghitahi ke ulugna thegna.

²³ Tahati mala kegra haghe balu rouronu kau nonomho te keli eidi glepo te fatutuani ni tahati nate thoke mei ginau. Eghume thosei ghatho peapea naugna God neke kulu nhaꞌa chekehi ka tahati. Mana ginauna edi glepo igre.

²⁴ Tahati mala ghaoghathodi koba unha te mala faheta ghita theda kau namha nei gloku te keli.

²⁵ Thosei babaꞌo ka puhi salofodu nei tharai, neuba ne thodohi keha naiknore. Tahati fari fahetai mala kegra maku, tulao, naugna u narane mala ke pulo meigna Lord na la namohi!

²⁶ Tahati mala edi glepo igre, naugna tahati lasedi glepo te tutuanire. Eghume ihei te heta ka puhi te diꞌa na, ginauna theo kaisei fafara te tangomana nate atha kokodi nakhibognare.

²⁷ U naikno tuana ginauna ofo balu mhaghu, naugna mana laseni God ginauna fateni mana. Naikno te tirodi fanomho ka chekegna God na ginauna na gnubra ka khaꞌaghi.

²⁸ Mae ihei teke huhughudi nogna vetula mae Moses igre eghuteuna phei mae ba thiloi filoni mana te huhughuni vetula na, naiknore neke theome kokhonini mana. Mare neke faleheni mana.

²⁹ Te eghu na, unha nate eni God ranghini mae ihei te filo soruni Thugna God na? Unha nate eni God ranghini mae ihei te filo soruni dadaragna mae Kraes teke horoghoto ka nogna nhaꞌa cheke God na ngala nate fagaeni mana ka nakhibo na? Unha nate eni God ranghini mae ihei te filo soruni mae Tharunga te Blahi te falalase nogna namha na ka mana? Mae igne nabagna na mala au papara fara!

³⁰ Tahati laseni God neke cheke eghu, “Iara ngala nate tughu fapulo unha najafra te eni mare na!” Mana jaola neke cheke eghu, “Lord ginauna na fatedi nogna naiknore.”

³¹ Glepo mamhaghuana tulao jame kaisei mae te kegra ka fate ke ulugna God mae te karha na.

³² Ghotilo ke ghathoni unha teke eni tifa ia, ka narane teke kulu fatutuani ni ghotilo mae Kraes na. Kau narane tuare neuba neke para ghami fara, ghotilo heta ghemi neke theome mhaghu.

³³ Ka keha fata naiknore maꞌe ghami ghotilo ke uludi naikno te kmana, ba edi keha puhi te diꞌa ka ghotilo naugna ghotilo fatutuani ni mae Kraes. Eghuteuna keha fatare ghotilo au baludi naikno te paradire.

³⁴ Ghotilo diꞌanagnafa baludi keha ka ghotilo te au ka suga sosolo. Eghuteuna kate hata keha naiknore gobigna lepo teke khotodi ghotilo re, ghotilo gleale'a kolho, naugna ghotilo lasenihi glepo te keli fara na ofo ghami ghotilo teu kligna. Eghuteuna glepo igre te au fabrahu tifa tifa.

³⁵ Eghume, thosei ghatho peapea naugna God ginauna thofno tabadi iheire te loku famaku ka nodi fatutuani na te ghilei thoke ka narane leghu lahu.

³⁶ Kegra famaku mala tangomana ghotilo te eni unha te magnahagheni God na. Eghuteuna kate eni ghotilo unha te magnahagheni mana na, ghotilo ginauna na hata unha teke nhaꞌa chekeni mana na.

³⁷ Eni igne naugna grioriso te blahi na cheke eghu eigna igne, “Mae ihei nate mei na mana ginauna mei. Mana theome raugha.”

³⁸ “Nogu naikno iara te doglo are ginauna athini thofno karha na, naugna mare ne fatutuanidi nogu cheke iara gre. Nu te figri tagru mare te theome fatutuani ghau iara na, iara ginauna na theome keli tagu.”

³⁹ Nu tahati gne theome naikno mala figri fapulo mala au ka glehe te theo gnafagna. Theo. Tahati naikno mala fatutuani ni God mala au ka karha tifa tifa.