Hibru 1 - Buka Blahi Ka Cheke Holo

Mae Thugna God mei ne toutonuni chekegna

¹ Tifa na God neke vahidi keha mae profet mala cheke ranghidi mae ku'edara. Mana neke cheke ka mare kmana fata nei kmana nafnata puhi.

² Nu gognaro na kau narane leghu lahu igre, God ne kuruni mae Thugna mala cheke ka tahati. Eghuteuna, vahini mae Thugna mala hohoro u nauthoglu igne, nei mala khotodi mana gobigna lepo fateo te au ke lamnagna.

³ Mae Thugna na ne fathakleni u siasigla gna God. Eghuteuna mana ngala te thofno hata puhigna God na. Mana ne loku fodu gobigna lepore kau chekegna te nolaghi. Ke leghugna te hata fadelei mana u nakhibodi naiknore, mana ne gnokro soru kau sape nafnakno kligna ka khame nhetagna God mae ihei te nolaghi fara.

⁴ Eghume, gognaro na mae Thugna kaisei mae biꞌo fara ke uludi hatimare mae engel. God jaola neke tusu ranghini mana kaisei nangha te biꞌo fara ke uludi hatimare mae engel.

U Thugna God na mae biꞌo ke uludi engel re

⁵ Igne tuani fara, naugna God neke theome cheke eghu ka kaisei mae nogna engel unha teke cheke eghu mana ka mae Thugna na, “Iagho mae Thugu iara, funu gognaro gne iara mae Kmamu iagho.” Nei jaola, God neke theome cheke eghu ka kaisei engel, “Iara ginauna Kmagna mana, eghuteuna mana ginauna mae Thugu iara.”

⁶ Kate kuru meini God thofno mae Thugna ulu lahu kau nauthoglu igne, mana ne cheke eghu, “Nogu engel iara gre mala kafe pogho soru ke ulugna mana.”

⁷ Igne unha teke chekeni God eidi hatimare mae engel, “God neke hohoro nogna engel re mala jateula nuri, nei nogna mae glokure jateula deudeplu khaꞌaghi.”

⁸ Nu God neke cheke eghu agne eigna mae Thugna, “God, nou sape nafnakno iagho na au fabrahu tifa e tifa! Iagho ginauna na funei frunidi nou naiknore ka puhi te keli nei doglo.

⁹ Iagho magnahaghei unha glepo te doglo nei theome magnahaghei unha glepo te diꞌa. Eghume nou Lord God neke vahi nigho nei tusu ranghi nigho nafnakno te biꞌo nei gleale'a te uluni nodi gleale'a iheire te au balumu.”

¹⁰ God ne cheke eghu langau, “Lord, ka fufunu gna ia iagho neke hohoro u nauthoglu igne. Eghuteuna maloa gne neke hohoro ka khamemure.

¹¹ Glepo igre ginauna na ari theo nafudi nu iagho ginauna na au fabrahu. Nauthoglu nei maloa teugre ginauna na diꞌa jateu pohe eghu.

¹² Iagho ginauna na lolhopo glepo igre jateula phoko ba jateula pohe te thona eghu mala ke tughu majaghani. Nu iagho themu na kaisei nanaba fabrahu theome ke tughu, eghuteuna karhamu iagho na ginauna na theo ka huigna.”

¹³ Eghuteuna God neke theome cheke eghu ka kaisei mae engel unha teke cheke eghu mana ka mae Thugna na, “Iagho gnokro agne fei nhetagu, mala ghilei tapla sorudi iara nou mae naoka iagho gre ke parigna nou nolaghi na.”

¹⁴ Mae unha si engel grea? Mare khogla tharunga kolho, mala loku ranghini God. Eghuteuna God kurudi mare mala toghodi iheire te athini u thofno karha na.