Filipae 4 - Buka Blahi Ka Cheke Holo

Mae Pol cheke faheta ranghidi naikno khiloau Filipae

¹ Eghume, kheraguro, iara magnahaghei ghami ghotilo jateula teke chekeni iara ka ghotilo ia eghu kegra heta ka nomi fatutuani na ka Lord. Iara thono namha ghami ghotilo nei magnahaghei te filo ghami ghotilo. Uve kheraguro, iara gleale'a fara nei thono fahaehaghe ghau fara eigna nakarhami ghotilo na. Naugna ghotilo jateula kaisei taba eghu ka gloku biꞌo te eni iara gne.

² Iara toredi fara phei gaꞌase igre, Iudia ghe Sentiki gre, mala kaisei gaoghatho ngala repa ke fofodu fapulo, naugna repa nogna naikno Lord.

³ Iara jaola tore nigho iagho thofno mae kheragu te keli ia mala toghodi repa ka puhi igne. Naugna repa igre loku heta balugu iara mala toutonuni u Nonomho te Keli eigna mae Jisas Kraes. Repa jaola loku heta balugna mae Klement nei baludi keha nogu mae gloku iara gre. God la kulu riorisohi nanghadire ka nogna buka na. U buka tuana kafe au nanghadi naikno nate athini u karha fei tifa na.

⁴ Gleale'a koba balugna noda Lord. Uve, iara nake fapea chekei ngala ka ghotilo, gleale'a!

⁵ Kafe lolokelidi naikno te gnafare, naugna Lord na la namo meihi.

⁶ Thosei nanga nomi fara eigna unha te thoke ghami ghotilo na. Nu tarai ka God, toreni mana unha te magnahaghei na. Ne tore nga ghotilo ka mana nu, te keli na, ghotilo kulu cheke fakelini ghu mana eghu.

⁷ Eghuteuna God ginauna tusu ranghi ghami ghotilo pharikeli te biꞌo uludi noda glalase tahati re. U pharikeli igne ginauna au ka nagnafami nei gaoghathomi teu ghotilo re mala theome nanga nomi ghotilo, naugna ghotilo kaisei ngala balugna mae Jisas Kraes.

Ghathodi glepo te kelire

⁸ Kheraguro, iara magnahaghei te chekeni kaisei glepo ka ghotilo. U puhi te keli fara te mala ghathodi koba ghotilo re igre. Jateula ngau puhi te tutuani, puhi te fnakno, puhi te doglo nei puhi te famane nei puhi te thofno keli fara ka nonomho dire.

⁹ Ghatho fakelidi glepo te farirhiu ghami iara igre, nei glepo te edi iara tela filodihi ghotilo ra, nei glepo te edi iara tela nomhidihi ghotilo ra eghu. Eghuteuna God mae te tusu ranghi ghita u pharikeli na, mana ginauna au balumi ghotilo.

Cheke fakeli eigna nodi thotogho

¹⁰ Iara thofno gleale'a biꞌo fara nei cheke fakelini Lord, naugna neubane raugha ngau, gognaro na ghotilo kela funu togho fapulo ghau iara. Iara lase ghami ghotilo, ghotilo ghatho ghau iara koba, neubane theo kaisei nabrou te mala togho ghau iara na.

¹¹ Iara theome chekeni, iara ne kmo'e ka glepo teuna. Theo. Naugna iara au gleale'a koba ka unha glepo te au ka thegu re.

¹² Keha fatare iara kuma nei keha fatare iara dedei. Eghuteuna iara laseni puhi te mala au gleale'a fabrahu ka vido te boho ba ka vido te rofo na. Ka vido te kmana glepo ba ka vido te theo glepo na.

¹³ Iara tangomana te edi glepo igre, naugna mae Kraes mae ihei te au nolaghi na te togho ghau iara na.

¹⁴ Nu neubane eghu ngau, thotogho teke edi ghotilo ka iara kani teke au iara ka vido te ninhigrana ra thono keli fara.

¹⁵ Ghotilo naikno khiloau Filipae ra lasenihi igne ka teke funu toutonuni iara u Nonomho te Keli na jare ia, nei ke leghugna tuana kate jifla Provins Masidonia, theo kaisei khiloau jare teke togho ghau iara na. Nu ghotilo ngala teke ghatho ghau nei togho ghau teku iara ka sileni na.

¹⁶ Kani au tekeu iara Tesalonika ia ghotilo neke famei thotogho koba ka iara.

¹⁷ Nu iara theome magnahaghei te fiti hata thotogho kolho ka ghotilo. Theo. Iara magnahaghei ghami ghotilo nga te mala hata u taba biꞌo te mei funu ka God na.

¹⁸ Iara la kafe hatahi gobigna lepo teke magnahaghedi iara re. Tulao mae Epafrodaetus hata neke mei ka iara thotogho teke famei ghotilo ra. U thotogho te famei ghotilo igre jateula u fafara te sisirigna nate keli tagna God ia eghu.

¹⁹ Eghume, noda God mae ihei te khotodi gobigna lepo te gnafare, mana ginauna tusu ranghi ghami ghotilo unha te magnahaghedi ghotilo na. God tangomana te eni igne ka tahati, naugna tahati nogna naikno mae Jisas Kraes.

²⁰ Tahati cheke fakelini koba nanghagna God Kmada tifa te tifa. Amen.

Kubae leghu lahu

²¹ Iara magnahaghei te kubae ghami ghotilo nogna naikno mae Jisas Kraes te au jare ra. Naikno khiloau te au balugu iara igre jaola magnahaghei te kubae ghami ghotilo.

²² Nogna naikno God te kafe au agne teu igre, tulao naikno te loku ka sugagna mae Funei Sisa igre, magnahaghei kubae ghami ghotilo.

²³ Nogna khokofakasai noda Lord Jisas Kraes au balumi ghotilo. Me gnafa. Iara, mae Pol.