Filipae 2 - Buka Blahi Ka Cheke Holo

¹ Gaoghathomi ghotilo na heta fara, naugna ghotilo kaisei ngala balugna mae Kraes, nei mana namha ghami ghotilo. Eghuteuna ghotilo kaisei balugna mae Tharunga te Blahi nei ghotilo namhadi nei kokhonidi eghu naiknore.

² Eghume iara thono tore ghami ghotilo mala kaisei nagnafa ngala ka unha puhi te magnahaghei eni teu ghotilo na nei biꞌo nomi namha na fari themi. Te eni ghotilo igne, iara na thono gleale'a fara ka ghotilo.

³ Eghuteuna ghotilo thosei ghatho ghami themi ba fahaehaghe eidi unha glepo keli te edi ghotilo re. Nu nhaꞌa fapari ghami themi, eghuteuna ghatho tahudi keha naiknore.

⁴ Thosei khogla ghathoni kolho unha te magnahagheni themu na, nu te keli na, kulu ghathoni ghu unha te magnahagheni mae kheramu fofodu na.

⁵ Gaoghathomi nei puhimi teu ghotilo re mala jateula gaoghathogna nei puhigna eghu mae Jisas Kraes.

⁶ Neuba mae Kraes ne kaisei ngala balugna God, mana neke theome loku famaku ka puhi te kaisei ngala balugna God na.

⁷ Mae Kraes neke theome ghatho peapea, nu mana gleale'a neke lisa laoni nogna nolaghi biꞌo balu nafnakno na neke leghuni puhigna mae gloku kolho. Eghuteuna mana karha mei naikno neke au jateula fiti naikno neku kolho ka nauthoglu gne.

⁸ Mana nhaꞌa faparini thegna neke leghuni gaoghathogna God na neke lehe ke kligna gaju fafatha jateula kaisei mae teke blau neku.

⁹ Naugna igne, God ne fafnaknoni mana ne tusu ranghini kaisei nangha te biꞌo tulao ke uludi nangha te gnafare.

¹⁰ Eghume naikno te gnafa te au kligna nei ka nauthoglu igne ba iheire te au ka namonodi naikno te lehere ginauna tuturupuku soru ka mana.

¹¹ Eghuteuna mare ginauna kafe cheke eghu, “Mae Jisas Kraes na mae funei.” Eghuteuna mare ginauna kafe cheke fakelini nanghagna God Kmada.

Eni unha te magnahagheni God na

¹² Kheraguro, kate au tekeu iara balumi ghotilo jare ia, ghotilo neke leghudi koba nogu farirhiu iara re. Neubane au fadelei iara, iara magnahaghei ghami ghotilo fara te leghu ghau iara gognaro gne. Loku heta balu mhaghu nei fifilo fakeli mala gnafa fakeli nogna gloku God te mala athi ghotilo karha na.

¹³ God na loku balumi ghotilo nei togho ghami ghotilo eghu naugna mana magnahaghei te edi ghotilo unha te magnahaghedi thegna re.

¹⁴ Uve, te chekeni iara ka ghotilo na, thosei au cheke leghugna nei thosei khuru magra eghu.

¹⁵ Nu au fadelei ka glepo te diꞌare, mala nu theo kaisei naikno te filoni kaisei najafra ka ghotilo na eghu. Ghotilo ginauna mala goro thugna God eghu mala theo kaisei najafra tami. Nu ghotilo ginauna au ngala kau nauthoglu igne baludi naikno te thono diꞌa fara puhidi are. Uve, ghotilo mala jateula u nathunu te phae kate romno ka maloa na ia eghu ka mare.

¹⁶ Naugna ghotilo mala toutonu eigna u thofno karha na ranghidi. Eghuteuna te eni ghotilo igne na, iara ginauna gleale'a fara ka narane nate ke pulo mei mae Kraes na. Naugna igne u fagaglana gna te theome fiti loku kolho iara kate theo nafugna na.

¹⁷ Nomi fatutuani ghotilo na jateula kaisei fafara te tusu lao tahati ka God ia eghu. Nu jame falehe ghau iara mare na, dadaragu iara na ginauna thofa jateula kaisei fafara te salofodu baludi nomi fatutuani ghotilo ra eghu. Iara ginauna gleale'a fara kolho balumi ghotilo.

¹⁸ Eghume jateula tuana eghu ghotilo gleale'a balugu iara.

Eidi mae Timoti ghe mae Epafrodaetus

¹⁹ Jame te nogna magnahaghei thegna noda Lord Jisas Kraes na, iara ginauna ghosei kuruni mae Timoti mala ari sigho ghami ghotilo. Mana ginauna toutonu ranghi ghau iara keha famane thoutonu eimi ghotilo eghuteuna iara ginauna thofno gleale'a fara kate ke pulo mei mana ka iara na.

²⁰ Kaisei mae Timoti ngala jateula iara teu te nanga ghami fara ghotilo na.

²¹ Keha naiknore ghathodi thedi kolho, eghuteuna tirodi hironi puhigna mae Jisas Kraes.

²² Nu ghotilo la filo glanihi mae Timoti, mana theome nafnata naikno igre. Mana togho fakeli ghau iara jateula kaisei mae sitei te toghoni mae kmagna na ia eghu. Ghepa loku fodu mala tangomana naiknore te kafe nomhini u Nonomho te Keli na.

²³ Eghume, kate laseni iara unha nate eni mare ka iara na, iara magnahagheni mana te ghosei ari ka ghotilo.

²⁴ Jame te keli ka noda Lord na, iara thegu na ghosei ari filo ghami ghotilo.

²⁵ Te doglo ka gaoghathogu iara na fapea fata kuru arini mae kherada Epafrodaetus ka ghotilo. Mana neke loku nei togho ghau iara eghu ka nogna gloku mae Kraes.

²⁶ Mae Epafrodaetus gne thono magnahaghei teke ari filo ghami ghotilo. Mana nanga nogna fara naugna ghotilo la nomhinihi mana teke fogra agnea.

²⁷ Mana neke thono fogra fara neke namo lehehi. Nu God neke kokhonini, neke fakarhini mana. God jaola ngau neke kokhoni ghau iara, naugna jame te lehe mana na iara jaola neke lehe ka diꞌanagnafa.

²⁸ Tuana gaoghathogna teke magnahaghei kuru fapuloni mana iara ka ghotilo na, mala ke gleale'a ghotilo kate filoni mana na. Eghuteuna mala theome ke nanga nogu iara eimi ghotilo.

²⁹ Naugna igne, ghotilo taji fakelini mana balu gleale'a fara ka nanghagna Lord. Eghuteuna ghotilo jame kafe ghatho tahudi nafnata naikno jateula mae Epafrodaetus gne teugre.

³⁰ Naugna mana neke namo lehehi ka teke loku ranghini mae Kraes na. Mana neke theome mhaghuni glehe na kate ke togho ghau iara ka gloku te theome tangomana ghami ghotilo te eni na.