Filipae 1 - Buka Blahi Ka Cheke Holo

¹ Uve, iara mae Pol ghepa mae Timoti phei nogna mae gloku mae Jisas Kraes. Ghepa riso ari letas igne ka ghotilo naikno khiloau te au ka namono Filipae. Eghuteuna ghepa riso ranghidi langau hatimare mae biꞌo nei hatimare mae te totogho ka khiloau Filipae.

² Ghepa toreni nogna khokofakasai nei pharikeli God Kmada nei nogna mae Jisas Kraes noda Lord mala au balumi.

Nogna tharai mae Pol

³ Iara cheke fakelini God koba kate ghatho ghami ghotilo na.

⁴ Eghuteuna leuleghu narane na iara thono gleale'a fara kate ghatho ghami ghotilo ka nogu tarai na.

⁵ Naugna funu ka narane ulu lahu teke fatutuani ni ghotilo mae Jisas Kraes te posa ka narane gognaro gne, ghotilo ne togho ghau iara ka gloku te mala fateiteigna u Nonomho te Keli gne.

⁶ God mae ihei teke fufunu gna u gloku karha na ka nakarhami ghotilo re, mana ginauna eni fabrahu u gloku te keli tuana ghilei gnafa ka narane na teke pulo meigna mae Jisas Kraes. Eghuteuna iara thono fatutuani ni fara igne.

⁷ Ghotilo au fabrahu ka nagnafagu iara na, eghume iara nabagu te ghatho ghami ghotilo na. Naugna ghotilo kaisei balugu iara ka nogna khokofakasai God. Eghuteuna igne tutuani fara, neubane au iara ke lamna suga sosolo, ba au iara kosi mala cheke thakleni u Nonomho te Keli gne ba iara toghodi mare mala fatutuani ni mae Jisas.

⁸ God na lase ghau iara te thono magnahaghei filo ghami ghotilo na. Naugna iara namha ghami ghotilo ka nogna namha mae Jisas Kraes.

⁹ Iara tarai ghami ghotilo mala kotu biꞌo ghotilo nomi namha na ranghidi kherami fofodure ka nogna puhi nei nogna glalase eghu God.

¹⁰ Eghume ghotilo ginauna tangomana te lasedi glepo te doglore. Ka puhi tuana ghotilo ginauna au fakeli nei doglo eghu ka narane teke pulo meigna mae Jisas Kraes.

¹¹ Eghume, ghotilo ginauna edi kmana glepo te keli te mei funudi ka thegna mae Jisas Kraes, mala tangomana ghotilo te ghatho tahuni nei cheke fakelini teu nanghagna God na.

Mae Pol sosolo mala toghoni Nonomho te Keli

¹² Kheraguro, iara magnahaghei ghami ghotilo te lase fakelini unha te sosoloni iara gognaro gne mala toghoni te fateiteigna u Nonomho te Keli gne.

¹³ Gognaro na nogna soldia mae King nei keha naikno langau teu igre mare kafe laseni puhi te sosoloni iara gne, naugna iara gne nogna naikno gloku mae Jisas Kraes.

¹⁴ Kate lase ghau iara te au ka suga sosolo gognaro gne, kmana naikno ka khiloau gne mare la frane fara te toutonuni nogna u Nonomho te Keli mae Jisas Kraes.

^15-17 Uve, keha naiknore toutonuni eigna mae Jisas Kraes, nu mare eni igne ka puhi goghotu kolho. Mare toutonu eigna mae Kraes nu mare theome au kaisei gaoghatho te doglo ka nagnafadire. Mare magnahaghedi thedi kolho te fnakno na, eghume mare magnahaghei te edi glepo te diꞌa igre ranghi ghau iara kate au iara ka suga sosolo gne. Nu neubane eghu ngau, keha naiknore toutonu eigna mae Kraes naugna mare au gaoghatho te doglo ka nodi gloku na. Eghume mare namha ghau iara, naugna mare lase ghau iara gne kaisei mae mala cheke thakleni u Nonomho te Keli eigna mae Kraes.

¹⁸ Neubane eghu ngau naiknore ne edi kmana puhi diꞌa ranghi ghau iara ba gaoghathodi mare te mala toutonu na theome doglo fabrahu ka tathagna God na, iara gleale'a. Naugna glepo te ulu na te mala toutonuni mare eigna mae Kraes na.

¹⁹ Iara jaola gleale'a naugna te laseni iara na ka nomi tharai ghotilo na God ginauna togho ghau iara ka nogna nolaghi mae Tharunga te Blahi te mala atha fajifla ghau iara ka u suga sosolo na.

²⁰ Iara thono theome magnahaghei te eni kaisei glepo te mala famamaja ghau thegu ke ulugna mae Kraes. Nu iara magnahaghedi naiknore te filo glani ka iara nogna nolaghi biꞌo mae Kraes. Neuba mare ne falehe ghau iara ginauna, iara magnahaghedi naikno khiloaure te mala kilo fnaknoni fabrahu mae Kraes.

²¹ Glepo ulu ka iara eigna jateula igne eghu te ghathoni iara na, u nakarha na kaisei mae Kraes ngala. Eghuteuna te lehe iara na, iara ginauna theome theo te hatini u karha na.

²² Nu te karha brahu teu iara na, iara ginauna edi kmana gloku te keli. Eghume iara theome laseni aheva nate vahini iara na.

²³ Thono ninhigrana ranghi ghau iara te vavahi ka phei nabrou igre. Iara magnahagheni fara te jifla kokoni u nauthoglu igne mala au balugna mae Kraes, naugna tuana ngala glepo ulu te magnahagheni iara na.

²⁴ Nu glepo te ulu tulao na, ghotilo magnahaghei ghau iara karha nga teu te mala togho ghami na.

²⁵ Uve, iara laseni te magnahaghei ghau iara ghotilo na. Eghume iara na au balumi ghotilo. Iara ginauna togho ghami ghotilo mala biꞌo nei gleale'a eghu ghotilo ka nomi fatutuani na.

²⁶ Kate filo ghau iara te mei ka ghotilo na, ghotilo ginauna na fodu salaꞌui ka gleale'a biꞌo mala cheke fakelini Jisas Kraes.

Leghuni puhigna mae Kraes

²⁷ Uve, glepo te ulu na puhimi ghotilo re mala leghuni nogna Nonomho te Keli mae Jisas Kraes. Eghume neubane mei iara ne sigho ghami ba ne tei koko ghami, iara ginauna nomhidi thoutonu te keli eimi ghotilo re. Iara magnahaghei te nomhi ghami ghotilo te kaisei nomi gaoghatho ngala nei kegra maku ka nomi fatutuani na ka mae Jisas Kraes.

²⁸ Eghuteuna thosei mhaghudi iheire te theome magnahaghei ghami ghotilo na, nu te keli na kegra maku koba. Te eni ghotilo tuana na, mare ginauna laseni te theo kaisei nodi nolaghi te mala falehe ghami ghotilo na. Nu mare ginauna laseni God ngala te au nolaghi te mala fakarhi ghami ghotilo na nei paradi mare.

²⁹ Tutuani fara, God la tusu arihi ka ghotilo u nafnakno te mala loku ranghini nei fatutuani ni mae Kraes nei au papara malagna mana teuna.

³⁰ Eghume gognaro na ghotilo tangomana te kaisei balugu iara kau magra gne mala loku famakuni u Nonomho te Keli gne. U nafnata magra te filoni ghotilo ka iara te eni te mei ngala funu tifa igne, eghuteuna ghotilo lase ghau iara te heta ghegu teu ngala gognaro gne.