Filimon 1 - Buka Blahi Ka Cheke Holo

¹ Uve, iara mae Pol, iara au ka suga sosolo eigna iara ne toutonuni nogna Nonomho te Keli mae Jisas Kraes. Ghepa mae thabusigna ka khiloau Timoti, rioriso ari letas igne ka iagho Filimon mae kherami fofodu ka gloku malagna God.

² Ghepa jaola magnahaghei te rioriso ranghidi naikno khiloau te mei tarai koba ka nou suga iagho ia, tulao ka greghada Apia nei ka mae thabusigna Akipas, kaisei mae loku heta baluda.

³ Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.

Famane cheke ranghini mae Filimon

⁴ Uve ghema Filimon, iara cheke fakelini noda God koba kate tarai nigho na.

⁵ Naugna iara nomhi nigho koba iagho namhadi fara naikno khiloau re nei fatutuani heta ka noda Lord Jisas.

⁶ Eghume iara tarai nigho iagho mala loku heta iagho kate toghodi naikno khiloau eigna mae Jisas Kraes. Kate eni iagho igne, God ginauna na togho nigho mala thofno lasedi glepo te keli God teke tusu ranghi ghita tahati nogna naikno Kraes.

⁷ Ghema thabusigna, nogna naikno God igre mare keli tadi fara eigna puhi te namhadi iagho. Eghuteuna glepo te edi iagho tuare iara keli tagu fara nei farhetani nagnafagu na.

Mae Pol toreni mae Filimon mala hata fadelei nakhibogna mae Onesimasi

^8-9 Gognaro na iara magnahaghei toreni ka iagho kaisei glepo te keli. Iara magnahagheni igne naugna glepo doglo te mala eni iagho na. Neuba iara ne au nolaghi te mala huhuru nigho ka nanghagna mae Kraes te mala eni igne, iara namha nigho nei tore nigho mala eni igne kolho. Uve, iara mae Pol, eghuteuna iara la mae khueku'ehi gognaro agne ka sosolo malagna mae Jisas Kraes.

¹⁰ Iara tore nigho mala keli ranghini mae Onesimasi. Iara neke farirhiuni mana kate au teu iara ka sosolo gne. Eghume gognaro na mana jateula mae thugu iara.

¹¹ Tifa na mana neke theome togho nigho iagho, nu gognaro na mana tangomana te kafe togho ghita tapa hui.

¹² Iara thofno namhani mae Onesimasi, nu gognaro na iara nake kuru fapuloni mana ka iagho.

¹³ Iara ne magnahagheni mana te tughu nigho iagho mala au balugu agne mala togho ghau kate au ka suga sosolo gne malagna Nonomho te Keli.

¹⁴ Nu iara theome magnahagheni mana te au teu balugu agne eghu te theome kaisei gaoghatho iagho na. Naugna iara magnahaghe nigho te edi glepo te keli leghuni gaoghathomu themu na. Iara theome magnahaghei te huhuru nigho na.

¹⁵ Jame gaoghathogna te tei koko nigho mae Onesimasi katha vido kmoꞌei igne, God magnahaghe nigho iagho teke hata fapuloni mala au balumu fabrahu.

¹⁶ Eghuteuna gognaro na mana theome kaisei mae sneka kolho. Theo. Gognaro na mana kaisei mae ke tulao gna mae snekai, nu mana thofno mae thabusida ka khiloau. Iara magnahagheni fara mana nu jau iagho ginauna magnahagheni fara mana ke tulao gu iarai, naugna mana nou mae sneka keli iagho nei mae kheramu kelila ka khiloau gne.

¹⁷ Te ghatho ghau jateula mae kheramu thofno teu iagho na, iagho taji fakelini mana, jateula iagho te taji fakeli ghau iara kate thoke ka sugamu ia eghu.

¹⁸ Te eni mae Onesimasi kaisei najafra ba te kaoni mana ka iagho na, cheke mei ka iara mala ke tughu fapulo.

¹⁹ Iara mae Pol te rioriso soru cheke igre ka khamegu thegu. Iara ginauna nake tughudi nogna kaoni mana re. Nu iagho jame theome ghatho ihodila teke kaoni nakarhamu themu na ka iara ia.

²⁰ Ghema kheraguo, iara tore nigho mala togho ghau ka nanghagna Lord. Fameomegoni nagnafagu gne ka mae Kraes.

²¹ Iara rioriso ari cheke igre ka iagho, naugna iara laseni iagho ginauna na edi unha te toredi iara mala edi iagho teura. Jaola iagho ginauna na edi glepo ke uludi nogu cheke iara igrei.

Nogna cheke leghu lahu mae Pol

²² Keha na igne, iara magnahaghe nigho iagho te tarabana kaisei chogho malagu iara. Iara ginauna na tangomana te ari thoke ka ghotilo na naugna iara fatutuani ni God ginauna na nomhidi nomi tharai ghotilo re.

²³ Mae Epafra te sosolo balugu iara malagna mae Jisas Kraes igne, kubae nigho iagho.

²⁴ Eghuteuna jaola mae Mak, mae Aristakas, mae Dimas, nei mae Luku mae te loku balugu iara igre kubae nigho iagho.

²⁵ Nogna khokofakasai noda Lord Jisas Kraes au balumi ghotilo. Me gnafa. Iara, mae Pol.