Fatilo Jone 1 - Buka Blahi Ka Cheke Holo

Toghodi mae gloku ka khiloau

¹ Iara mae mala baubatu ka khiloau. Ranghi nigho thabusigna Gaeasi. Iara thofno namha nigho.

² Uve thabusigna, iara laseni nakarhamu iagho ka khiloau na keli fabrahu. Iara tarai eimu iagho mala karha keli eghu mala theome thokei nigho kaisei fogra.

³ Kate mei toutonu keha mae gloku ka khiloau gne eigna nakarhamu iagho na, iara ne gleale'a fara. Naugna te chekeni mare na, iagho thofno leghuni Nonomho te Keli eigna mae Jisas Kraes.

⁴ Iara ne thofno keli tagu fara kate nomhidi goro thugu te leghuni Nonomho te Keli gne.

⁵ Uve thabusigna, thofno keli fara te toghodi iagho mae gloku ka khiloau te posa mei ka sugamu na neubane theome lasedi iagho kehare.

⁶ Mare ne mei toutonuni nou namha iagho na ka khiloau igne. Thofno keli fara iagho te toghodi mare ka unha te nabagna nodi thei na, mala tudu fabrahu mare nodi gloku na. Te eni iagho igne, God ginauna keli tagna fara.

⁷ Eigna mare tei toutonuni mae Kraes. Nu mare theome hata thotogho ka hatimare mae bongihehe, neuba mare ne toutonu ranghidi u Nonomho te Keli eigna mae Jisas Kraes.

⁸ Eghume noda gloku tahati te mala toghodi mae igre. Kate eni igne, tahati kaisei loku fodu malagna Nonomho te Keli.

⁹ Iara neke rioriso kaisei letas kmoꞌei ranghini khiloau eigna igne. Nu mae Diotrefes tirogna fanomho ka unha te chekeni iara na. Eigna mana magnahaghei te fnakno nei mae biꞌo eghu ka khiloau gne.

¹⁰ Kate mei iara na, iara ginauna na chekedi ka ghotilo unha te edi mae Diotrefes. Mana chaichaghi nei cheke fadiꞌa ghita tahati. Nu theome tuana ngala eghu te eni mana na. Mana tirogna toghodi iheire te loku ranghini Kraes. Mana jaola lhotidi iheire te magnahaghei toghodi hatimare mae gloku nei faꞌau kosidi ka khiloau.

¹¹ Uve thabusigna, thosei leghuni unha te diꞌa na, nu leghuni unha te keli. Mae ihei te eni unha te keli na mana thugna God. Nu mae ihei te eni unha te diꞌa na mana theome laseni God.

¹² Naiknore te chekei na mae Demitrias gne kaisei mae keli fara. Eghuteuna unha te chekeni naiknore tutuani fara. Ghehati jaola cheke fakelini mana, eghuteuna ghotilo laseni unha te chekeni ghehati na tutuani fara.

¹³ Iara au kmana glepo te mala chekedi ranghi nigho, nu iara theome magnahaghei te rioriso soru ka letas igne.

¹⁴ Iara ghaoghatho mala ari filo nigho thogheiro eghuteuna tahati ginauna na loku fodu mala chekedi glepo igre.

¹⁵ Pharikeli ka iagho. Thabusigna igre kubae nigho. Kubae ka sopagna kherami ghehati. Me gnafa. Iara, mae Jone.