Fapea Tesalonika 3 - Buka Blahi Ka Cheke Holo

Mae Pol toredi naikno khiloaure mala taraidi

¹ Uve kheraguro, tarai ghami mala tangomana chekegna Lord na mala ghosei tei ka namono te gnafa heva heva, eghuteuna naiknore ginauna tangomana te nomhini nei ghatho tahuni eghu farirhiu tuana, jateula teke enihi ka ghotilo ia eghu.

² Ghotilo jaola tarai ghami mala tangomana God te bara fothi ghami ka puhidi naikno te diꞌare, naugna naiknore theome kafe fatutuani ni u Nonomho te Keli gne.

³ Nu te keli na, ghotilo tangomana fatutuani ni Lord, naugna mana ginauna farheta ghami nei bara ghami ka nogna nolaghi mae Satan.

⁴ Ghehati rouronu ka Lord eimi ghotilo te mala edi unha teke chekedi ghehati ka ghotilo ra. Eghuteuna jaola te laseni ghehati na, ghotilo ginauna edi fabrahu glepo igre.

⁵ Ghehati toreni noda Lord mala batudi nagnafami are mala laseni ghotilo God te namha ghami. Ghehati jaola tarai mala au heta ghotilo jateula mae Kraes te au heta.

Eidi iheire te tirodi loku

⁶ Uve kheraguro, ka nanghagna mae Jisas Kraes noda Lord, ghehati magnahaghei cheke faheta ka ghotilo. Thosei fofodu ka naikno khiloau te tirodi loku are. Naikno te tirodi loku are theome leghudi farirhiu teke tusu ari ghehati ka ghotilo ra.

⁷ Ghotilo themi lasenihi igne, ghotilo mala leghudi puhimi ghehati gre. Naugna kate au balumi ghotilo ra, ghehati neke theome tiromi loku.

⁸ Eghuteuna ghehati jaola neke theome fiti hata kaisei gano ka naiknore. Ghehati themi teke folidi gobigna lepore. Leghu fata na, ghehati loku heta fara bongi narane, naugna ghehati theome magnahaghei kaisei ka ghotilo te ninhigrana ranghini fara.

⁹ Ghehati neke eni igne, neuba ghehati au nomi nolaghi te mala tore ghami ghotilo te togho ghami na. Nu ghehati loku mala togho ghami themi naugna ghehati magnahaghei te falase arini puhi te keli na ka ghotilo mala leghuni ghotilo.

¹⁰ Kate au balumi ghotilo ia, ghehati neke cheke eghu ka ghotilo, “Jame ihei te tirogna loku na, ghotilo thosei faghamuni.”

¹¹ Ghehati chekeni igne, naugna ghehati nomhidi keha naikno ka ghotilo tirodi loku fara. Mare theome eni kaisei unhanga. Nu mare farugusidi thedi ka nakarhadi keha naiknore.

¹² Eghume ka nanghagna mae Jisas Kraes noda Lord, ghehati cheke faheta ka mare mala au fakeli nei loku heta mala au ghedi gano thedi.

¹³ Nu ghotilo kheraguro, thosei babaꞌo eigna te eni gloku te keli na.

¹⁴ Jame ihei ka ghotilo te tirogna leghudi cheke te riso ari ghehati ka ghotilo igre, ghotilo filo glani mae tuana. Thosei fofodu ka mana mala mamaja mana ka puhigna thegna re.

¹⁵ Nu thosei filo faparini jateula nomi naoka eghu. Te keli na ghotilo cheke faheta kolho ka mana, naugna mana kherada tahati ka khiloau.

Nogna cheke leghu lahu mae Pol

¹⁶ Iara toreni Lord, mae funei gna pharikeli mala tusu ranghi ghami pharikeli leghu rane nei ka puhi te gnafa. Lord au balumi.

¹⁷ Iara mae Pol riso kubae ranghi ghami ghotilo ka khamegu thegu. Nogu letas te gnafare iara saen nanghagu na leghu lahu mala laseni teke funu ka iara. Igne puhi te eni koba iara na.

¹⁸ Iara toreni nogna khokofakasai mae Jisas Kraes noda Lord mala au balumi. Me gnafa. Iara, mae Pol.