Fapea Kronikols 9 - Buka Blahi Ka Cheke Holo

Kuin gna Seba ne mei filoni King Solomon

¹ Kuin gna Seba nomho thoutonu eigna King Solomon, aonu naꞌa mei ne filoni mana Jerusalem. Naꞌa ne fariuriudi nogna famane gaoghatho te keli manare balu ghusna te ninhigrana fara. Naꞌa mei balugna kmana naikno, eghuteuna luja kmana glepo ka nogna kamelire. Naꞌa au glepo te famane sisiri kelidi mala gahu insens, nei thina te famane keli filodire, nei kmana gol fara. Kate mei filoni King Solomon na, naꞌa ghusna ne ghusna ka mana.

² Mae Solomon ne cheke tughudi ne gnafa faghusna igre. Theo kaisei glepo te ninhigrana fara ka mana te mala cheke fajifladi gaoghathodi ghusna te edi naꞌa igre.

³ Aonu Kuin igne ne filo glanidi nogna famane gaoghatho te keli mana re, eghuteuna naꞌa ne filodi nogna suga biꞌo teke edi manare.

⁴ Eghuteuna naꞌa filodi gano te au ka tevo na, nei gnokrodi nogna mae biꞌore, nei pohe te pipichi nogna mae glokure. Naꞌa jaola filodi mae gloku te hata te mei gano nei waen teu ka gaghamu na. Eghuteuna naꞌa filodi fafara te edi ka nogna Sugablahi Lord na. Kuin ne jaglo nogna fara ka gobigna lepo igre.

⁵ Aonu Kuin ne cheke eghu ka King Solomon, “Nonomho eidi nou gloku nei nou glalase teu iagho te nomhidi iara kate au teu iara ka nogu kantri na ra thofno tutuani fara.

⁶ Nu iara neke theome fatutuani la ghilei mei filo tathagu. Iagho lalase tutuani fara, eghuteuna iagho dedei fara salaꞌudi unha te mei cheke naikno gre ka iara ra. Uve, iara neke nomhini kakatha kolho eidi gobigna glepo igre.

⁷ Nou mae biꞌo nei nou mae gloku teu iagho igre thono glealeꞌa nodi fara, naugna mare ne au balumu iagho fabrahu ne nomhidi nou cheke nei nou famane gaoghatho te keli teu iaghore.

⁸ Iara cheke fakelini Lord nou God iagho na! Mae ihei te vahi nigho iagho te mala king gna Israel, eghuteuna mana kelitagna fara ka iagho. Naugna mana ghatho tahu ghami ghotilo naiknomi Israel fabrahu, mana vahi nigho iagho mala king nei mala batudi eghu iagho naiknodi Israel ka puhi te keli, nei mala fatedi naiknore ka puhi te doglo.”

⁹ Aonu Kuin hata ne mei namha teke hata teke mei naꞌa igre ne tusu lao ka King Solomon. U namha igre, fati thogha kilo gol, nei kmana glepo te famane sisiri kelidi te mala ei insens, nei keha famane thina te keli fara filodi re. Funu tifa te mei posa gognarona, theo kaisei naikno te tufa famane insens salaꞌudi unha teke tufa Kuin gna Seba igre.

¹⁰ Nodi mae kru King Haeram ghe King Solomon igre tei ka kantri Ofia hata ne mei gol nei famane thina te keli fara filodi re, nei kmana famane thaba te kiloi algum.

¹¹ King Solomon hata thaba algum igre mala horo mala thaplagna nogna Sugablahi Lord, nei nogna suga biꞌo king. Eghuteuna mare jaola hata thaba igre ne edi soasopai nafnata gita mala koje ka Sugablahi. Funu ka narane tuare te ghilei mei posa gognarona, theo kaisei naikno te hata te mei kaisei thaba algum Israel.

¹² Eghuteuna King Solomon ne tusu ranghini Kuin gna Seba unha teke toredi naꞌa re. Aonu mana ne tusu ranghini la ngau keha glepoi ka naꞌa salaꞌudi unha Kuin teke tusu ranghini mana re. Aonu Kuin neke pulo ka nogna kantri na baludi nogna mae glokure.

King Solomon dedei fara

¹³ King Solomon tangomana te hata varadaki thilo thogha kilo gol leuleghu finogha.

¹⁴ Kehana teuna mana jaola hata sileni ka takis te folini mana hatimare mae bisnis, nei sileni te mei ka mae bisnis di ka keha kantri delei, nei sileni te hata mana ka king di Arebia, nei ka mae gavana di ka nohigna Israel, mare hata mei gol nei silva eghu ka Solomon.

¹⁵ King Solomon hata gol mala horo phia gobi greoreo biꞌo. Tahudi gol malagna kaisei greoreo na namo thokeni fitu kilo.

¹⁶ Eghuteuna mana hata gol mala horo thilo gobi greoreo ikodi. Tahugna kaisei na namo thokeni phei kilo. Mana lilisei greoreo igre ke lamnagna Suga biꞌo Gajudi Lebanon.

¹⁷ Eghuteuna king jaola ne horo kaisei sape nafnakno. Mana sesere sape nafnakno igne ka kheꞌi elefant, nei ka famane gol.

^18-19 Sape nafnakno igne au namno step te mala haghe tagna na, eghuteuna nabotho phei mumuju lion te kegra sopa ka phei khukrudi namno step igre. Mare lilisei kaisei glepo pari ke ulu mala tapla king ke kligna gna. Mare edi glepo igre ka gol. Sape nafnakno igne au phei vido mala lilisei khame, eghuteuna phei mumuju lion khegrau jare, kaisei khegra ka keha phile na, eghuteuna kehana kegra ka keha phile na. Theo kaisei king ka nauthoglu igne teke eni kaisei sape nafnakno biꞌo jateula nogna mae Solomon igne teuna.

²⁰ Nogna kapu mala koꞌu King Solomon, mare horo ka gol. Eghuteuna keha glepo te mala ghamu ka Suga biꞌo Gaju gna Lebanon igne, mare horo ka gol kolho. Mare theome eni kaisei glepo ka silva naugna ka naranegna King Solomon igre, te ghathoni mare na silva gne glepo theo nafugna kolho.

²¹ Eghuteuna King Solomon au nogna kmana vaka biꞌo, eghuteuna nogna mae gloku mae King Haeram te loku ka vaka igre. Mare tangomana te tei lithui nabagna thilo finogha, vaka igre te pulo mei balu gol, nei silva, nei kheꞌi elefant, nei mongki nei thua nafnata nanghaji.

²² Ka narane igre, King Solomon thono mae dedei fara salaꞌudi keha king ka nauthoglu igne, eghuteuna jaola thono lalase fara salaꞌudi mare.

²³ Kmana king ka nauthoglu igne magnahaghei fara te mei fanomho ka nogna gaoghatho te keli teke nhaꞌa lao God ka nagnafagna mana na.

²⁴ Leuleghu finogha na mare te gnafa na hata mei namha ka mana, silva, gol, pohe, glepo mala magra, glepo mala ei insens, hose nei dongki.

²⁵ Eghuteuna mana au fati thogha vido mala lilisei hose nei chariot, nei nabotho phei thogha mae mala saghe ka hose. Mana tathaji kehare Jerusalem, eghuteuna keha ka namono jare Israel.

²⁶ Mana funei frunidi hatimare mae king funu ka khoꞌu biꞌo ke raru Khoꞌu biꞌo Iufretis tei posa ke mosu Filistia, eghuteuna tei posa ka nohi ke mata Ijep.

²⁷ Ka narane te king mae Solomon igre, silva na kmana fara Jerusalem jateula te fiti thina ra eghu kolho. Eghuteuna mana edi kmana thaba fara ka gaju sida jateula thua nafnata thaba te kotu tafri kolho ka thogele ra neu.

²⁸ Nogna mae bisnis mae Solomon igre tei foli hose Ijep nei ka keha kantri are neu.

King Solomon ne lehe

²⁹ Keha glepo teke edi King Solomon funu ka narane te funei fruni mana te mei posa ka narane leghu lahu na, mare rioriso sukha ka thilo buka te kilodi, nogna Grioriso Profet Natan, nei nogna Cheke Profet Ahaeja maegna Saelo, nei nogna Mifi Profet Ido eigna King Jeroboam thugna mae Nebat.

³⁰ Solomon neke king Jerusalem, funei frunidi vike te gnafa Israel phiatutu finogha.

³¹ Kate lehe mana na, mare ne giugiluni mana ka bekudi kuꞌegna ra ka nogna Namono biꞌo King Devet. Eghuteuna thugna mana Rehoboam hata sapegna mana na neke king.