Fapea Kronikols 8 - Buka Blahi Ka Cheke Holo

Gloku teke edi King Solomon

¹ King Solomon neke horo nogna Sugablahi Lord na nei nogna suga biꞌo thegna na neku nabagna varadaki finogha.

² Eghuteuna mana neke horo fakeli namono teke snakre lao King Haeram maegna Taea igne ka mana ra mala au tadi vikedi Israel.

³ King Solomon tei ne magra ka mare ke raru Hamat-Soba. Mana uludi mare ne hata namono igne.

⁴ Eghuteuna mana bara ne ligoho ka thina namono te au ka namono nagou Tadmoa. Eghuteuna mana chekedi nogna mae glokure neke babana fakeli namono Hamat mala lilisei gano nei glepo mala magra.

⁵ Eghuteuna King Solomon jaola ne babana fakeli Bet-Horon te au ke kligna thogele nei Bet-Horon te au ka pesigna thogele na. Mare bara ne ligoho ka thina phei namono igre, eghuteuna grengathagna bara igne mare bibilakhi ka aean brahu.

⁶ Mare jaola neke babana fapulo namono Balat nei keha namono mala lilisei gano, chariot nei hose mala magra, ba keha glepo te magnahaghei edi mana Jerusalem nei Lebanon, nei ka keha vido ba nohi te king frunidi mana.

^7-10 Ka narane igre, naiknodi Israel gre hata namono te gnafa te au ka kantri igne, eghuteuna mare neke theome aknu falehe naikno teke kulu au ka namono te gnafa ke lamnagna kantri igne. Naikno igre vikedi mae Het, mae Amo, mae Peris, mae Hivi, nei mae Jebus. Eghume naikno te au teu ka nodi namono maedi Israel gognaro igre theome naiknodi Israel. Aonu King Solomon ne huhurudi naikno igre ne loku fabrahu Israel jateula naikno sneka neu. Mana ne lilisei phei gobi glimafulu maedi Israel mala reireghidi mae sneka igre. Eghuteuna mana theome magnahaghedi mae Israel gre te loku jateula sneka teuna. Mana magnahaghedi mae Israel te mala soldia nei komanda ka armi. Eghuteuna kehare mala funeidi mae te loku ka chariot nei mae soldia te saghe ka hose.

¹¹ Eghuteuna kate gnafa nogna suga biꞌo khetogna mana thugna gaꞌase king gna Ijep, mana hata fajiflani naꞌa ka nogna namono biꞌo King Devet na ne tei au ka nogna suga majaghani biꞌo na. Mana ne cheke eghu, “Theome keli khetogu iara gne te au ka nogna suga biꞌo mae kmagu iara na, naugna vido te au nogna Bokis Blahi Lord igne thono blahi fara, eghume naꞌa theome naba te au agne na.”

¹² Leuleghu fata na, mae Solomon gahu fafara ka Lord ke kligna olta teke horo mana ka glalaba ke ulugna Sugablahi na.

¹³ Mana fafara koba ka narane blahire leghuni unha te chekeni ka nogna Vetula mae Moses. Tulao ka Narane Sabat, Gaghamu Khafa, nei thilo gaghamu te edi mare leuleghu finogha, Narane biꞌo eigna Bret te Theo Isi gna, Narane biꞌo eigna Fitu Wik, nei Narane biꞌo Eigna te Au ka Grorofe Ikoi.

¹⁴ Mana vavahi keha mae pris mala loku leuleghu narane, leghuni unha teke chekeni mae kmagna na. Eghuteuna mana vahidi mae Livaet mala toghodi hatimare mae pris, mala koje nei mala kilo fnaknoni God. Mana jaola vahidi mae iheire te mala reireghi grengathagna Sugablahi na, leghuni unha teke chekeni mae Devet nogna mae gloku God tifa.

¹⁵ Mae pris nei mae Livaet teu igre mare thofno leghudi fara nogna cheke king re ne edi gobigna lepo igre, neuba mare jaola reireghidi chogho mala liliseidi glepo teke tusu ranghini Lord.

¹⁶ Aonu gloku te gnafa teke edi mae Solomon igre ari ne gnafa nodi. Glokugna nogna Sugablahi Lord na ne thofno keli fara, funu ka narane teke famamhakugna pari na tei posa ka fahuhuigna gloku na.

¹⁷ King ne tei ka phei namono Esion-Geba ghe Elat ka gratha Idom.

¹⁸ Ka narane tuare, King Haeram ne fatei keha vaka ka King Solomon baludi keha kapten nei kru eghu, mae iheire te lase loku ka vaka. Mare tei ka kantri Ofia hata neke pulo mei baludi nabotho namno thogha kilo gol ne tufa ka King Solomon.