Fapea Kronikols 7 - Buka Blahi Ka Cheke Holo

King Solomon ne taofi ka Sugablahi na

¹ Kate gnafa tarai King Solomon igne, khaꞌaghi na ne soru mei funu kligna ne ghamu fateo fafara teke edi naiknore. Eghuteuna naphaegna nogna nolaghi Lord na ne fodu ka Sugablahi na!

² Eghuteuna hatimare mae pris theome tangomana te ruma ka nogna Sugablahi Lord na, naugna naphaegna nogna nolaghi Lord igne ne fodu ne salaꞌui ke lamnagna nogna Sugablahi Lord na.

³ Kate filoni naiknore te soru mei khaꞌaghi igne funugna kligna na, eghuteuna naphaegna nolaghi igne ne theome gnafa te phae ke kligna Sugablahi na, naiknore pogho soru ne ghilei thoke pari ka glose na. Naiknore tufru soru ka Lord ne tegioni mana. Eghuteuna naiknore ne tarai eghu, “Thofno keli fara, eghuteuna Mana ghatho tahu ghita fabrahu.”

⁴ Aonu King Solomon baludi naiknodi Israel igre ne fafara mala tufru soruni Lord.

⁵ Mare ne aknu falehe varadaki phei thogha buluka, nei kaisei gobi varadaki thogha sipu malagna fafara igne. Ka puhi igne, king baludi naiknore ne fablahi nogna Sugablahi God igne.

⁶ Ka narane tuana hatimare mae pris ne kegra haghe ka nodi vido na ne kufli ka glepo te kiloi trampet. Ka keha phile na hatimare mae Livaet, mare kegra haghe ka nodi vido na ne koje ka gita nei ifu ka glepo teke edi mae King Devet re. Mare ne koje eghu, “Lord na ghatho tahu ghita fabrahu!” Naiknore ne kafe kegra haghe.

⁷ Aonu mae Solomon ne fablahi glalaba ke ulugna Sugablahi na, naugna olta teke horo mare ka bras na ikoi fara, theome naba te gahu tagna fafara te gnafa re. Eghume ka vido igne te gahu mare u fafara te thofno knoro fara na, eghuteuna mare falao flaoa ka famane wit, nei garofa di fafara re eghu mala laseni mare te au fakeli mare balugna Lord.

⁸ Aonu King Solomon balugna kmana naiknodi Israel ne ei gaghamu eigna Narane biꞌo te mala Au ka Grorofe Ikoi, mare eni gaghamu igne nabagna fitu narane. Ka narane igne, kmana naikno fara mei funudi ke raru Lebo-Hamat, tei posa ka khoꞌu ikoi ke mata nohigna Ijep.

⁹ Mare eni gaghamu igne naba fitu narane mala fablahigna olta na, eghuteuna naiknore neke au fapulo nabagna fitu narane ka Gaghamu gna Narane biꞌo te mala Au ka Grorofe Ikoi igne. Eghuteuna ka fahana gna narane gaghamu na, mare ne loku fodu mala bobothogna gaghamu igne.

¹⁰ Igne ka fafitu nhigra gna finogha. Eghuteuna ka varadaki thiloi gna nhigra igne, king neke kuru fapulodi naiknore mala ke tei ka namonodi re. Mare te gnafa na ne thofno glealeꞌa fara, naugna mare laseni Lord na neke thofno keli fara ranghini King Devet, nei King Solomon, nei jaola ranghidi naiknodi Israel.

Lordneke mei ka King Solomon

¹¹ King Solomon ne loku fahui nogna Sugablahi Lord na, balugna nogna suga biꞌo thegna na, nei keha glepo te magnahaghei edi mana re.

¹² Aonu Lord mei bongiro ne cheke eghu ka Solomon: “Iara la nomhinihi nou tharai iagho ia. Iara la vahinihi Sugablahi igne, eghuteuna ghotilo ginauna mei agne mala fafara ka iara.

¹³ “Nu jame te tapla jafra ghotilo ka nakhibo na, iara ginauna para ghami ghotilo. Eghuteuna iara ginauna theome snakreni nakhete na mala soru mei, ba kuru mei kmana cheche mala goigoni fahui nomi nagare ghotilo are, ba snakreni kaisei fogra te thono diꞌa fara mala para ghami ghotilo.

¹⁴ Nu jame te nhaꞌa fapari ghami themi ghotilo nogu naikno iara ra, eghuteuna koko ghotilo puhimi te diꞌare, eghuteuna tarai mei ghotilo ka iara teuna, neubane au neu iara kligna, iara ginauna nomhi ghami ghotilo. Eghuteuna iara ginauna hata fadelei nakhibomi ghotilo re, eghuteuna iara ginauna eni glose igne mala ke keli fapulo.

¹⁵ Nu iara ginauna reireghi fakelini Sugablahi igne, eghuteuna tharai te edi ghotilo ka Sugablahi igne na, iara ginauna tarabanau kolho te mala nomhi ghami ghotilo na.

¹⁶ Iara ngala neke vahini nei fablahini neku Sugablahi teke horo iagho igne. Nanghagu iara na ginauna au fabrahu ka vido igne. Iara ginauna reireghini, eghuteuna iara ginauna ghatho branani fabrahu.

¹⁷ “Eghuteuna iagho ghema Solomon, iagho mala leghuni puhigu iara te doglo gne, jateula mae kmamu King Devet tifa ia eghu. Eghuteuna iagho mala faꞌuvedi nogu vetula iara ra, eghuteuna iagho mala edi gobigna lepo teke chekedi iara ka iagho ra eghu.

¹⁸ Jame te edi iagho gobigna lepo igre na, iara ginauna eni unha teke nhaꞌa chekeni iara balugna mae kmamu iagho ia. Iara neke cheke ka mana eigna kaisei ka tharaknagna mana na ginauna king fabrahu mala funei frunini Israel.

¹⁹ “Nu jame te figri tagru ghau iara ghotilo maemi Israel gre te theome faꞌuvedi nogu vetula nei nogu cheke teu teke edi iara ka ghotilo ra, ba pogho soru ka keha god delei.

²⁰ Jame te eghu ghotilo na, iara ginauna khi fajifla ghami ghotilo ka glose mala nomi ghotilo teku iara igne, eghuteuna iara ginauna tiroguni Sugablahi teke fablahi iara mala pogho soru ghotilo ke ulugu iara teku igne. Eghuteuna naiknodi keha kantri are ginauna cheke faparini nei maꞌeni eghu Sugablahi igne.

²¹ Eghuteuna famane Sugablahi igne ginauna jateula bukrei thina eghu kolho. Aonu naikno nate mei salaꞌu tagna na ginauna jaglo nodi fara na cheke eghu, ‘Naugna unha si Lord te goigonini glose igne ba Sugablahi ignea?’

²² Aonu naiknore ginauna cheke eghu, ‘Naugna mare neke tei kokoni Lord, nodi God mae kuꞌedi mare tifa ra, mae ihei teke hata fajifladi ka namono Ijep. Eghuteuna mare neke leghudi keha god delei neke pogho sorudi nei loku ranghidi neku. Eghume mana nhaꞌa mei puhi biꞌo igre ke klignadi mare.’ ”