Fapea Kronikols 6 - Buka Blahi Ka Cheke Holo

¹ Aonu mae Solomon ne tarai, “Lord, iagho neke chekeni nate au iagho ke lamnagna khoveo te romno na.

² Gognarona iara la horohi kaisei famane Sugablahi malamu iagho. Kaisei vido mala au fabrahu iagho tagna.”

³ King figri lao ka naiknodi Israel te kegra teu ka vido tuana ne fablahidi mare.

⁴ Aonu mana ne cheke eghu, “Tahati cheke fakelini Lord, noda God tahati maeda Israel. Mana ne eni unha teke nhaꞌa chekeni ka kmagu iara King Devet. Lord neke cheke eghu ka mae Devet,

⁵ ‘Funu ka narane teke hata iara nogu naiknore teke jifla mei funu Ijep, te ghilei mei posa gognarogne, iara neke theome vahini kaisei namono biꞌo ka vikegna Israel te mala horo kaisei nogu Sugablahi iara mala tufru soru ghau iara. Eghuteuna iara neke jaola neke theome vahini kaisei mae te mala batu ghami ghotilo na.

⁶ Nu iara vahini Jerusalem namono aheva te mala tufru soru ghau iara, eghuteuna iara neke vahini Devet mala king frunidi nogu naikno iara Israel.’ ”

⁷ Aonu mae Solomon ne cheke eghu, “Kmagu iara King Devet ia neke magnahagheni fara te horo kaisei Sugablahi mala tangomana tahati te mala cheke fakelini nanghagna Lord.

⁸ Eghuteuna Lord neke cheke eghu ka mana, ‘Thofno keli fara te magnahaghei horo iagho kaisei Sugablahi te mala tufru soru ghau iara na,

⁹ nu iagho ginauna theome tangomana nate horo Sugablahi igne. Thumu iagho na ginauna horo Sugablahi te mala fafnaknoni nanghagu iara na.’

¹⁰ “Eghume gognarona, Lord na la fathokeni nogna nhaꞌa cheke na. Iara ke tughuni mae kmagu mala king gna Israel, eghuteuna iara horo nogna Sugablahi mana na mala tangomana tahati te tufru soruni Lord, noda God tahati maeda Israel.

¹¹ Eghuteuna jare nate lilisei iara Bokis Blahi na. Ka Bokis Blahi igne te au nogna Nhaꞌa cheke Lord teke eni mana baludi nogna naikno Israel.”

Nogna tharai King Solomon

^12-13 King Solomon ne eni kaisei vido mala thapla mala tangomana mana te kegra haghe te mala facheke na. Mana horo ka bras eghuteuna lilisei farihotei glalaba ke ulu olta. Krepagna vido igne salaꞌudi phei mita, brahugna vido igne salaꞌuni phei mita, eghuteuna haghegna na salaꞌuni phei mita. Aonu mana haghe ka vido mala thapla igne ke uludi naiknodi Israel ne ngafa haghe phei khamegna re kligna ne tarai.

¹⁴ Aonu mana ne tarai eghu, “Lord, nomi God ghehati maemi Israel, theo kaisei god aheva nga kligna ba ka nauthoglu igne te jateula iagho teuna. Iagho leghuni nou nhaꞌa cheke na ne ghatho tahudi nou naikno iheire te thofno magnahaghei te leghuni puhimu iagho na.

¹⁵ Kmagu iara King Devet ia, nou mae gloku iagho ia, iagho neke edihi unha teke nhaꞌa chekedi iagho ka mana ra. Gognarona, nou cheke iagho ra la thoke mei tutuani fara.

¹⁶ “Lord, nomi God ghehati maemi Israel, tajini sagho fapea nou nhaꞌa cheke teke eni iagho ka nou mae gloku kmagu iara Devet. Iagho neke nhaꞌa cheke ka thugna mana re te mala king fabrahu Israel ginauna, eghu jame te thofno leghudi mare nou Vetula iagho re jateula mana teke leghu nigho iagho ra teuna.

¹⁷ Eghume, iagho nomi God ghehati maemi Israel, edi sagho mala thoke mei unha teke nhaꞌa chekedi iagho ra.

¹⁸ “Lord, iagho ginauna na mei au balumi ghehati naiknogna nauthoglu igne sia? Kligna na namono biꞌo fara theome nabamu iagho te au tagna na. Sugablahi te eni iara igne jaola ikoi fara theome nabamu iagho te au tagna na.

¹⁹ Lord, nogu God, fanomho mei ka nogu natanhi nei nogu tharai teu iara nou mae gloku gne. Keli ranghi ghau nei tusu mei ranghi ghau glepo te tore nigho iara gognarogne.

²⁰ Iara magnahaghei nigho iagho te filo meini Sugablahi igne hamerane, naublatha nei bongiro. Igne Suga teke nhaꞌa chekeni iagho te mala au Nanghamu iagho na. Jame te eghuna, iara laseni, iagho ginauna nomhini nogu tharai iara na kate tarai ari iara ka vido igne.

²¹ Fanomho ka nogu tharai iara nou mae gloku gne, eghuteuna fanomho ka nodi tharai nou naikno iagho gre, kate mei tarai mare ka vido igne. Neubane au neu iagho ka namonomu na kligna, fanomho mei ka nomi tharai gre. Eghuteuna kate fanomho iagho na, hata fadeleidi nakhibomi gre eghu.

²² “Jame ihei te eni kaisei najafra ranghini kheragna fofodu na, eghuteuna hata mei mare mae igne ka nou olta iagho na, eghuteuna glahu cheke faheta mana ka tathamu iagho na, eghuteuna chekeni neke theome eni teuna.

²³ Lord, neuba iagho ne au neu kligna, fanomho mei fadoglini puhi igne. Jame te theome doglo mana na, iagho fateni mana eghuteuna parani mana leghuni unha teke eni mana na. Nu jame te doglo teu kolho mana na, iagho chekeni mae igne theome nabagna te au papara na teuna.

²⁴ “Jame mae naoka gre uluni magra na ka nou naikno iagho Israel igre naugna mare ne tapla jafra ka nakhibo ranghi nigho iagho. Eghuteuna jame teke pulo mei mare ka iagho, eghuteuna ke mei ka Sugablahi igne meke fafnaknoni nanghamu iagho nodi God na, eghuteuna tarai ka iagho mala hata fadeleidi nakhibodi re teuna.

²⁵ Jame teuna, neuba iagho ne au neu kligna, iagho fanomho mei ka nodi tharai re. Iagho hata fadeleidi nakhibodi nou naikno iagho Israel. Eghuteuna ke hata fafigridi ka namono teke tusu ranghidi iagho nei ka gradi mare tifa ra.

²⁶ “Jame te theome nakhete naugna nou naikno iagho gre ne tapla jafra ka nakhibo ranghi nigho iagho. Nu jame te tarai mei mare ka Sugablahi igne, eghuteuna fafnaknoni nanghamu iagho na, eghuteuna ke figri mare gaoghathodire me koko nakhibo igre naugna te paradi iaghore teuna.

²⁷ Jame teuna, neuba iagho ne au neu kligna, iagho fanomho mei ka nodi tharai nou naikno gre. Hata fadeleidi nakhibodi nou naikno iagho Israel. Farirhiu ranghidi puhi te doglo na, eghuteuna snakrei mei ranghidi nakhete mala soru mei ka namono teke tusu lao iagho ka nou naiknore tifa ia mala au fabrahu mare tagna.

²⁸ “Jame theo gano, ba fogra biꞌo te mei goigonidi nou naikno iagho te au ka kantri igne, ba muno te mei goigonidi gano ka nagare, ba mae naoka te mei magri ghami.

^29-30 Te eghuna, iagho fanomho ka nodi tharai nou naikno iagho Israel. Lord, iagho ngala te lasedire gaoghathodi mare te gnafa na. Eghume, kate theome doglo gaoghathodire, mare na tarai ari ka Sugablahi igne, eghuteuna mare na ngafa haghe khamedire mala tarai ari ka iagho, neuba iagho ne au neu kligna, iagho fanomho ka nodi tharaire. Hata fadelei nakhibodire. Naugna iagho ngala te laseni nagnafagna naiknogna nauthoglu igne, iagho tangomana te fadoglidi mare leghuni unha teke eni mare na.

³¹ Ka puhi igne, mare tangomana te mhaghu nigho nei leghuni puhimu iagho na leuleghu narane kate au mare ka namono teke tusu lao iagho ka kuꞌemi ghehati tifa ra.

³² “Naiknodi keha kantri igre ginauna nomhidi thoutonu eimu iagho te au nolaghi biꞌo, nei iagho edi kmana glepo te biꞌo mala togho ghami ghehati. Eghume glahu kaisei maegna ka keha kantri te khaba igre mei mala fafnaknoni nanghamu iagho na, eghuteuna tarai lao ka Sugablahi igne.

³³ Jame te eghuna, neuba iagho ne au neu kligna, fanomho mei ka nogna tharai mana na. Ka puhi igne, naikno te gnafa ka nauthoglu igne ginauna thofno laseni nanghamu iagho na, nei gaoghathomu iagho na, jateula nou naikno iagho te ghatho tahu nigho igre eghu. Eghuteuna mare ginauna laseni Sugablahi teke horo iara igne, thofno nou iagho.

³⁴ “Jame nou naikno iagho gre tei magridi nodi naokare ka vido aheva te tei mare na. Eghuteuna kate tei mare na, mare ginauna figri lao ka namono biꞌo teke vavahi iagho igne, eghuteuna mare ginauna tufru soru nigho ka Sugablahi teke horo iara igne, nei mala tarai ari ka iagho.

³⁵ Jame te eghuna, neuba iagho ne au neu kligna, fanomho mei ka nodi tharai mare igre, mala tangomana mare te uluni magra na.

³⁶ “Theo kaisei naikno ka nauthoglu igne te snagla ka nakhibo na. Eghume kate tapla jafra ka nakhibo nou naiknore, iagho jame diꞌatamu ka mare, snakredi mae naokare mala mei uludi mare, eghuteuna hatadi mare tei ka nodi kantri mare re, neubane namo ba khaba Israel.

³⁷ Jame tutuani eghuteuna mare au ka keha kantri are, glahu teke hogri nagnafa mare teke tarai ari ka iagho mala cheke thakledi puhidi te diꞌa, nei nakhibodire.

³⁸ Jame tutuani te au teu mare ka kantri nodi naoka re, glahu teke figri gaoghathodi mare ke pulo mei ka iagho, eghuteuna ke ghatho tahu nigho fara. Eghuteuna kate eghu mare na, mare ginauna figri tei ka namono teke tusu lao iagho ka kuꞌemi ghehati tifa ra, nei ka namono biꞌo teke vahinihi iagho, nei ka Sugablahi teke horo iara te mala pogho soru ka nigho na, nei tarai ari ka iagho.

³⁹ Jame te eghu na, neuba iagho ne au neu kligna, iagho fanomho mei ka nodi tharai mare re, nei toghodi eghu. Iagho hata koko nakhibo teke edi fadiꞌa ranghi nigho nou naiknore.

⁴⁰ “Nogu God, filo mei fabrahu ka ghehati, eghuteuna fanomho mei ka nomi tharai ghehati te edi ghehati ka vido igne.

⁴¹ “Lord God, iagho mei au fabrahu ka nou vido iagho igne balugna Bokis Blahi te fakakhana nou nolaghi biꞌo iagho. Lord God, iagho snakredi nou mae pris gre mala filo ari fabrahu ka iagho mala fakarhidi iagho, eghuteuna iagho snakredi iheire te ghatho tahu nigho iagho gre mala kelitadi fara mare ka puhimu iagho te keli igre.

⁴² Lord God, thosei figri tagruni mae ihei teke vavahi iagho te kegra king igne. Ghathoni teke nhaꞌa cheke iagho mala ghatho tahuni nou mae gloku King Devet teku ia.”