Fapea Kronikols 5 - Buka Blahi Ka Cheke Holo

¹ Kate loku te gnafa King Solomon gloku te eni ka nogna Sugablahi Lord na igne. Eghume, mana hata silva nei gol nei keha glepo langau eghu teke fablahi kmagna mana King Devet tifa ra ne tei lilisei ka chogho te mala lilisei glepo ka Sugablahi na.

Hatimare mae pris pala Bokis Blahi na ne tei ka Sugablahi na

² King Solomon ne kilo meidi mae mala baubatu ka vike te gnafa Israel, nei mae funei ka tharakna te gnafa, nei keha mae mala baubatu langau eghu mala kafe tei Jerusalem. Mare ne kafe tei Saion ne hata nogna Bokis Nhaꞌa Cheke Lord na pala ne haghe ka Sugablahi na. Ka narane igre keha nanghagna Jerusalem na Saion, ba “Nogna Namono Biꞌo King Devet.”

³ Eghuteuna mare ne kafe tei ka king ka Narane biꞌo te mala Au ka Grorofe Ikoi, ka fafitu nhigra ka nodi finogha mare na.

⁴ Kate tei te gnafa mare na, mae Livaet gre ne pala Bokis Blahi na.

⁵ Eghuteuna mae pris ka vikegna mae Livae igre hata ne tei Suga Tapuale te Blahi na baludi keha glepo blahi langau eghu. Mare pala ne tei glepo igre ka nogna Sugablahi Lord.

⁶ Eghuteuna King Solomon baludi goro mae biꞌodi Israel re ne kafe khapru mei ke ulugna Bokis Blahi igne, eghuteuna mare ne edi kmana fafara ka sipu nei buluka eghu te theome tangomana kaisei naikno te kahadi re.

⁷ Aonu hatimare mae pris pala Bokis Nhaꞌa Cheke igne ne tei lamna ka Sugablahi na. Mare tei ne lilisei lamna ka Chogho te Thofno Blahi Fara na ke pari baghidi phei mumuju engel igre.

⁸ Baghidi phei mumuju engel igre toku mei ke kligna gna Bokis Blahi igne, nei ke klignadi phei gaju te mala pala igre.

⁹ Phei gaju igre thono brahu fara, jame ihei te kegra ka Chogho biꞌo te Blahi igne na, mana tangomana te filoni khukrudi phei gaju igre. Nu jame ihei te kegra teu kosi ka Sugablahi na, mana theome tangomana te filodire. Phei gaju igre au ngala jare mei thoke gognarogne.

¹⁰ Theo kaisei unha nga te au ke lamnagna Bokis Blahi igne, nu phei thina tataba teke lilisei mae Moses tifa ra kolho te au teu jare na. Kani teke jifla mei Ijep mae Moses baludi naiknodi Israel ra, Lord neke eni kaisei nhaꞌa cheke baludi mare ka Thogele Sanai, ka narane tuare mae Moses neke lilisei phei thina tataba ka Bokis Blahi igne.

¹¹ Eghuteuna kate jifla mei mae pris igre ka Chogho biꞌo te Blahi na mare te gnafa na ne fagaedi thedi ka tathagna Lord, neuba mare ne mei ka unha nafnata tharakna.

¹² Eghuteuna mae Livaet te gnafa igre pipichi famane pohe vegha, eghuteuna mare kegra rhegna olta na fei ke maghati. Mae te koje igre, Asaf, mae Heman nei mae Jedutun, nei thudire baludi kheradi re. Mare lalahu ka belo nei thua nafnata gita, eghuteuna kaisei gobi varadaki pris jaola ifu ka khufli.

¹³ Eghuteuna kate koje teu mae te mala koje gre, hatimare mae pris gre ifu ka trampet, eghuteuna keha maere mare lalahu ka simbol nei ghita. Nodi khoje mare igre famane fara fanomhodi re. Mare koje mala kilo fnaknoni Lord, ne cheke eghu: “Lord thofno keli fara, eigna Mana ghatho ghita fabrahu.” Aonu kaisei khoveo mei ne fodu ka Sugablahi na,

¹⁴ eghume, mare theome tangomana te edi nodi gloku re, naugna naphaegna nogna nolaghi Lord na ne fodu ka nogna Sugablahi na.