Fapea Kronikols 4 - Buka Blahi Ka Cheke Holo

Glepo ka nogna SugablahiLord

¹ Mare horo kaisei olta ka bras. Brahudi fati khukrugna olta igne, nheva mita. Eghuteuna haghegna na fati mita vidogna.

² Mare horo kaisei tangk biꞌo ka bras. Haghegna na salaꞌudi phei mita, eghuteuna ke lamna te funu ka keha phile na te tei thoke ka keha phile na, namo fati mita vidogna, eghuteuna thutagna te lithui ke kosi na nabotho thiloi mita vidogna.

³ Pari ka pesigna tangk igne, au phei thura mumuju buluka te kegra faligohoni. Mumuju igre thofno loku fodu jateula te kaisei vido eghu ka tangk igne, eghuteuna mare edi varadaki mumuju buluka ka kaisei mita.

⁴ Eghuteuna mare edi nabotho phei mumuju buluka nalhaꞌudi mala kegra fodu. Keha thiloi re figri famaghati, keha thiloi re figri famata, keha thiloi re figri famosu, eghuteuna keha thiloi re figri fararu. Tangk igne gnokro ka thagrudi nabotho phei mumuju buluka nalhaꞌudi igre.

⁵ Thutagna tangk igne thogra thokeni nhana sentemita. Eghuteuna ka foflogna kligna na thora jateula kaisei kapu te peko fakosi ra eghu, ba jateula sisi jungutu te kiloi lili ra eghu. Tangk igne tangomana te fodu te thokeni namno salei namno thogha lita khoꞌu.

⁶ Eghuteuna mare edi nabotho dis biꞌo, aonu mare lilisei glima dis ke mata Sugablahi, eghuteuna keha glima dis ke raru. Dis igre mala titihi nafnahi te krono kate fafara hatimare mae pris. Eghuteuna khoꞌu te au ke lamnagna tangk igne mala titihi khame nei ghahe eghu hatimare mae pris.

^7-8 Mare edi nabotho glepo mala lilisei juta leghuni unha te ghathoni mare na. Eghuteuna mare edi nabotho tevo. Aonu mare lilisei nabothoi igre ke lamna Sugablahi. Mare lilisei glima glepo mala lisei juta nei glima tevo eghu ke mata, eghuteuna glima glepo mala lisei juta nei glima tevo eghu ke raru. Eghuteuna mare edi kaisei gobi dis ikodi ka gol.

⁹ Eghuteuna mare eni kaisei glalaba biꞌo te titili ka thina ke kosigna Sugablahi na. Glalaba igne maladi mae pris kolho. Eghuteuna mare ringni lithui ka thina glalaba biꞌo ke kosigna Sugablahi igne. Grengatha te mala tei ka phei glalaba igre mare toku tafru ka bras.

¹⁰ Mare lilisei tangk biꞌo igne rhegna sulukhugna Sugablahi na ke mata ghe maghati.

¹¹ Eghuteuna mare jaola edihi baket mala lilisei nakrofu khaꞌaghi, sevol nei dis. Aonu mae Huram ne loku fahui gloku mala edi mana teku King Solomon teke kilo meini mana mala horo mana nogna Sugablahi God na tekuna.

¹² Glepo teke horo mana ka bras re igre: Phei khegra biꞌo. Phei phaꞌu khegra te jateula dis teu kligna ka phaꞌudi phei khegra igre. Phei glepo te jateula fangna teu te lalaoni ka phei phaꞌu khegra igre.

¹³ Fati gobi mumuju sisi pomegranet, phei gobi ka kaisei fangna ka kaisei phaꞌu, eghuteuna phei gobi mala fangna ka keha phaꞌu na.

¹⁴ Nabotho chariot mala pala khoꞌu, baludi nabotho dis khoꞌu.

¹⁵ Kaisei tangk biꞌo gnokro ke klignadi nabotho phei mumuju buluka nalhaꞌudi igre.

¹⁶ Baket mala nanhaꞌa nakrofu khaꞌaghi, nei sevol, nei foke mala churu nafnahi. Mae Huram neke edi glepo igre ka bras malagna nogna Sugablahi Lord na ranghini King Solomon.

¹⁷ King neke cheke ka mana mala edi glepo igre ka sare rhegna Khoꞌu biꞌo Jordan, farihoteidi phei namono Sukot ghe Saretan. Jare teke tofa mare bras teke blalho na, te mala edi glepo igre.

¹⁸ Nu king neke theome chekedi mare mala skel gobigna lepo igre, naugna thono kmana fara, eghume mare theome nanga nodi te mala lasedi tahu dire.

¹⁹ Aonu King Solomon neke chekedi mae glokure mala edi glepo te mala lilisei ke lamnagna Sugablahi na. Glepo teke edi mare ka famane gol igre: Olta mala Gahu Insens. Tevo mala lilisei Bret Blahi.

²⁰ Nabotho juta, baludi glepo te gnokro ke klignadi. Aonu mare ne lilisei nabotho juta igre au ke ulugna Chogho te Thofno Blahi Fara na leghuni unha te chekeni ka Vetula na.

²¹ Mumuju sisi, juta, nei chochomi. Chochomi igre gol kolho.

²² Eghuteuna glepo mala falehe juta, nei dis mala hata insens, nei sevol mala krisu sisibe khaꞌaghi te phae fabrahu, nei dis mala lilisei dadara buluka ba sipu. Nei gol te toku tafrudi phei grengathagna Chogho te Thofno Blahi Fara na, nei phia grengathagna chogho biꞌogna Sugablahi na.